ރާއްޖޭގެ އިސް އޮފިސް އިދާރާތަކުގެ ވެރިންނަށް ބޭރު މީހުން ތިބުމުން ކުރީގެ އިސްލާމިކް މިނިސްޓަރ ޑރ. މުޙައްމަދު ޝަހީމް އަލީ ސަޢީދު ކަންބޮޑުވުން ފާޅުކުރައްވައިފިއެވެ.
ޑރ.ޝަހީމް މިއަދު ކުރެއްވި ޓްވީޓެއްގައި އެމަނިކުފާނު މިހެން ވިދާޅުވީ، މީސްމީޑިޔާގައި ގައުމީ އެއާލައިނާއިއެކު ޖޮއިންޓް ވެންޗާ ހަދާނެ ބޭރުގެ ބަޔަކު ހޯދާކަމަށް ދެކެވެމުން ގެންދާ ވާހަކައާއި ގުޅިގެންނެވެ.
މިގޮތުން ރާއްޖޭގެ ޕެންޝަން އޮފީހުގެ ވެރިޔަކަށް ބޭރު މީހެއް ހުންނެވި ކަމަށާއި، ޤައުމީ ބޭންކުގެ ވެރިޔަކަށްވެސް ހުންނެވީ ބޭރުގެ މީހެއް ކަމަށް ޝަހީމް ވިދާޅުވިއެވެ. އަދި ޤައުމީ އެއާޕޯޓްގެ އިތުރުން ޤައުމީ އެއާލައިންނާ ވެސް ބޭރު ބަޔަކު ޙަވާލުވާކަމަށް ވިދާޅުވެ ޝަހީމް ވަނީ ރާއްޖޭގެ ރައްޔިތުންނަށް ހައްގު މިންވަރަކީ އެއީތޯ ސުވާލުކުރައްވާފައެވެ.
ޕެންޝަން އޮފީހުގެ ވެރިޔަކަށް ބޭރު މީހެއް. ޤައުމީ ބޭންކުގެ ވެރިޔަކަށް ބޭރު މީހެއް. ޤައުމީ އެއާޕޯޓްގެ ވެރިޔަކަށް ބޭރު މީހެއް. ޤައުމީ އެއާލައިންނާ ވެސް ބޭރު ބަޔަކު ޙަވާލުވަނީ،،، އަހަރުމެން ދިވެހިންނަށް ޙައްޤު މިންވަރަކީ މިއީތޯ؟
— Mohamed Shaheem Ali Saeed (@Mohamedshaheem1) August 13, 2021
ރާއްޖެއަކީ ޢިލްމީ ތަޖުރިބާހުރި ޤާބިލް ދަރީން ތިބި ޤައުމެއްކަމަށް ޝަހީމް ފާހަގަކުރައްވާފައިވާއިރު، މިޤައުމު ތަރައްޤީކުރުމުގެ ޤާބިލްކަން ދިވެހިންގެ ސިކުނޑީގައި ހުންނާނެކަމަށްވެސް ޝަހީމް ވަނީ ވިދާޅުވެފައެވެ.
ސަރުކާރު ހިއްސާވާ ކުންފުނިތަކާއި، އަމިއްލަ ބޮޑެތި ކުންފުނިތަކުގެ ތެރެއިން މަތީ ފެންވަރުގެ ވަޒީފާތަކުގައި ގިނައިން ބޭރުމީހުން ތިބުމާއި ގުޅިގެން، މިދިޔަ އަހަރު ރައްޔިތުން މަޖިލީހުން ފާސްކުރި އެސްއޯއީ ކޮމިޓީގެ ރިޕޯޓުގައި ވަނީ އެފަދަ މަގާމުތަކަށް ސިވިލް ސާވިސް ކޮމިޝަނުން ދިވެހިން އައްޔަން ކުރުމަށް ފުރުސަތު ހޯދައިދިނުމަށް ހުށަހަޅާފައެވެ. އަދި އެމަގާމުތަކަށް ބޭރު މީހުންގެ ދަށުން ދިވެހިން ތަމްރީނުކުރުމާއި، މަތީ ވަޒީފާތަކަށް ފުރުސަތު ހޯދައި ދިނުމަށްވެސް އެރިޕޯޓުގައި ހުށަހަޅާފައިވެއެވެ.