ޑިޕާޗަރ ޓެކްސް ނަގަން ފަށައިފި

ރާއްޖޭގެ އެއާޕޯޓްތަކުން ބޭރަށް ފުރާ ފަސިންޖަރުންގެ އަތުން ނަގަމުން އައި އެއާޕޯޓް ޓެކްސްގެ ބަދަލުގައި، ޑިޕާޗާ ޓެކްސް ނަގަން ފަށައިފިއެވެ.

މިދިޔަ މަހުގެ ޖުލައިމަހު ޑިޕާޗަރ ޓެކްސް ނެގުމުގެ ބިލް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ތަސްދީގުކުރައްވާފައިވާ އިރު، އެއާޕޯޓް ސާވިސް ޓެކްސް އެއްގެ ގޮތުގައި މިހާތަނަށް ހުރިހާ ޕަސިންޖަރުންގެ އަތުން ޓެކްސް އެއް ނަގަމުންއައެވެ. އެގޮތުން އޭރު ގާނޫނު އޮތް ގޮތުން ނަމަ ފުރާ ކޮންމެ ދިވެއްސެއްގެ އަތުން ސާވިސް ޗާޖުގެ ގޮތުގައި 12 ޑޮލަރު އަދި ބިދޭސީ ފަސިންޖަރުންގެ އަތުން 25 ޑޮލަރު ނަގައެވެ. ނަމަވެސް އަލަށް ކަނޑައެޅި ގަވާއިދާއި އެކު ޑިޕާޗަރ ޓޭކްސް ނަގާނީ އެމީހަކު ދަތުރުކުރާ ކްލާހަށް ބެލުމަށް ފަހުގައެވެ.

The rates for Departure Tax.
Departure Tax will be introduced effective from 1 January 2022. Airport Service Charge will be repealed at the end of 31 December 2021. pic.twitter.com/IID42VTvGQ

— Maldives Inland Revenue Authority (@MIRAmaldives) December 29, 2021

ޑިޕާޗަރ ޓެކްސް ބެހިގެން ވަނީ ހަތަރު ބަޔަކަށެވެ. އެއީ އިކޮނޮމީ ކްލާހާއި، ބިޒްނަސް ކްލާސް، ފަސްޓް ކްލާސް އަދި ޕްރައިވެޓު ޖެޓުތަކެވެ. އިކޮނޮމީ ފްލައިޓު ތަކުން ދަތުރުކުރާ ދިވެހިން 12 ޑޮލަރުގެ ޓެކްސް އެއް ދައްކަން ޖެހޭ އިރު، ރާއްޖެ އަންނަ ފަތުރުވެރިން 30 ޑޮލަރުގެ ޓެކްސް އެއް ދައްކަން ޖެހޭނެ އެވެ. ބިޒްނަސް ކްލާހުގައި ދަތުރުކުރާ ދިވެހިންވެސް އަދި ބިދޭސީންވެސް ޑިޕާޗަރ ޓެކްސް ގެ ގޮތުގައި 60 ޑޮލަރު ދައްކަން ޖެހެއެވެ. އަދި ފަސްޓް ކްލާސްގައި ދަތުރުކުރާ ނަމަ ޓެކްސްގެ ގޮތުގައި 90 ޑޮލަރު ދައްކަން ޖެހެއެވެ.

މީގެ އިތުރުން ޕްރައިވެޓު ޖެޓު ތަކުގައި ދަތުރު ކުރާ ދިވެހިނާއި ބޭރުގެ ފަސިންޖަރުން ވެސް ޓެކްސް ގެ ގޮތުގައި 120 ޑޮލަރު ދައްކަންޖެހޭނެ އެވެ. ޓެކްސް ނެގުމުގައި ތަފާތުވަނީ އިކޮނޮމީ ކްލާހުގައި ދަތުރުކުރާ ދިވެހިންނާއި ބިދޭސީންގެ އަތުން ނަގާ ޓެކްސްއިން އެކަންޏެވެ.