އެމްޑީޕީގެ ޗެއަރޕާސަންގެ އިންތިހާބު ބާއްވާނެ ތާރީހެއް ކަނޑައެޅުމަށް މާދަމާރޭ ގައުމީ މަޖިލީހުގެ ޖަލްސާ އެއްބޭއްވުމަށް އެޕާޓީން ހަމަޖައްސައިފިއެވެ.
އެމްޑީޕީ އިން މައުލޫމާތު އާންމުކޮށްފައިވާ ގޮތުގައި ގައުމީ މަޖިލީހުގެ ޖަލްސާ އޮންނާނީ މާދަމާރޭގެ 8:30 ގައި އިމާދުއްދީން ސްކޫލްގެ ހޯލުގައެވެ.
މި ޖަލްސާ އަކީ ޗެއަރޕާސަން އިންތިހާބު ބޭއްވުމަށް ކަނޑައެޅި ތާރީހު ކަމުގައިވާ އެޕްރިލް މަހުގެ 16 ވަނަ ދުވަސް ރޯދަ މަހާ ދިމާވާތީ އެނޫން ދުވަސްވަރަކު އިންތިހާބު ބޭއްވުމާއި މެދު ގޮތެއް ނިންމުމަށް ބޭއްވޭ ޖަލްސާއެކެވެ.
އެމްޑީޕީގެ ޗެއަރޕާސަން އިންތިހާބުގައި ވާދަކުރައްވަނީ އިކޮނޮމިކް މިނިސްޓަރ ފައްޔާޒް އިސްމާއީލާއި މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީއެވެ. ޗެއަރޕާސަން އިންތިހާބުގެ ދެ ކެންޑިޑޭޓުންވެސް އަންނަނީ ފޯރިގަދަ ވާދަވެރި ކެމްޕޭނެއް ކުރައްވަމުންނެވެ.
ގައުމީ މަޖިލިހުގެ 4 ވަނަ ދައުރުގެ 3 ވަނަ ޖަލްސާ މާދަމާރޭ 8:30 ގައި އިމާދުއްދީން ސްކޫލް ހޯލްގަ އޮންނާނެ. މީޑިއާތަކަށް ދައުވަތު އަރުވަން
ލައިވް: @Raajje_tv,@Sangu_TV
ފޭސްބްކްލައިވް: https://t.co/HGOqoPvuzG— MDP Secretariat (@MDPSecretariat) March 7, 2022
އިންތިހާބަށް ކުޑަތަންވެފައި ވަނިކޮށް، ވޯޓުލާ ތާރީހަށް ބަދަލު ގެނައުމަށް އެންމެ ފުރަތަމަ ވާހަކަ ދެއްކީ އިކޮނޮމިކް މިނިސްޓަރު ފައްޔާޒް އިސްމާއިލްގެ ކެމްޕެއިން ޓީމުންނެވެ. އެކަމަށް އިންތިގެ ކެމްޕެއިން ޓީމުން އެއްބަސްވެދާނަން ތޯ “ސަންގު” އިން ސުވާލު ކުރުމުން އިންތިގެ ތަރުޖަމާނު އަދި އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑޭ) ވިދާޅުވީ އިންތިހާބަކަށް ވަކި ތާރީހެއް ކަނޑައަޅަނީ ވަރަށް ގިނަ ވިސްނުންތަކާއި މަޝްވަރާއަށް ފަހުކަމަށް ދެކޭކަމަށެވެ. އެހެން ކަމުން އިންތިހާބެއްގެ ތާރީހެއް އެއްވެސް ގޮތަކަށް ލަސް ކުރުން ގަބޫލެއް ނޫންކަމަށް ވައްޑެ ވިދާޅުވި އެވެ.
އެމްޑީޕީގެ އެތެރޭގެ އިންތިހާބާއި ދިމާކޮށް އަނެއްކާވެސް މައްސަލަތައް ގޯސްވެފައިވާއިރު، އެންމެ ފަހުން ޖެހުނީ ރ. ދުވާފަރު އާމިރު، އެ ރަށުގެ ހެލްތް ސެންޓަރުގެ ވަޒީފާއިން ވަކި ކުރި މައްސަލަ އެވެ. އިންތިގެ ކެމްޕެއިން ޓީމުން ތުހުމަތު ކުރާގޮތުގައި އޭނާ ވަޒީފާއިން ވަކި ކުރީ ފައްޔާޒަށް ތާއީދު ކުރަން އެންގުމުން އެގޮތަށް އަމަލު ނުކުރުމުގެ ސަބަބުންނެވެ. އެ މައްސަލަ އިއްޔެގެ މަޖިލީހަށް ކުއްލި މައްސަލައެއްގެ ގޮތުގައި ހުށަހެޅުމުން އެމްޑީޕީ ރައީސް އިބްރާހިމް މުހައްމަދު ސޯލިހާއި އަރިސް ބޭފުޅުން ވަނީ ނުރުހުންފާޅުކޮށް މިއީ ރައީސް ސޯލިހަށް ދަތިކުރުންގެ ގޮތުގައި ސިފަކޮށްފަ އެވެ. އެކަމަށް ރައްދު ދީ ރައީސް ނަޝީދާއި އަރިސް ބޭފުޅުން ވަނީ ނުފޫޒާއި ބާރުގެ ބޭނުން ކުރުން ހުއްޓާލުމަށާއި، އެއީ އެމްޑީޕީގެ ސިފަތަކެއް ނޫންކަމަށް ބުނެފަ އެވެ.
ޗެއަރޕާސަންގެ އިންތިހާބާ އެކު ޕާޓީގެ އެތެރޭގެ ދެން ހުރި އިންތިހާބުތައް ކަމުގައިވާ އަންހެނުންގެ ރޫހާއި ޒުވާނުންގެ ހިތްވަރުގެ އިންތިހާބު ވެސް 16 އޭޕްރިލްގައި ބޭއްވުމަށް އެންމެ ފަހުން ބޭއްވުނު ގައުމީ މަޖިލީހުން ވަނީ ފާސްކޮށްޕައެވެ.