ކޮވިޑް-19 އެމެޖެންސީ އިންކަމް ސަޕޯޓް ޕްރޮޖެކްޓްގެ ދަށުން ހިންގުމަށް ހަމަޖެހިފައިވާ އަޕްސްކިލިން އަދި ޓްރެއިނިން ޕްރޮގްރާމް ރަސްމީކޮށް ފެށުމަށް މިނިސްޓްރީ އޮފް އިކޮނޮމިކް ޑިވެލޮޕްމަންޓް އަދި އެކައުންޓިން ދާއިރާއާ ގުޅޭ ކޯސްތައް ހިންގާ ފަރާތްތަކާ ދެމެދު މިއަދު، އެއްބަސްވުމެއްގައި ސޮއިކޮށްފިއެވެ.
މިނިސްޓްރީން ބުނީ، މި ޕްރޮގްރާމްގެ ދަށުން ޓްރެއިނިން ޕްރޮގްރާމްތައް ހިންގުމަށް މިނިސްޓްރީއާއެކު މިއަދު އެއްބަސްވުމުގައި ސޮއިކުރީ ދިވެހިރާއްޖޭގެ ގައުމީ ޔުނިވާސިޓީ އަާއި ވިލާ ކޮލެޖް އަދި ކްލިކް ކޮލެޖާ އެކު ކަމަށެވެ.
We have signed agreements today with @MNUedu, @VillaCollegeMv, and @CliqueCollege as Training providers for Accounting courses, under the Covid-19 Income Support Project by the Ministry of Economic Development. pic.twitter.com/0L6ih0VGnX
— Economy & Trade (@MoEDmv) April 27, 2022
މި އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ މިނިސްޓަރ އޮފް ސްޓޭޓް ފޯ އިކޮނޮމިކް ޑިވެލޮޕްމަންޓް ނީޒާ އިމާދެވެ. އަދި އެމްއެންޔޫގެ ފަރާތުން މަސައްކަތު އެއްބަސްވުމުގައި ސޮއިކުރެއްވީ އެމްއެންޔޫ ބިޒްނަސް ސުކޫލުގެޑީން، އަބްދުލް ރަހްމާން މުބާރިކްއެވެ.
ވިލާ ވޮލެޖްގެ ފަރާތުން އެއްބަސްވުމުގައި ސޮއިކުރެއްވީ ވިލާ ކޮލޭޖުގެވައިސް ރެކްޓާ، ޑރ. އަލީ ނަޖީބްއެވެ. އަދި ކްލިކް ކޮލެޖްގެ ފަރާތުން އެއްބަސްވުމުގައި ސޮއިކުރައްވާފައިވަނީ ކްލިކް ކޮލެޖުގެއެކެޑެމިކް ޑީން، ދުންޔާ ހަމީދުއެވެ.
މިނިސްޓްރީން ބުނީ އަޕްސްކިލިން އެންޑް ޓްރެއިނިން ޕްރޮގްރާމުގެ މަގްސަދަކީ ކޮވިޑްގެ ބަލިމަޑުކަމުގެ ސަބަބުން އާމްދަނީއަށް ނުރަނގަޅު އަސަރުކޮށްފައިވާ ފަރާތްތައް ވަޒީފާގެ ބާޒާރަށް ނުކުމެވި ވަޒީފާގެ ފުރުސަތު ހޯދުމަށް މަގުފަހިކޮށްދިނުން ކަމަށެވެ.
އެކައުންޓިން ދާއިރާގެ އިތުރުން މި ޕްރޮގްރާމުގެ ދަށުން ޑައިވިން ދާއިރާއިންނާއި އިންފޮރްމޭޝަން ކޮމިއުނިކޭޝަން ޓެކްނޮލޮޖީގެ ދާއިރާއިން ތަމްރީނު ހާސިލް ކުރުމުގެ ފުރުސަތުތައް ކުރިއަށް އޮތް ދުވަސްތަކުގައި ހުޅުވާލާނެެ ކަމަށް މިނިސްޓްރީން ބުނެއެވެ. އަދި އެކައިންޓިން ދާއިރާއާ ގުޅޭ ކޯސްތަކަށް ކުރިމަތިލުމުގެ ފުރުސަތު މިހާރު ޖޮބް ސެންޓަރު ޕޯޓަލް މެދުވެރިކޮށް ހުޅުވާލާފައިވާ ކަމަށް މިނިސްޓްރީން ހާމަކޮށްފައިވެއެވެ.
އިކޮނޮމިކް މިނިސްޓްރީގެ ފަރާތުން ކޮވިޑް19 ގެ ދުވަސްވަރު ވަޒީފާ ތަކަށް އަސަރު ކުރި އާންމު ފަރުދުންނަށް އިންކަމް ސަޕޯޓް ގެ ގޮތުގައި ވަނީ އެލަވަންސް ދީފައެވެ. އަދި ސަރުކާރާއި އަމިއްލަ ފަރާތްތައް ހިމެނޭ ހެން އިންކަމް ސަޕޯޓް ރިލީފް ޕެކޭޖް ތަކާއި ފަންޑްގެ ގޮތުގައި ލޯނު އެހީ ވަނީ ފޯރުކޮށްދީފަައެވެ.