ވީޑިއޯއިން ފެންނަނީ ކޮންޑަމެއް ނަގާތަނެއް ނޫން، އެއީ އެޑިޓެއް: ކާނަލް ނަޝީދު

ސޯޝަލް މީޑިއާގައި ދައުރު ކުރަމުންދާ ވީޑިއޯގައި އެނދު މަތީން ނަގަނީ ކޮންޑަމެއް ނޫންކަމަށާއި، އޭނާ ނެގީ ސައިކަލުގެ ތަޅުދަނޑިއަށްވާއިރު ވީޑިއޯގެ އެބައި ހުރި އެޑިޓުކޮށްފައިކަމަށް މަޖިލީހުގެ ނޮޅިވަރަމް ދާއިރާގެ ކުރީގެ މެމްބަރު މުހަންމަދު ނަޝީދު (ކާނަލް) ވިދާޅުވެއްޖެ އެވެ. ވ

އެއްޖިންސުން ގުޅުން ހިންގައި ފާހިޝް އަމަލުތައް ހިނގާކަމަށް ބުނާ ވީޑިއޯތަކެއް ނަގައި އެ މީހުންނަށް ބްލެކްމެއިލް ކުރި މައްސަލައެއް ފުލުހުން ދަނީ ތަހުގީގު ކުރަމުންނެވެ. މި މައްސަލަ އެންމެ ފުރަތަމަ ފެންމަތިވެގެން އައި ކުރީގެ ރައީސް މުހައްމަދު ނަޝީދުގެ ކޮއްކޮ، އަދި މަޝްހޫރު ގާނޫނީ ވަކީލު ނާޒިމް ސައްތާރުކަމަށް ބުނާ ބޭފުޅަކު އެއްޖިންސުން ގުޅުން ހިންގާ ވީޑިއޯއެއް އާއްމުވުމާއި އެކު އެވެ.

އޭގެ ފަހުން ރައްޔިތުންގެ މަޖިލީހުގެ ހެންވޭރު ދެކުނު ދާއިރާގެ މެމްބަރު ހުސެއިން ޝަހީމް (އަނދުން ހުސެއިން) ކަމަށް ބެލެވޭ ބޭފުޅަކު ބަރަހަނާ ހާލުގައި އިތުރު އަންހެނަކާއި، ފިރިހެނަކާއި އެކު ތިބޭ ފޮޓޯ އެއް އާއްމުވި އެވެ. އަދި އޭގެ ފަހުން ކާނަލްކަމަށް ބުނާ މީހެއްގެ ފޮޓޯއެއް ސޯޝަލް މީޑިއާގައި އާއްމުކޮށް، ފަހުން ވީޑިއޯއެއް އާއްމު ކުރި އެވެ.

މި މައްސަލައިގައި ހިމެނޭ އަލަމްގިރި ނަމަކަށް ކިޔާ ބިދޭސޭ މީހާ އާއި، ނާޒިމް އަދި ކާނަލްގެ ޕާސްޕޯޓު ހިފަހައްޓާފައިވާއިރު އިއްޔެ އާއްމު ކުރި ވީޑިއޯގައި ބަރަހަނާކޮށް ފެންނަނީ ބިދޭސީ މީހާ އެކަންޏެވެ. އަދި އެނދު މަތީގައި އޮތް ފޯނު ނެގުމަށް ފަހު، ކާނަލް ހިނގައިގަންނަނީ ކޮންޑަމެއް ނަގައިގެންނެވެ.

އަލަމްގިރިއަކީ 43 މީހެއްގެ ވީޑިއޯ މިގޮތަށް ނެގި މީހެއްކަމަށް މައުލޫމާތު ލިބެ އެވެ. އޭގެ ތެރޭގައި ސިޔާސީ ބޮޑެތި މީހުންނާއި، އެ މީހުންގެ ދަރީންކަމަށް އަޑުވަނީ ފެތުރިފަ އެވެ.

ފާހިޝް އަމަލުތައް ހިންގާކަމަށް ބުނާ ކޮޓަރިއަށް ގެންދިޔައީ ބިޒްނަސް މީޓިންއެއްކަމަށް ބުނެކަމަށާއި، އަދި އޭނާ އެ އަމަލު ހިންގާފައި ނުވާނެކަމަށް ކާނަލް ބުނެ އެވެ. އަދި ވިދާޅުވީ އެ ކޮޓަރިއަށް ވަތް މަންޒަރު އާއްމުކުރާނެކަމަށް ބިރު ދައްކައި، ފައިސާ ދޭން ބުނި ނަމަވެސް އެއްވެސް ފައިސާއެއް ދީފައި ނުވާނެކަމަށެވެ.

މި މައްސަލައިގައި ކާނަލް މިއަދު ވިދާޅުވީ ސޯޝަލް މީޑިޔާގައި އޭނާއަށް ގަނާކުރާ ގިނަ މީހުންގެ ފަތިފުއްބަލާލައިފިނަމަ މާ ހުތުރު ކަންކަން އެބަހުރި ކަމަށެވެ. ނަމަވެސް އެއިން އެކަކު ވެސް ފަޟީހަތްވެ ދުނިޔެއަށް ބޭޒާރުވާން ނޭދޭކަމަށް ވިދާޅުވި އެވެ. ގަމީހުގެ ފަތިފުށް ބަލާލާއިރު މިލައާއި ކިލާ ނެތް ހަމަ އެކަކު ވެސް ނުހުންނާނެ. “ކަނޑުގެ ފޮނުގަނޑަށްވުރެ ފާފަ ގިނަވިއަސް އެކަލާނގެ ފުއްސަވާދެއްވާނެ. މާތްﷲ ގެ ހަޟްރަތުގައި އޮތް އަޅުގަނޑުގެ ފާފައަށްވުރެ ތިބާގެ ފާފަ ބޮޑު ވުމަކީވެސް އެކަށީގެންވާ ކަމެއް.” ކާނަލް

ކާނަލް ވިދާޅުވީ އޭނާ އެއްވެސް މީހެއްގެ ހައްގަށް އަރައިގެންފައި ނުވާނެކަމަށެވެ. އަދި އޭނާއަކީ އެއްއިރެއްގައި ވެސް ދީނަށް ފުރައްސާރަ ކުރި މީހެއް ނޫންކަމަށާއި، ދީނަށް ލޯބިކޮށް، ނަމާދުކޮށް މި ހިތްދަތި ދަނޑިވަޅުގައި ވެސް ޖަމާއަތަށް ނަމާދަށް ދާކަމަށެވެ. އަދި ކޮންމެ ރެއަކު ދަމުނަމާދުކޮށް، ސުންނަތް ރޯދަ ހިފައި، މާތް ﷲ ގެ މަގުގައި ހޭދަ ކޮށް ސަދަގާތް ދޭކަމަށެވެ. އަދި ބަލިމީހުންނަށް އެހީ ވެ، ކުދިން ބޭރަށް ކިޔަވަން ފޮނުވައިދޭއިރު މިއީ އޭނާ މީހުންނަށް އަންގައިގެން ކުރާ ކަންތަކެއް ނޫންކަމަށް ވިދާޅުވި އެވެ.

އެހެންކަމުން މިއަދު އޭނާއަކީ ވަލު ޖަނަވާރެއްގެ ގޮތަށް ބަޔަކު ސިފަ ކުރަން އުޅުނަސް އެކަން ނުވާނެކަމަށް ކާނަލް ވިދާޅުވެފައި ވެއެވެ. ކާނަލް ތަކުރާރުކޮށް ވިދާޅުވީ ދައުރު ކުރާ ވީޑިއޯގައި އޭނާ ބަރަހަނާކޮށް ނެތްކަމަށާއި، ކިތަންމެ ވަރެއް ކުރި ނަމަވެސް ފައިސާ ނުދޭނެކަމަށެވެ.

ޕޯސްޓާއި އެކު އާއްމުންގެ ބައެއް ކޮމެންޓުތަކެއް އައިއިރު، އެނދު މަތީން ނަގަނީ ކޯޗެއްތޯ ބައެއް މީހުން ސުވާލު ކުރި އެވެ. ޖަވާބުގައި ކާނަލް ވިދާޅުވީ ވީޑިއޯގައި ހުރީ އޭނާކަމަށާއި ނަމަވެސް އެއީ ކޮންޑަމެއް ނޫންކަމަށެވެ. ކާނަލް ވިދާޅުވީ އެނދު މަތީގައި އޮތް ފޯނާއި އެކު އެނާ ނަގަނީ ތަޅުދަނޑިއެއްކަމަށާއި، ވީޑިއޯ ބަޔަކު އެފަދަ ގޮތަކަށް އެޑިޓު ކުރަން ޖެހޭ ސަބަބެއް ނުވިސްނޭކަމަށެވެ.

ކާނަލް ތަކުރާރުކޮށް ވިދާޅުވީ އޭނާގެ އެއްވެސް ކުށެއް ނެތްކަމަށާއި، ހަގީގަތެއް ބަދަލެއް ނުވާނެކަމަށެވެ.