މޯލްޑިވިއަން ޑިމޮކްރަޓިކް ޕާޓީ (އެމްޑީޕީ)ގެ ޗެއަރޕާސަންގެ ނައިބު އިދާރީ އަދި މާލީގެ މަގާމަށް ކުރިމަތިލުމުގެ ފުރުސަުތު އެޕާޓީއިން ހުޅުވާލައިފިއެވެ.
އެމްޑީޕީއިން ބުނީ މިހާރު ހިނގަމުންދާ ދައުރުގެ އެމްޑީޕީ ޗެއަރޕާސަންގެ ނައިބު އިދާރީ އަލީ ނިޔާޒާއި އަދި މާލީ އަހްމަދު އަބްދުﷲގެ މަގާމުގެ މުއްދަތު އަންނަ އޮކްޓޯބަރު މަހުގެ 25 ގައި ހަމަވާނެކަމަށެވެ. އެހެންކަމުން އެ މަގާމުތަކަށް ކުރިމަތިލުމަށް ވޭނުންވާ އެމްޑީޕީގެ މެމްބަރުންނަށް އެފުރުސަތު ހުޅުވާލައިފައިވާ ކަމަށެވެ.
އެމްޑީޕީގެ ޗެއަރޕާސަންގެ ނައިބު މާލީ އަދި އިދާރީ އިންތިހާބު އޮންނާނީ އަންނަ އޯގަސްޓް މަހުގެ 19 ވަނަ ދުވަހު އޮންނަ ކޮންގްރެސްގައި ކަމަށާއި ކޮންގްރެސްގައި ބައިވެރިވާ ބޭފުޅުންނަށް ވޯޓްލެވޭނެ ކަމުގައި އެޕާޓީން ބުނެފައިވެއެވެ.
ޗެއަރޕާސަންގެ ނައިބު މާލީ އަދި އިދާރީ މަގާމަށް ކުރިމަތިލާ ފަރާތްތަކުން ހުށައަޅަންޖެހޭ އެންމެހައި ލިޔެކިޔުންތަކާއެކު އޮންލައިން އެޕްލިކޭޝަން ފުރިހަމަކުރުމަށްފަހު މި ޖުލައި މަހުގެ 25 ވާ ހޯމަދުވަހުގެ މެންދުރު 12:00 ގެ ކުރިން އެމްޑީޕީ އޮފީހަށް ހުށައެޅުމަށް އެޕާޓީއިން ވަނީ އެދިފައެވެ.