ގިނަ އަދަދެއްގެ މީހުން، އަލަމްގީރުއާއިއެކު، ޖިންސީ ގުޅުން ހިންގާފައިވާކަމަށް ފުލުހުންގެ މުއައްސަސާއިން ހާމަކުރުމާއި ގުޅިގެން، ބަލި ބަލިން ރައްޔިތުން ރައްކައުތެރިކުރުމަށް، އަވަސް ހާލަތެއްގައި އެމެޖެންސީ ފިޔަވަޅުތަކެއް އަޅަންޖެހިފައިވާކަމަށް ރައްޔިތުންގެ މަޖިލީހުގެ ފޭދޫ ދާއިރާގެ މެމްބަރު މުހައްމަދު ނިހާދު ވިދާޅުވެއްޖެއެވެ.
މަޖިލީހުގެ ރައީސް މުހައްމަދު ނަޝީދުގެ ކޮށްކޮ، މަޝްހޫރު ލޯޔަރ ނާޒިމް ސައްތާރާއި، ނޮޅިވަރަން ދާއިރާގެ ކުރީގެ މެމްބަރު މުހައްމަދު ނަޝީދުކަމަށް ތުހުމުތު ކުރެވޭ ފަރާތްތަކެއް ހިމެނޭ ގޮތަށް 250 ފިރިހެނުންވަނީ، އަލަމްގީރުއާއި އެކު، ޖިންސީ ގުޅުން ހިންގާފައިވާކަމަށް، ފުލުހުންގެ މުއައްސަސާއިން ހާމަކުރުމާއިގުޅިގެން ކަންބޮޑުވުން ފާޅުކުރައްވާ، ނިހާދު ވިދާޅުވީ، އެ އަމަލުތައް ހިންގުމުގައި ބައިވެރިވެފައިވާ އެންމެހާ ފަރާތްތައް ނޭދެވޭ ޖިންސީ އަމަލުތަކުން ޖެހިގެންދާ ބަލިތަކަށް ސްކްރީން ކުރަންޖެހިފައިވާކަމަށެވެ.
އަލަމްގީރުއާއިއެކު، ގުޅުން ހިންގިކަމަށް ފުލުހުންގެ މުއައްސަސާއިން ހާމަކޮށްފައިވާ ފަރާތްތައް ހޯދައި، ބަލިތަކަށް ޓެސްޓުކުރަން ޖެހިފައިވާކަމަށް، ފާހަގަކުރައްވާ ނިހާދު ވިދާޅުވީ، 20 އަހަރު ކުރިން ދިވެހިރާއްޖޭގައި ތިބީ، އެއިޑްޖެހިފައިވާ 18 މީހެއްކަމަށެވެ. އެހެންނަމަވެސް މިވަގުތު ދިވެހިރާއްޖޭގައި “ހުރިހާ ވައްތަރެއްގެ” ޖިންސީ ގުޅުން ހިންގާ ފަރާތްތައް ގިނަވެފައިވާކަމަށް އިޝާރާތްކުރައްވާ، އެނާ ވަނީ، އެއިޑްސްގެ އިތުރުން ގޮތް ނޭގޭ އެތައް ބައްޔެއް ފެތުރިގޮސްފައިވާނެކަމަށް ފާހަގަކުރައްވާފައިއެވެ.
ދިވެހިރާއްޖޭގައި އެއްޖިންސުން ގުޅުން ހިންގުންފަދަ އަމަލުތައް ގިނަވެ، އެއިޑްސް އަދި، ގޮތް ނޭގޭ ގިނަ ބަލިތަކެއް ފެތުރިގޮސްފައިވާނެކަމަށް އަލި އަޅުވައި ވާހަކަދައްކަވަމުން، ނިހާދު ވިދާޅުވީ، ދިވެހިރާއްޖޭގެ ރައްޔިތުން، ގޮތް ނޭގޭ ބަލިތަކެއް ފެތުރިދާނެކަމުގެ ބިރުވެތިކަމުން ސަލާމަތް ކުރަންޖެހިފައިވާކަމަށެވެ. އެހެންކަމުން، އެކަމަށް ހައްލެއް ގެނައުމަށް އެމަރޖެންސީ ފިޔަވަޅުތަކެއް އަޅަން ޖެހިފައިވާކަމަށް ވިދާޅުވެ، އެނާ ވަނީ އެ ފިޔަވަޅުތައް އެޅުން އަވަސް ކުރުމަށް ގޮވާލާފައިއެވެ.
ދިވެހިރާއްޖޭގެ ބައެއް ރައްޔިތުން ހިންގަމުންދާ ދީނާއި ހިލާފު އަމަލުތަކެއްގެ ސަބަބުން، މުޖުތަމައުގެ ތެރޭގައި ގޮތް ނޭގޭ ބަލިތަކެއް ފެތުރިގޮސްފައިވާނެކަމަށް ނިހާދު ފާހަގަކުރެއްވިއިރު، ފުލުހުންގެ މުއައްސަސާއިންވަނީ، 250 ދިވެހި ފިރިހެނުން އަލަމްގީރުއާއިއެކު، ގުޅުން ހިންގާފައިވާކަން މީޑިއާތަކާއި ހިއްސާކޮށްފައިއެވެ. މިކަމާއި ގުޅިގެން ގިނަ އަދަދެއްގެ ދީނީ އިލްމުވެރިންނާއި، އާންމު ރައްޔިތުންވެސް އެފަދަ އަމަލުތައް ހިންގަމުންދާ ފަރާތްތައް ހައްޔަރުކޮށް، ބަލި ބައްޔަށް ޓެސްޓު ކުރުމަށްވެސް ގޮވާލަމުންދާކަން ފާހަގަކުރެވެއެވެ.