އެމްޑީޕީން ބައި އިލެކްޝަންތައް ކާމިޔާބު ކުރީ، ނުފޫޒު ފޯރުވައިގެން: ޝުޖާއު

އެމްޑީޕީން މ. ދިއްގަރު އަދި ތ. ގާއްދިފުށީގެ ކައުންސިލްތަކުގެ ބައި އިލެކްޝަން ކާމިޔާބު ކުރީ، އިންތިހާބަށް ނުފޫޒު ފޯރުވައިގެންކަމަށް ޕީއެންސީގެ ނައިބު ރައީސް އަދި ހުޅުމާލެ ދާއިރާގެ ކައުންސިލު މެމްބަރު އިބްރާހިމް ޝުޖާއު ވިދާޅުވެއްޖެއެވެ.

އެމްޑީޕީއާއި މެދު ދެކެވެމުންދާ ވާހަކަތަކާއި، އެޅެމުންދާ އިލްޒާމުތަކަކީ ސިޔާސީ ބޭނުމަކު ކުރާ މަސައްތްތަކެއް ކަމަށާއި، އެކަން ރައްޔިތުންނަށް ސާފުވެފައިވާކަމަށް ޔޫތު މިނިސްޓަރު އަހުމަދު މަހުލޫފު ވިދާޅުވުމާއި އެކު ރައްދު ދެއްވައި ޝުޖާއު ވިދާޅުވީ އެމްޑީޕީއަކީ “ލާދީނީ” ކަންކަމަށް ހިތްވަރުދޭ ޕާޓީއެއްކަމަށެވެ. އަދި އެކަން މިހާރު ރައްޔިތުންނަށް ކުލަ ވަމުންދާކަމަށްވެސް ޝުޖާއު ފާހަގަކުރެއްވިއެވެ.

އެމްޑީޕީއަކީ “ލަދެއް ހަޔާތެއް” ނެތް ބައެއް ކަމަށް ސިފަ ކުރައްވާ، ޝުޖާއު ވިދާޅުވީ، އެފަދަ ބަޔަކު މީހުންގެ ކުރިމަތީގައި ކިތަންމެ ބޮޑު ފާހިޝް އަމަލެއްވެސް ބޮޑުކަމަށްކަށް ނުވާނެކަމަށެވެ. އަދި އެމްޑީޕީންވަނީ ބައި އިލެކްޝަނެއް ކާމިޔާބު ކުރުމުގެ މަގުސަދުގައި 15 ސިޔާސީ ވަޒީފާ އުފައްދައި، އިންތިހާބަށް ނުފޫޒު ފޯރުވާފައިކަމަށްވެސް ޝުޖާއު ފާހަގަކުރެއްވިއެވެ. އަދި ދިއްގަރުން ފަރަގުކުރަން ބޭނުންވާ 150 ވޯޓު ފަރަގު ކުރެވުނުތޯވެސް ޝުޖާއު ސުވާލު ކުރެއްވިއެވެ.

ތިއީ ލާދީނީ ކަންކަމަށް ހިތްވަރުދޭ ޕާޓީއެއް ކަން ރައްޔިތުންގެ ކުރިމަތީ ދަނީ ފެންނަމުން.ލަދެއް ހަޔާތެއް ނެތް ބައެއްގެ ކުރިމަތީ ކިތައްމެ ބޮޑު ފާހިޝް އަމަލެއްވެސް މާބޮޑުކަމަކަށް ވާނެބާ؟އިންތިޚާބަށް 2 ދުވަސްތެރޭ 15 ސިޔާސީ ވަޒީފާ އުފައްދައި،އިންތިޚާބަށް ނުފޫޒު ފޯރުވައިގެންވެސް 1/2 https://t.co/qHGYHEk67L

— Ibrahim Shujau (@IbrahimShujaau) August 13, 2022

ދިއްގަރުން ފަރަގު ކުރަން ބޭނުންވި 150 ވޯޓް ފަރަގު ކުރެވުނުބާ؟ގާދިއްފުށި ލިބުނީ ހަމަ ކިރިޔާ.ނަތީޖާއިން މޮޅުވި ނަމަވެސް މާޒީގެ ތަފާސް އަށް ބަލާއިރު ލާދީނީ ކަމާއި،ފާހިޝް އަމަލުތަކަށް ތިޔަ ފާޓީން ދިން ތަރުހީބުން ރައްޔިތުންގެ ތާއީދު ދިޔައީ ދަށަށް.2/2

— Ibrahim Shujau (@IbrahimShujaau) August 13, 2022

ގާދިއްފުށީގެ ބައި އިލެކްޝަން އެމްޑީޕީއަށް ކާމިޔާބު ކުރެވުނީ ކުޑަ ތަފާތަކުން ކަަމަށް ފާހަގަކުރައްވާ ޝުޖާއު ވިދާޅުވީ، އެމްޑީޕީ އަށް ވޭތުވެދިޔަ ބައި އިލެކްޝަނުން މޮޅުވެވުނު ނަމަވެސް، މާޒީގެ ތަފާސް ހިސާބުތަކަށް ބަލާއިރު، ލާދީނީ ކަމާއި، ފާހިޝް އަމަލުތަކަށް އެމްޑީޕީން ދެމުންދާ ތަރުހީބުގެ ސަބަބުން، ރައްޔިތުން ޕާޓީއަށް ކުރަމުންދާ ތާއީދު ގެއްލިގޮސްފައިވާކަމަށެވެ.

އެމްޑީޕީން ކައުންސިލުތަކުގެ ބައި އިލެކްޝަންސް ކާމިޔާބު ކުރުމާއި އެކު، އެ އިލެކްޝަން ކާމިޔާބު ކުރުމަށް، 15 ސިޔާސީ ވަޒީފާ އުފައްދާފައިވާކަމަށް ޝުޖާއު ވިދާޅުވެފައިވާއިރު، ރައީސުލްޖުމުހޫރިއްޔާ އިބްރާހިމް މުހައްމަދު ސާލިހުވަނީ ދިވެހިރާއްޖޭގެ މާލީ ހާލަތު ހުރި ގޮތުން، އިތުރު ސިޔާސީ މަގާމުތަކެއް ނުއުފައްދަވާނެކަމަށް ވިދާޅުވެފައިއެވެ.