ރައީސުލްޖުމުހޫރިއްޔާ އިބްރާހިމް މުހައްމަދު ސާލިހުގެ ސަރުކާރުން އިއުލާނުކޮށްފައިވާ ބޯހިޔާވަހިކަމުގެ މަޝްރޫޢުއާއި މެދު އަލުން ވިސްނުމަށް ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު އަލީ ހުސައިން ވިދާޅުވެއްޖެ އެވެ.
ސަރުކާރުގެ ބޯހިޔާވަހިކަމުގެ މަޝްރޫއުގެ ދަށުން މާލެއިން ގޯތިދިނުމަށް ނިންމާފައި ވަނީ މާލޭގެ ރަށްވެހިންނަށް ކަމަށާއި، ރާއްޖޭގެ އެހެން ރަށަކަށް ރަޖިސްޓްރީވުމަށްފަހު މާލެ ހިޖުރަކޮށް، ދަފްތަރުގައި ޖެހިފައިވާ ފަރާތަކަށް އެ މަޝްރޫޢުގެ ދަށުން ގޯތި ދިނުމެއް ނެތްކަމަށް، ހައުސިންގް މިނިސްޓަރު މުހައްމަދު އަސްލަމް ވިދާޅުވުމާއި ގުޅިގެން، އަލީ ހުސައިންވަނީ، އެ މަޝްރޫއުއާއިމެދު، ސަރުކާރުން އަލުން ފުންކޮށް ވިސްނާލުމަށް ގޮވާލާފައެވެ.
އަދިވެސް ސަރުކާރުން މިކަމާމެދު ފުންކޮށް ވިސްނުމަށް ގޮވާލަން. ޤާނޫނު އަސާސީއާ ޚިލާފަށް މިވަރުގެ ނާތަހުޒީބު ސިޔާސަތެއް ތަންފީޒުކުރަން އުޅުމަކީ ވަރަށް ލަދުވެތި ކަމެއް. އަދިވެސް ވިސްނަވާ https://t.co/RX6NYFOU5E
— Ali Hussain (@AleeVoice) August 18, 2022
އަލީ ހުސައިން ވިދާޅުވީ، ރައީސް ސާލިހުގެ ގޯތި ގެދޮރު ދިނުމުގެ ސިޔާސަތަށް ދިވެހިރާއްޖޭގެ ގާނޫނު އަސާސީ ތަން ނުދޭކަމަށެވެ. އަދި ގާނޫނު އަސާސީއާއި ހިލާފަށް ނާތަހުޒީބު ސިޔާސަތެއް ތަންފީޒު ކުރުމަށް އުޅުމަކީ އިންތިހާއަށް ލަދުވެތިކަމެއް ކަމަށްވެސް އެނާ ފާހަގަކުރެއްވިއެވެ.
މިނިސްޓަރު އަސްލަމް ވިދާޅުވެފައިވާގޮތުން، ރައީސް ސާލިހުގެ ބޯހިޔާވަހިކަމުގެ މަޝްރޫޢު އިއުލާނު ކުރެވިފައިވާގޮތަށް އިތުރު ބަދަލެއް ގެނެވިފައިނުވެއެވެ.