ޖިންސީގޯނާގެ ތުހުމަތު ކުރެވުނު ޓީޗަރަށް އަނިޔާކުރި މައްސަލާގައި މީހަކު ހައްޔަރުކޮށްފި!

ޓިއުޝަން ނަގާދޭން ގެއަށް ދިޔުމަށްފަހު ފިރިހެން ކުއްޖަކަށް ޖިންސީގޯނާ ކޮށްފައިވާ ކަމުގެ ތުހުމަތުކުރެވިފައިވާ ޓީޗަރަށް އަނިޔާކުރި މައްސަލާގައި މީހަކު ހައްޔަރުކޮށްފިއެވެ.

”ސަންގު” އަށް މައުލޫމާތު ދެއްވަމުން ފުލުހުންގެ މީޑިއާ އޮފިޝަލް ވިދާޅުވީ މިދިޔަ މަހު 23 ވަނަ ދުވަހު ހުޅުމާލޭ ދެވަނަ ފިޔަވަހީގައި ޖިންޖީ ގޯނާގެ ތުހުމަތުވާ ޓީޗަރަށް އަނިޔާކުރި މައްސަލައިގެ ތުހުމަތުގައި ހައްޔަރުކޮށްފައި ވަނީ އުމުރުން 36 އަހަރުގެ ދިވެހި ފިރިހެނެކެވެ.

މި މީހާ ހައްޔަރުކުރެވިފައިވަނީ ކޯޓު އަމުރެއްގެ ދަށުން އިއްޔެގެ ވަގުތެއްގައެވެ. މި މައްސަލައާއި ގުޅިގެން އިތުރު މައުލޫމާތެއް ފުލުހުން ހިއްސާކޮށްފައެއް ނުވެއެވެ. އެހެންނަމަވެސް، މައްސަލަ އިތުރަށް ތަހުޤީގުކުރަމުންދާކަމަށް ފުލުހުން ވަނީ މައުލޫމާތު ދީފައެވެ.

ޓިއުޝަނަށް ކިޔަވަން ދިޔަ ފިރިހެން ކުއްޖަކާ ބެހުނު ކަމުގެ ތުހުމަތުކުރާ އުމުރުން 29 އަހަރުގެ އެ ޓީޗަރު ހިފަހައްޓައި އަނިކުރާ މަންޒަރު ދައްކުވައިދޭ ވީޑިއޯއެއް މިދިޔަ މަހު 24 ވަނަ ދުވަހުގެ ރޭ ދައުރުވެފައިވާއިރު އެ ރޭ ފުލުހުން ވަނީ އެ ފިރިހެން ޓީޗަރު ހައްޔަރުކޮށްފައެވެ.

ހުޅުމާލޭ ދެވަނަ ފިޔަވަހީގައި އެ ޓީޗަރު ހިފެހެއްޓުމަށް ފަހު އަނިޔާދިން އިރުވެސް ، އޭނާ ހުރީ އެ މައްސަލާގައި ކުރެވޭ ތުހުމަތުތަކާ ގުޅިގެން ސަސްޕެންޑް ކޮށްފައިކަމަށްވެސް އެޑިއުކޭޝަން މިނިސްޓްރީން ބުންޏެވެ.