ރައީސުލްޖުމްހޫރީއްޔާ އިބްރާހިމް މުހައްމަދު ސާލިޙްގެ ސަރުކާރުން މަސްވެރިންގެ ހައްގުތަކަށް އަރައިގެނެފައިވާ ކަމަށް ބުނެ މަސްވެރިންގެ ހައްގުތައް ހޯދައިދިނުމަށް އިދިކޮޅު ޕީޕީއެމް، ޕީއެންސީ ކޯޅިޝަންގެ ފަރާތުން މަސް މާރުކޭޓު ސަރަހައްދަށް އެއވާން ނިންމައިފިއެވެ.
އިދިކޮޅު ކޯލިޝަންގެ ފަރާތުން ބޭއްވި ނޫސްވެރިންގެ ބައްދަލުވުމުގައި އެ ކޯލިޝަންގެ ހަރަކާތް ކޮމެޓީގެ މުގައްރިއު އަދި ހޯރަފުށީ ދާއިރާގެ ކުރީގެ މެމްބަރު މުހައްމަދު އިސްމާއީލް ވިދާޅުވީ މަސްވެރިންގެ ހައްގުތައް ހޯދައި ދިނުމަށް އިދިކޮޅު ކޯލިޝަނުން ކުރަމުންދާ މަސައްޖަތްތަކުގެ ދަށުން މާދަމާ ހަވީރު މަސް މާރުކޭޓު ސަރަހައްދަށް އެއްވުމަށް ނިންމާފައިވާ ކަމަށެވެ.
މުހައްމަދު އިސްމާއީލް ވިދާޅުވީ ރައީސް ސާލިޙްގެ ސަރުކާރުން މަސްވެރިންނަށް އެތައް ވަޢުދުތަކެއް ވެފައިވާ ކަމަށާއި ނަމަވެސް މިއަދާއި ހަމައަށް އެއްވެސް ވަޢުދެއް ފުއްދާދެވިފައި ނުވާ ކަމަށެވެ. އެގޮތުން މަސްވެރިންނަށް ހަމަ އަގު ހޯދައި ދިނުމާއި މި ނޫން ވެސް އެތައް ބޮޑެތި ވަޢުދުތަކެއް ވީނަމަވެސް އެއިން އެއްވެސް ކަމެއް ކޮށްދެވިފައި ނުވާ ކަމަށް އޭނާ ވިދާޅުވިއެވެ.
