އިންގިރޭސި ބޮޑުވަޒީރު ލިސް ޓްރަސް އިސްތިއުފާ ދެއްވި އުސޫލުގެ މަތިން، ރައީސުލްޖުމުހޫރިއްޔާ އިބްރާހިމް މުހައްމަދު ސާލިހުވެސް އިސްތިއުފާދެއްވަންވީކަމަށް ކުރީގެ ކޮމިއުނިކޭޝަންސް މިނިސްޓަރު މުހައްމަދު މަލީހު ޖަމާލް ވިދާޅުވެއްޖެއެވެ.
ރައީސް ސާލިހުގެ ވެރިކަމުގައި ކޮމިއުނިކޭޝަންސް މިނިސްޓަރުގެ މަގާމު އަދާކުރައްވާފައިވާ މަލީހު ވިދާޅުވީ، އިންގިރޭސި ވިލާތުގެ އަލަށް އައްޔަނު ކުރެވުނު ބޮޑު ވަޒީރު ލިޒް ޓްރަސް އިސްތިއުފާ ދެއްވި، އެނާގެ ކިބައިގައި އެ މަގާމު އަދާކުރެއްވުމުގެ ”ފެންވަރު“ ނެތުމުންކަމަށެވެ. އަދި ކުރީގެ ރައީސް މުހައްމަދު ނަޝީދުވެސް ވެރިކަމުން އިސްތިއުފާދެއްވީ، އެ މަގާމު އަދާކުރެއްވުމުގެ ގާބިލުކަން ނެތުމުންކަމަށް އެނާ ސިފަކުރެއްވިއެވެ.
ޕްރައިމް މިނިސްޓަރކަން ކުރެވޭހާ ފެންވަރު ނެތީމަ ހޮވުނަސް ލިޒް ޓްރަސްވެސް އިސްތިއުފާ އެދެއްވީ. ނުވެގެން ރައީސް ނަޝީދުވެސް 2012ގައި އިސްތިއުފާދެއްވީ. ރައީސް އިބޫ ވާނުވާގައި ވެރިކަން ކުރާތާ 4 އަހަރު ވީ. ނުވީމާ ރ.އިބޫވެސް އިގިރޭސިވިލާތުން މިސާލު ނަގައިގެން އިސްތިފާ ދިނުން މޮޅު.
— Mohamed Maleeh Jamal (@maleehjamal) October 20, 2022
މަލީހު ވިދާޅުވީ، ރައީސް ސާލިހު ކުރައްވަނީ ވާނުވާ ވެރިކަމެއް ކަމަށެވެ. އަދި އެފަދަ އުސޫލެއްގެ ދަށުން ވެރިކަން ކުރަމުންދާތާ 4 އަހަރު ވެގެންގޮސްފައިވާކަމަށާއި، އެ މަނިކުފާނަށް ރަނގަޅު އުސޫލެއްގެ ދަށުން ވެރިކަން ނުކުރެއްވޭ ނަމަ، އިންގިރޭސި ވިލާތުގެ ބޮޑުވަޒީރު ކަން ކުރެއްވި ގޮތުން މިސާލު ނަންގަވައި، އިސްތިއުފާދެއްވުން މޮޅު ކަމަށް އެނާ ވިދާޅުވިއެވެ.
ސައިބާ ކްރައިމްސް ރާއްޖޭގައި ރެކޯޑް އަދަދަކަށް އިތުރުވެއްޖެ. ފޫނުބެއްދޭ ވަރު ގެއްލުން ގިނަ ރައްޔިތުންތަކަކަށް ދަނީ ވަމުން. މިކަމާއި އަޅާލާނެ ސަރުކާރުގެ އިދާރާއެއް ނުފެނޭ.ރައީސް އިބޫގެ ސަރުކާރަށް ކުނި މުހިންމު ވެއްޖެ ޓެކްނޯލޮޖީއަށް ވުރެ.މިއީ ތަރަހައިން ކައްސާލާފައިވާ ސަރުކާރެއް.
— Mohamed Maleeh Jamal (@maleehjamal) October 19, 2022
މިފަހަކަށް އައިސް ރައީސް ސާލިހު އަދި ސަރުކާރަށް ގިނަ ފާޑުކިޔުންތައް އަމާޒު ކުރައްވާފައިވާ މަލީހުވަނީ އިތުރު ކަންކަންވެސް ފާހަގަކުރައްވާފައެވެ. ރާއްޖޭގެ ރައްޔިތުންގެ ބެންކުން އެކައުންޓުން ފައިސާ ގެއްލުން ފަދަ ކަންކަން ވަމުންދާކަމަށް އިޝާރާތްކުރައްވާ މަލީހުވަނީ، ރާއްޖޭގައި ސައިބަރ ކްރައިމްސް ރެކޯޑު އަދަދަކަށް އިތުރުވެފައިވާކަމަށް ވިދާޅުވެފައެވެ.
އެނާ ވިދާޅުވީ، ސައިބަރ ކްރައިމްސްގެ ސަބަބުން ރައްޔިތުންނަށް ފޫނުބެދޭ ވަރުގެ ގެއްލުންތައް ލިބެމުންދާކަމަށެވެ. އަދި އެކަމާއި އަޅާލާނެ ސަރުކާރުގެ އިދާރާއެއް ނެތްކަމަށާއި، ރައީސް ސާލިހުގެ ސަރުކާރަށް ޒަމާނީ ވަސީލަތްތަކަށްވުރެ މުހިންމުވެފައިވަނީ ކުނި ކަމަށް ފާހަގަކުރައްވާ އެނާ ވަނީ މި ސަރުކާރު ”ތަރަހައިން ކައްސާލާފައިވާ“ ކަމަށް ވިދާޅުވެފައެވެ.
