ރައީސުލްޖުމުހޫރިއްޔާ އިބްރާހިމް މުހައްމަދު ސާލިހުގެ ސަރުކާރު އޮތީ ވެންޓިލޭޓަރެއްގައިކަމަށް ޕީއެންސީގެ ނައިބު ރައީސް އިބްރާހިމް ޝުޖާއު ވިދާޅުވެއްޖެ އެވެ.
ފުލުހުންގެ ބެލުމުގެ ދަށުގައި ހުރި ދިވެއްސަކު ނިޔާވުމާއި ގުޅިގެން އިންސާފު ގާއިމުކޮށްދިނުމަށް ގޮވާލައި އިދިކޮޅުން އިންތިޒާމު ކޮށްގެން ކުރިއަށް ގެންދިޔަ ސުލްހަވެރި އެއްވުމެއް ހުއްޓުވުމުގެ ތެރެއިން އެއްވުމުގެ ބައިވެރިންތަކެއް ހައްޔަރުކޮށްފައިވާކަމަށް އިޝާރާތްކުރައްވާ ޝުޖާއު ވިދާޅުވީ، ރައީސް ސާލިހުގެ ސަރުކާރުންވަނީ ރާއްޖެ “ތާހަކަށް ލާ ތެލުލާފައި” ކަމަށެވެ.
ޝުޖާއު ވިދާޅުވީ، ގައުމު ވިއްކާލުމުން ރައްޔިތުން އެ ވާހަކަތައް ދައްކާނެކަމަށެވެ. އަދި ސަރުކާރުން ޖެހޭނީ ހަޖަމް ކުރަންކަމަށް ވިދާޅުވި އެވެ.
ޤައުމު ތާހަކަށްލާ ތެލުލާފަ ވިއްކާލީމަ ރައްޔިތުން އެވާހަކަ ދައްކާނެ.ސަރުކާރުން ޖެހޭނީ ހަޖަމު ކުރަން.ޑިމޮކްރަސީގެ އައްޕަ ހެދިންގެ އުޅުނު މީހުން މިއުޅެނީ ހާދަ ލަދުކުޑަކޮށޭ ދޯ؟ސަރުކާރު އޮތީ ވެންޓިލޭޓަރުގަކަން އެންމެނަށް އެބަ އެގޭ.ޤާނޫނާ ހިލާފަށް ހައްޔަރު ކުރި އެންމެން ދޫކޮށްލާ! pic.twitter.com/TLWctp2rgY
— Ibrahim Shujau (@IbrahimShujaau) October 28, 2022
ޝުޖާއު ވިދާޅުވީ، ޑިމޮކްރެސީގެ ބައްޕަ ކަމަށް ދައުވާ ކުރި ފަރާތްތަކުގެ ކިބައިން މިއަދު ފެންނަމުންދަނީ “ލަދު ކުޑަ” މަންޒަރެއްކަމަށެވެ. އަދި ސަރުކާރު އޮތީ ވެންޓިލޭޓަރެއްގައިކަން އެންމެހާ ރައްޔިތުންނަށްވެސް އިނގޭކަމަށާއި، އެއްވުމުގެ ތެރެއިން ހައްޔަރު ކުރި ފަރާތްތައް ހައްޔަރުކޮށްފައިވަނީ ގާނޫނާއި ހިލަފަށް ކަމަށް ފާހަގަކުރައްވާ އެނާ ވަނީ އެ ފަރާތްތައް ދޫކޮށްލުމަށްވެސް ގޮވާލާފައެވެ.