ރާއްޖޭގެ ފަރާތުން ބައިނަލްއަގްވާމީ ކޯޓުތަކަށް ޗާގޮސްގެ މައްސަލަ ހުށައެޅިނަމަ މޮރިޝަސް އެކޭ އެއްގޮތަށް ރާއްޖެއިންވެސް ހެއްކާއި ގަރީނާ ހުށައަޅައިގެން ޗާގޮސް ހޯދުމުގެ ފުރުސަތު އޮތީސް ކަމަށް މަރަދޫ ދާއިރާގެ މެމްބަރު އިބްރާހިމް ޝަރީފް ވިދާޅުވެއްޖެއެވެ.
ޝަރީފް ވިދާޅުވީ ޗާގޮސްގެ މައްސަލައިގައި ދަނގެތި ދާއިރާގެ މެމްބަރު މުހައްމަދު ނާޒިމް ހުށައެޅުއްވި ގަރާރުގައި ހަގީގަތާއި ހިލާފު ވަރަށްގިނަ ވާހަކަތައް އެކުލެވޭ ކަމަށާއި އެކަމާ ހިތާމަ ކުރާ ކަމަށެވެ.
ދިވެހި ސަރުކާރުން ރާއްޖޭގެ ކަނޑުން އަކަ އިންޗިއެއްވެސް ގެއްލޭ ކަހަލަ އަމަލެއް މިހާހިސާބަށް ކޮށްފައިނުވާކަން ޝަރީފް ފާހަގަ ކުރެއްވިއެވެ.
ފޯޅަވައްސަކީ ދިވެހިރާއްޖޭގެ ސަރަހައްދުކަމަށް ވިދާޅުވާ ބޭފުޅުން ޑިފެންސް މިނިސްޓަރު ކަމުގައާއި ބަންޑާރަ ނައިބު ކަމުގައި ތިބެގެން ވޭތުވެދިޔަ 30 އަހަރު މޮރިޝަސް އިން ޗާގޮސް އަކީ މޮރިޝަސްގެ ސިޔާދަތީ ބާރު ހިނގާތަނެއްކަމަށް ދުނިޔޭގެ ހުރިހާ ކޯޓެއްގައި ދައުވާ ކުރިއިރުގައި އަޅާނުލާތިބީ ކަމަށެވެ. އަދި އެކަމުގެ ސަބަބުން އެބޭފުޅުންވަނީ ގައުމަށް ހިޔާނާތްތެރިވެފައި ކަމަށް ޝަރީފް ވިދާޅުވިއެވެ.
ދަނގެތި ދާއިރާގެ މެމްބަރާއި މަޑުއްވަރީ ދާއިރާގެ މެމްބަރު އާދަމް ޝަރީފްގެ ޑިފެންސް މިނިސްޓަރު ކަމުގައި މޮރިޝަސް މީހުން ޗާގޮސްގައި މޮރިޝަސްގެ ދިދަ ޖެހިއިރު އަޅާނުލާ ތިބިކަމަށް ޝަރީފް ވިދާޅުވިއެވެ.
އިއްޒަތްތެރި ރައީސް. މިކަމާ ދައުވާ ކުރައްވާ ކުރީގެ ރައީސުންވެސް މިކަމާ އަޅާނުލައްވާ ދުނިޔޭގެ އެއްވެސް ކޯޓަކަށް ފޯޅަވައްސަކީ ދުނިޔޭގެ އެއްވެސް ކޯޓަކަށް ދިވެހިރާއްޖޭގެ ތަނެއް ކަމަށް ބުނެ އެއްވެސް މައްސަލައެއް ހުށައަޅާފައެއް ނެތް. އަދި ކީއްކުރަންތޯ ދިވެހިރާއްޖޭގެ ސަރަހައްދުން ދިވެހިރާއްޖެއަށް ހައްގުވާ 200 ނޯޓިކަލް މޭލު ރާއްޖޭގެ ބޭސްލައިނުން ހޯދުމަށްވެސް ދުނިޔޭގެ އެއްވެސް ކޯޓަކަށް ގޮސްފައެއް ނުވޭ. އެހެންނަމަވެސް މިއަދު 30 އަހަރު 40 އަހަރު ވަންދެން ދިވެހިރާއްޖޭގެ ވެރިކަން ކުރި ބޭފުޅުންނާއި ބަންޑާރަނައިބު ކަން ކުރި ބޭފުޅުން އިހުމާލު ވެފައި އޮވެ ދިވެހިރާއްޖޭގެ ސަރަހައްދު އެއްކޮށް ކަނޑުގެ ސަރަހައްދު ގެއްލޭ ހިސާބަށް ގޮސް، މޮރިޝަސްއިން އިޓްލޮސްގައި ދައުވާކޮށް އެއޮތީ ކޭސް ނަމްބަރު 28. ދައުވާ ކުރީމާ މިއަދުގެ ސަރުކާރު ތިމަންމެންގެ ހައްގެއް ވެއޭ، ތިމަންމެންގެ ބިމުން އަކަ އިންޗިއެއްވެސް ދޫކުރަން ބޭނުމެއް ނުވޭ. ތިޔަވިދާޅުވާ ޓެރޯސް މިންހޯސް ރީފުންނޭ ބޭސްލައިން ކަނޑައަޅަން ކިޔާފަ ދައުވާ ހުށައަޅާފައި މެމޯރިއަލް އެއް އެއޮތީ އިހްތިޖާޖު ކޮށް ހުށައަޅާފަ. ދިވެހިރާއްޖޭގެ ހައްގު ހޯދުމަށް ކޭސް ނަމްބަރު 28 އެއޮތީ އިޓްލޮސްގެ ވެބްސައިޓްގައި ފެންނަން އިއްޒަތްތެރި ރައީސް.
ޝަރީފް ވިދާޅުވީ އެއްވެސް ބަންޑާރަ ނައިބަކު އަދި އެއްވެސް ރައީސަކު އަދި ސަރުކާރުގެ ދައުލަތުގެ އެއްވެސް މީހަކު ވޭތުވެދިޔަ 30 އަހަރު ޗާގޮސްގެ މައްސަލައިގައި ބައިނަލް އަގްވާމީ ކޯޓަށް މައްސަލައެއް ހުށައަޅާފައިނުވާ ކަމަށެވެ.
އެހެންކަމުން ޗާގޮސްގެ މައްސަލަ މަޖިލީހަށް ހުށައަޅައިގެން އުޅެނީ ސިޔާސީ ބޭނުމަކު ރައްޔިތުންނަށް އޮޅުވާލުމަށް ކަމަށް ޝަރީފް ވިދާޅުވިއެވެ.
ޝަރީފް ވިދާޅުވީ ޗާގޮސް އަކީ މޮރިޝަސްގެ ސިޔާދަތީ ބާރު ހިނގާ ތަނެއް ކަމަށް އިންޓަރނޭޝަނަލް ކޯޓް އޮފް ޖަސްޓިސް ކުރި ހުކުމަށް ޔުނައިޓެޑް ނޭޝަންސްގައި 116 ގައުމުން ވޯޓް ދީފައިވާ ކަމަށެވެ. އަދި އިޓްލޮސް އިން އެމައްސަލައިގައި އިން ބެހޭނެ ކަމަށް ނިންމާފައިވާ ކަމަށް ޝަރީފް ވިދާޅުވިއެވެ.
ޝަރީފް ވިދާޅުވީ ޗާގޮސްގެ މައްސަލައިގައި ދިވެހި ސަރުކާރުގެ ސިޔާސަތު ބަދަލުވާކަމަށެވެ.
ޗާގޮސްގެ މައްސަލައިގައި ރާއްޖޭގެ ސްޓޭންޑް ބަދަލުވިކަމަށް ހަދާ ރައްޔިތުންނަށް އޮޅުވާލަމުންދާ ކަމަށް ޝަރީފް ވިދާޅުވިއެވެ.
