ދިވެހިރާއްޖޭގެ އިގްތިސާދީ ސިނާއަތަަށް ބޭރު ގައުމުތަކުގެ ވިޔަފާރިވެރިން އަތް ގަދަ ކުރުމަށް ދޫކޮށްލާފައިވާ މަންޒަރު ފެންނަމުންދާކަމަށް މަޖިލީހުގެ ކެންދޫ ދާއިރާގެ މެމްބަރު އަލީ ހުސައިން ވިދާޅުވެއްޖެއެވެ.
ސަރުކާރުގެ ހިންގުންތެރިކަމެއް ނެތްކަމަށް ބުނެ ދާދި ފަހުން އަލީ ހުސައިން ވަނީ މަޖިލީހުގައި ރައީސް ސާލިހުގެ ސަރުކާރަށް ފާޑުވިދާޅުވެފައެވެ. ދިވެހިރާއްޖޭގައި ގިނަ އަދަދެއްގެ ހޯލްސޭލް އަދި ރީޓެއިލް ވިޔަފާރިތައްވެސް ބިދޭސީން ހިންގަމުންދާކަމަށް ބުނެ އާންމުންގެ ތެރޭގައި ވާހަކަތައް ދެކެވެމުންދާއިރު، އަލީ ހުސައިން ވިދާޅުވީ، ހުރިހާ ދިމާލަކުންވެސް ފެނިގެންދަނީ ރާއްޖޭގައި ބިދޭސީން އަތް ގަދަ ކުރަމުންދާ މަންޒަރުކަމަށެވެ.
ހުރިހައި ދިމާލަކުންވެސް ފެންނަނީ ބިދޭސީން ރާއްޖެއަށް އަތްގަދަ ކުރަން ދޫކޮށްލާފައިވާ މަންޒަރު. ތިލަފުށިން ފެށިގެން ކަނޑުއަޑީގެ ޗާޓަށް ބެލީމާވެސް ފެންނަނީ އެ މަންޒަރު. އުތުރު ތިލަފަޅެއް ހަނިމާދޫއެއް ކިޔާނެ ކަމެއްނެތް. https://t.co/iOpsgEzjJv
— Ali Hussain (@AleeVoice) February 9, 2023
އެނާ ވިދާޅުވީ، ތިލަފުށިން ފެށިގެން ރާއްޖޭގެ ކަނޑުއަޑީގެ ޗާޓަށް ބަލާލުމުންވެސް ފެންނަނީ އެ މަންޒަރުކަމަށެވެ. އެހެންކަމުން އުތުރު ތިލަފަޅާއި ހަނިމާދޫގެ ވާހަކަތައް ދެއްކުމުގެ ބޭނުންތެރިކަމެއްވެސް ނެތްކަމަށް އެނާ ވިދާޅުވިއެވެ.
އަލީ ހުސައިންގެ ކަންބޮޑުވުންތައް ހިއްސާކޮށްފައިވާއިރު، ތިލަފުށިން ހިއްކާ ބިމުން ޕްލޮޓުތަކެއް ބީލަމުގެ އުސޫލުން ވިއްކުމަށްވަނީ އިއުލާނުކޮށްފައެވެ. ވިއްކަން ހުޅުވާލާފައިވަނީ ބޭރުގެ ކުންފުނިތަކަށްވެސް އެ ބިން ގަތުމަށް ހުށައެޅޭނެ އުސޫލެއްގެ ދަށުންނެވެ.