އަމީނީ މަގު ހަނި ކުރާތީ މުއިއްޒުގެ ކަންބޮޑުވުން؛ މިއީ ޓްރެފިކަށް ކުރިމަތި ވާނެ ދާއިމީ ދަތިކަމެއް

ސަރުކާރުން މާލޭގެ އަމީނީ މަގު ތަރައްގީ ކުރުމަށް ހިންގާ ޕްރޮޖެކްޓުގެ ދަށުން، އެ މަގުގެ ފުޅާ މިން ހަނި ކުރާތީ މާލޭގެ މޭޔަރު އަދި ކުރީގެ ހައުސިން މިނިސްޓަރު ޑރ. މުހައްމަދު މުއިއްޒު ކަންބޮޑުވުން ފާޅުކުރައްވައިފި އެވެ.

އިދިކޮޅު ޕީޕީއެމްގެ ނައިބު ރައީސްކަން ވެސް ކުރައްވާ މުއިއްޒު ވަނީ، އަމީނީ މަގު ހެދުމުގެ ސެގްމެންޓު ކުރިޔަށް ގެންދިއުމުގައި ސަރުކާރުން ފަރުވާކުޑަ ކުރާކަމަށް ބުނެ މީގެ ކުރިން ވެސް ނުރުހުން ފާޅުކުރައްވާފަ އެވެ. މަގު ނުހެދި، ދިގުލައިގެން ދިއުމުގެ ސަބަބުން އެ މަގުގައި ހުންނަ ގެތަކުގައި ދިރިއުޅޭ ރައްޔިތުންނަށް ގިނަ ދަތިތަކާއި ކުރިމަތިލާން ޖެހޭއިރު މިހާތަނަށް ކޮނެފައި ހުރި ހިސާބުގައި ސްކޫލެއް ވެސް ހުރުމާއި އެކު ބެލެނިވެރިންނާއި ދަރިވަރުން ސްކޫލަށް އައުމުގައި ދަތިތަކާއި ކުރިމަތިލާން ޖެހޭކަން މުއިއްޒު ފާހަގަ ކުރައްވަ އެވެ.

އަމީނީ މަގު ތަރައްގީ ކުރުމުގެ ޕްރޮޖެކްޓުގެ ދަށުން އެ މަގުގެ ފުޅާ މިން ތިން ފޫޓަށް ހަނި ކުރުމަށް ނިންމާފައިވާ ނިންމުމަށް ފާޑުވިދާޅުވެ މުއިއްޒު ވިދާޅުވީ އޭގެ ސަބަބުން ޕަބްލިކް ޓްރާންސްޕޯޓު ބަސްތަކަށް ދަތިތައް ދިމާވާނެ ކަމަށެވެ. އަދި މިއީ ދެފަޅިއަށް ދުއްވާ މަގަކަށް ވުމާއި މާލޭގައި އެންމެ ޓްރެފިކް ބާރު ބޮޑު އެއްމަގަށް ވުމާއި އެކު ދާއިމީ ގެއްލުންތަކެއް ނިކުންނާނެކަމަށް މުއިއްޒު ވިދާޅުވ އެވެ.

ރޯޑް ޑެވެލޮޕްމަންޓް ކޯޕަރޭޝަން (އާރުޑީސީ) އިން ކުރިޔަށް ގެންދާ މަޝްރޫއުގެ ދަށުން ކުރިން 25 ފޫޓުގެ ފުޅާ މިން ހުރި އަމީނީ މަގުގެ ބައެއް ޕޭވްމަންޓަށް ވަނީ އިތުރުކޮށްފަ އެވެ. އެއީ ކުރިން ހަތަރު ފޫޓު ހުރި ޕޭވްމަންޓު ދެފަޅިން ވެސް ފަސް ފޫޓު ހަތް އިންޗިއަށް ބަދަލު ކުރުމެވެ. އެހެންވެ، މަގުގައި ހުންނާނީ ދެން 21 ފޫޓު 10 އިންޗި އެވެ.

Ameenee Magu ge masakkai inthihaa ah las koh, adhi ehaame agubodu koh (39m in 84m ah), hadhamun dhaa iru, magu ge fulhaaminun 3 ft 2 inch hanikoh hadhaa hedhumah adhives evves badhaleh nugenaumakee public transport bus thah adhi 2 way traffic ah kurimathivaa dhaaimee dhathikameh. https://t.co/3hlOZN6SAF

— Dr Mohamed Muizzu (@MMuizzu) February 10, 2023

ކުރިން 39 މިލިއަން ރުފިޔާގައި ހުރި މަޝްރޫއެއް، 84 މިލިއަނަށް ބޮޑުކޮށް ކުރިޔަށް ގެންދާ މަސައްކަތުން އެދެވޭ ނަތީޖާއެއް ނުނިކުންނާނެކަމަށް ތަކުރާރު ކުރައްވައި މުއިއްޒު ވިދާޅުވީ ބިމުގެ އަޑިއަށް ލުމަށް ކުރިން ނިންމާފައިވާ ކޭބަލް ޓްރޭ މިހާރު ފެންނަނީ ބިމުން މަތީގައި ހަދަމުން ދާ މަންޒަރު ކަމަށެވެ.

ރައްޔިތުންގެ މަޖިލީހުގައި ދާދިފަހުން ޕްލޭނިން މިނިސްޓަރު މުހައްމަދު އަސްލަމް ވިދާޅުވީ، އަމީނީ މަގުގެ މަސައްކަތް ނިމޭނެކަމަށް ލަފާ ކުރެވެނީ އަހަރުގެ ފަހުކޮޅުކަމަށެވެ. މި އަހަރުގެ ފެބްރުއަރީއަށް ނިމޭނެކަމަށް ބުނި މަސައްކަތް، މިހާރު ނިންމާލެވޭނެކަމަށް ބެލެވެނީ ސެޕްޓެމްބަރު މަހުގެ ނިޔަލަށްކަމަށް އަސްލަމް ވިދާޅުވި އެވެ.

ޕްލޭނިން މިނިސްޓްރީ އާއި އާރުޑީސީ ދެމެދު ވީ އެއްބަސްވުމުގެ ދަށުން މަސައްކަތް ނިންމަން އޮތީ 210 ދުވަހުގެ ތެރޭގަ އެވެ. އެހެންކަމުން ޝެޑިއުލް އާއި އެއްގޮތަށް މަސައްކަތް ކުރިޔަށް ދިޔަ ނަމަ މި ހިނގާ ފެބްރުއަރީ އަކީ މަސައްކަތް ނިންމަން ޖެހޭ މަހެވެ.