ވިލިމާލޭގެ މާރުކޭޓް ގޮޅި ހިންގާ ފަރާތްތަކަށް ހަތަރު މަސްދުވަހުގެ ކުލި މާފުކޮށްދީ މާލޭގެ މާރުކޭޓް ގޮޅި ހިންގާ ފަރާތްތަކުގެ ކުލިން 30 އިންސައްތަ ކުޑަކޮށްދިނުމާއެކު މާލޭގެ ލޯކަލް މާރުކޭޓާއި ދަތުރުވެރިންގެ މާރުކޭޓްހެ އެއްބަސްވުން އިތުރު އެއް އަހަރަށް އައު ކުރުމަށް މާލެ ސިޓީ ކައުންސިލުން ނިންމައިފިއެވެ.
މާލޭގެ ލޯކަލް މާރުކޭޓާއި ދަތުރުވެރިންގެ މާރުކޭޓްގެ އެއްބަސްވުމުގެ މުއްދަތު މިހިނގާ މާޗް މަހުގެ 31 އަށް ހަމަވާނެއެވެ.
ސިޓީ ކައުންސިލްގެ 4 ވަނަ ދައުރުގެ 91 ވަނަ ރަސްމީ ޖަލްސާއިން ނިންމާފައިވަނީ މާލެ ސަރަހައްދުގައި މާރުކޭޓް ހިންގާ ފަރާތްތަކަށް ލުޔެއް ދިނުމަށް ކަމަށް އެކައުންސިލުން ވަނީ ބުނެފައެވެ.
މާލޭގައި މާރުކޭޓް ގޮޅި ހިންގާ ފަރާތްތަކަށް ލުޔެއް ދިނުމަށް ނިންމާފައިވަނީ ތަކެތީގެ އަގުތައް އުފުލުމާއި އެކު މާރުކޭޓް ހިންގާ ފަރާތްތަކަށް ދިމާވެފައިވާ ދަތިތަކާއި ގުޅިގެން ކަމަށް މާލެ ސިޓީގެ މޭޔަރު ޑރ މުހައްމަދު މުއިއްޒު ވަނީ ވިދާޅުވެފައެވެ.
މާލެ އާއި ވިލިމާލޭގައި މާރުކޭޓް ގޮޅި ހިންގާ ފަރާތްތަކަށް މާލެ ސިޓީ ކައުންސިލުން ލުއި ދިނުމަށް ނިންމާފައިވަނީ އެފަރާތްތަކުން އެކަމަށް ބޭނުންވެފައިވާ ދަނޑިވަޅެއްގައިކަން ފާހަގަކޮށްލެވެއެވެ.
advertisment