ރައީސް އިބްރާހިމް މުހައްމަދު ސާލިހުގެ ސަރުކާރުން ގެންގުޅުއްވާ ހާރިޖީ ސިޔާސަތަށް މަޖިލީހުގެ ކެންދޫ ދާއިރާގެ މެމްބަރު އަލީ ހުސައިން ފާޑުވިދާޅުވެފައެވެ.
ޖުމްހޫރީ ޕާޓީ އަދި އެމްޑީޕީގެ ކޯލިޝަން އުފެެދިދާނެކަމާއިމެދު ސުވާލުކުރެވެމުންދާއިރު، އަލީ ހުސައިންވަނީ، ރާއްޖެއިން އީރާނާއި އެކު އަލުން ހާރިޖީ ގުޅުންތައް ބޭއްވުމަށް ނިންމާފައިވާކަމަށް އަލިއަޅުއްވާފައެވެ. އޭނާ ވިދާޅުވީ އެކަމުން ރާއްޖޭގެ ހާރިޖީ ސިޔާސަތު މިނިވަން ނޫންކަން ސާބިތުވެގެންދާކަމަށެވެ.
މިނިވަން ޚާރިޖީ ސިޔާސަތެއް ނެތްކަން ސާބިތުވެއްޖެ https://t.co/hjSw6pAYfY
— Ali Hussain (@AleeVoice) March 10, 2023
އީރާން އާއިއެކު އަލުން ގުޅުންތައް ބޭއްވުމަށް ރައީސް ސާލިޙްގެ ސަރުކާރުން ނިންމުމުން ކުރީގެ ފޮރިން މިނިސްޓަރު އަހުމަދު ޝަހީދުވެސްވަނީ ފާޑުވިދާޅުވެފައެވެ. އޭނާ ވިދާޅުވީ، މީހުން މެރުންފަދަ އެތައް އަމަލެއް ހިންގަމުންދާއިރު، އެ ގައުމާއި ގުޅުން ބަދަހިކުރަންޖެހޭ ސަބަބެއް ނެތްކަމަށެވެ. އަދި އެ ގައުމުގައި އެއްވެސް ކަމެއް ރަނގަޅުވެފައިނުވާކަމަށްވެސް އޭނާ ވިދާޅުވިއެވެ.
އިރާނާއި އެކު ސިޔާސީ ގުޅުން ރާއްޖެއިން ކަނޑާލީ 17 މޭއި 2016 ގައި ރައީސް އަބްދުﷲ ޔާމީންގެ ސަރުކާރުގައެވެ. އޭރު ސަރުކާރުން ނެރުނު ބަޔާނެއްގައި ބުނެފައިވަނީ އިރާނުން މެދުއިރުމަތީގެ ސުލްހަ މަސަލަސްކަން ގެއްލޭ ފަދަ ކަންކަން ކުރަމުންދާ ކަމަށެވެ. އަދި އެފަހުން ޤަތަރާއި އެކުވެސް ރާއްޖެއިން ގުޅުން ކަނޑާލިއެވެ. އެ ނިންމުން ނިންމީވެސް ސައުދީ އަރަބިއްޔާއިން އެގޮތަށް އަމަލުކުރުމުންނެވެ.