ވ ރަކީދޫ ކައުންސިލްގެ އަންހެން މެމްބަރަކު ހޮވުމަށް ބާއްވާ ބައި އިލެކްޝަން އާއި ވ ތިނަދޫ އަންހެނުންގެ ތަރައްގީއަށް މަސައްކަތްކުރާ ކޮމެޓީގެ އިންތިހާބު އަދި އދ ދިއްދޫ ކައުންސިލް މެމްބަރު ކަމުގެ އިންތިހާބު، މެއި މަހުގެ 6 ވަނަ ދުވަހު ބޭއްވުމަށް އިލެކްޝަންސް ކޮމިޝަނުން ނިންމައިފިއެވެ.
އިލެކްޝަންސް ކޮމިޝަނުން ބުނީ ވ ރަކީދޫ ކައުންސިލްގެ އަންހެން މެމްބަރު އިންތިހާބު ކުރުމަށް ބާއްވާ ބައި އިލެކްޝަން އާއި ވ ތިނަދޫ އަންހެނުންގެ ތަރައްގީއަށް މަސައްކަތްކުރާ ކޮމިޓީން ހުސްވެފައިވާ ގޮނޑިތަކަށް މެމްބަރުން އިންތިހާބު ކުރުމަށް ބާއްވާ ބައި އިލެކްޝަން އަދި އދ ދިއްދޫ ކައުންސިލަށް މެމްބަރަކު ހޮވަން ބާއްވާ އިންތިހާބު މިއަހަރުގެ މެއި މަހުގެ 6 ވާ ހޮނިހިރު ދުވަހު ބޭއްވުމަށް ނިންމާފައިވާ ކަމަށެވެ.
06 މެއި ގައި ބާއްވާ އިންތިހާބު ތަކުގެ ވޯޓްލުން ކުރިއަށްދާނީ އެ ދާއިރާތަކުގެ ރަށްތަކުގައި ހެނދުނު 8 އިން ހަވީރު 4 އަށެވެ. އަދި ވޯޓް ގުނާ ނަތީޖާ އިއުލާން ކުރާނީ ވޯޓްލުން ނިމި 30 މިނެޓް ފަހުންނެވެ.
ވ ރަކީދޫ އާއި ތިނަދޫ އަދި އދ ދިއްދޫ ދައީރާގެ ބައި އިލެކްޝަން އިންތިހާބުގެ ރަސްމީ ނަތީޖާ އިއުލާން ކުރުމަށް ހަމަޖެހިފައިވަނީ މެއި މަހުގެ 08 ވަނަ ދުވަހު ކަމަށްވެސް އިލެކްޝަންސް ކޮމިޝަނުން ވަނީ ބުނެފައެވެ.
ވ ރަކީދޫ ކައުންސިލަށް އަށް އަންހެން މެމްބަރުން އެއްފަހަރާ އިންތިހާބު ކުރަންޖެހެއެވެ. ތިނަދޫ އަންހެނުންގެ ތަރައްގީ އަށް މަސައްކަތް ކުރާ ކޮމީޓީ އަށް 5 މެމްބަރުން އިންތިހާޞު ކުރަން ޖެހޭއިރު ދިއްދޫ ކައުންސިލަށް އިންތިހާބު ކުރަން ޖެހެނީ އެންމެ މެމްބަރެކެވެ.
އިލެކްޝަންސް ކޮމިޝަނުން ބުނީ ދިއްދޫ ކައުންސިލް މެމްބަރު ހޮވުމަށް ބާއްވާ އިންތިހާބާއި ރަކީދޫ ކައުންސިލްގެ އަންހެން މެމްބަރު އިންތިހާބު ކުރުމަށް ބާއްވާ ބައި އިލެކްޝަނާއި ވ ތިނަދޫ އަންހެނުންގެ ތަރައްގީ އަށް މަސައްކަތްކުރާ ކޮމިޓީގެ އިންތިހާބުގައި ވޯޓް ދިނުމުގެ ހައްގު ލިބިގެންވާ މީހުންގެ ރަޖިސްޓްރީ މި މާޗްމަހުގެ 22 ވާ ބުދަ ދުވަހު އާއްމު ކޮށްފައިވާ ކަމަށެވެ.