މާލެ ސިޓީ ކައުންސިލުން ދަނީ ދަންވަރަށް ވައްކަން ކުރަމުން: ރޮޒައިނާ

މާލެ ސިޓީ ކައުންސިލުން ދަނީ ދަންވަރަށް ވައްކަން ކުރަމުންކަމަށް އައްޑޫ މީދޫ ދާއިރާގެ މެންބަރު ރޮޒައިނާ އާދަމް ތުހުމަތުކުރައްވައިފިއެވެ.

މާލެ ސީޓީ ކައުންސިލްގެ މުވައްޒފުން ލާ ޓީޝާޓު ލައިގެން ތިބި ބަޔަކު ޕިކަޕަކަށް އެއްޗިސް އަރުވާ މަންޒަރު ފެންނަ ފޮޓޯތަކެއް ހިއްސާކުރައްވާ، ޔޫތް މިނިސްޓަރު އަހުމަދު މަހުލޫފް ވަނީ މާލެ ސިޓީ ކައުންސިލްގެ މައްޗަށް ތުހުމަތުތަކެއްކޮށްފައެވެ.

އެގޮތުން ޔޫތު މިނިސްޓްރީގެ ބިމެއްގެ ތެރެއަށްވަދެ އެތަނުގައިހުރި ގުދަނުގެ ތަޅު ހަލާކުކޮށްލާ ގުދަންކޮށްފައި ހުރި އަގުބޮޑު ސާމާނުތައް ގެންދަނީކަމަށް ވިދާޅުވެ މަހުލޫފް ވަނީ މިކަން ވަގުތުން ހުއްޓާލުމަށް ސިޓީ ކައުންސިލްއަށް ގޮވާލާފައެވެ. އަދި ގެއްލޭ ތަކެއްޗާއި ގެއްލުންލިބޭ ތަކެއްޗަށް ޒިންމާ އުފުލަންވާނެކަމަށް ވިދާޅުވެފައިވެއެވެ.

މިއާއި ގުޅިގެން ޓުވީޓެއްކުރައްވާ ރޮޒައިނާ ވިދާޅުވީ ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ސަރުކާރުގައި ގޭގެއަށް ވަދެ ބާލީސް ދަށަށް ބަޑިލީ ގޮތަށް މިއަދު ޑރ މުއިއްޒުގެ މޭޔަރކަމުގައި ގޭގެއިން ވައްކަންވެސް ކޮށްފާނެކަމަށެވެ.

Mee ajaibeh kahala kameh nun!
Mayor ah viyas boduvaru!
Yameen sarukaaruga geyge ah vadhe baalees dhoshah badilee gothah miadhu Muiz ge mayor kamuga Male’ rayyithunge geyge ves falhan fashaafaane mivarundhanya. Mivaruge councileh nethiyyaa rangalhee! Dhanvaru vakkan kuraa council! https://t.co/DUvuglup4J

— 𝐌𝐏 𝐑𝐨𝐳𝐚𝐢𝐧𝐚 𝐀𝐝𝐚𝐦 🎈 (@Roxeyna) March 31, 2023

މާލެ ސިޓީ ކައުންސިލުން ދަންވަރު ވައްކަންކުރާކަމަށާއި، މިފަދަ ކައުންސިލެއް ނެތް ނަމަވެސް ރަނގަޅުކަމަށް ރޮޒައިނާ ވަނީ ވިދާޅުވެފައެވެ.

މިއާއި ގުޅިގެން މާލެ ސިޓީ ކައުންސިލުން ބުނެފައިވަނީ މާލެ ސިޓީ ކައުންސިލުން ޤާނޫނާއި ޤަވައިދާ ޚިލާފަށް އެެއްވެސް ކަމެެއް ނުކުރާނެކަމަށެވެ. ބިމުގެ ރަޖިސްޓްރީގެ ފޮޓޯއެއް ހިއްސާކޮށް، އެއީ ޔޫތް މިނިސްޓްރީގެ ބިމެއް ނޫންކަމަށް ކައުންސިލުން ބުނެފައިވާއިރު، އެ ފޮޓޯގައި ވާގޮތުން އެއީ ޔޫތް މިނިސްޓްރީގެ ބިމެއް ނޫނެވެ.