ރައްޔިތުންގެ މަޖިލީހުގެ އިންތިހާބުގެ ކަންކަމުގައި ޕްރޮގްރެސިވް ކޮންގްރެސް ކޯލިޝަންގެ ޗީފް ސްޕޯކްސް ޕާސަންއަކަށް އެންސްޕާގެ ސީއީއޯ ހީނާ ވަލީދު ހަމަޖައްސަވައިފިއެވެ.
ރައްޔިތުންގެ މަޖިލީހުގެ އިންތިހާބުގެ ކެމްޕެއިން ކުރުން ފޯރިގަދަކަމާއިއެކު ކުރިއަށްދާއިރު، ޕީއެންސީއިންވަނީ އެ ޕާޓީގެ ފަރާތުން ރައްޔިތުންގެ މަޖިލީހުގެ އިންތިހާބާއި ގުޅޭގޮތުން މައުލޫމާތު ދެއްވުމުގައި އެންމެ އިސްކޮށް ހަރަކާތްތެރިވެވަޑައިގަންނަވާނީ އެންސްޕާގެ ސީއީއޯ ހީނާކަން ހާމަކޮށްފައެވެ.
ދިވެހިރާއްޖޭގެ މީޑިއާ ދާއިރާގައި ގިނަ ދުވަސްތަކެއް ހޭދަކުރައްވައި ގިނަ ހިދުމަތްތަކެއް ކުރައްވާފައިވާ ހީނާ މި ފަހުން ފެނިގޮސްފައިވަނީ ދިވެހިރާއްޖޭގެ ސިޔާސީ މައިދާނާއި އިސްލާހީ މަސައްކަތްތަކުގެ ތެރެއިންނެވެ. އެގޮތުން ޕީޕީއެމްގެ ތަރުޖަމާނުގެ ގޮތުގައި ދާދި ފަހާއި ޖެހެންދެން ހުންނެވިއެވެ.
ހީނާ ވަނީ ކޮމިއުނިކޭޝަން އަދި ޖާރނަލިޒަމްގެ ދާއިރާއިން ތައުލީމު ހާސިލުކުރައްވާފައިވާއިރު، ޕޮލިޓިކަލް ސައިންސް އެންޑް އިންޓަރނޭޝަނަލް އެފެއާޒްގެ ދާއިރާއިން މާސްޓާސް ހާސިލްކުރައްވަމުން ސަކާރުގެ ކަމާއި ގުޅޭ މަގާމެއް ފުރުއްވިކަންވެސް ފާހަގަކުރެވެއެވެ.
