އެމެރިކާއިން އެ ގައުމުތައް ”ތަގައްޔަރު“ ކުރަމުންދިއުމާއި ދެކޮޅަށް އިތުރަށް ވަރުގަދައަށް މަަސައްކަތްތައް ކުރުމަށް ރަޝިއާގެ ރައީސް އަދި ޗައިނާގެ ރައީސް ވައުދުވެފައިވާކަމަށް ބައިނަލްއަގުވާމީ މީޑިއާތަކުން ރިޕޯޓުކޮށްފިއެވެ.
ރިޕޯޓުތަކުގައިވާގޮތުން ޗައިނާގެ ރައީސް ޝީ ޖިންގްޕިންގް އަދި ރަޝިއާގެ ރައީސް ވްލެޑިމިއަރ ޕުޓިންވަނީ ބައްދަލުކުރައްވާފައެވެ. އަދި ދެ ގައުމުގެ ދެމެދު ގުޅުންތައް އިތުރަށް ވަރުގަދަކުރުމާއި ގުޅޭގޮތުން ގިނަ މަޝްވަރާތައް ކުރެވުނުއިރު އެމެރިކާއިން ދެ ގައުމުގައި ކުރަމުންދާ މަސައްަކަތްތަކާއި ދެކޮޅަށް ފިޔަވަޅުތައް ގުޅިގެން އިތުރަށް ވަރުގަދަ ކުރުމަށް ދެ ގައުމުންވެސް އަޒުމު ކަނޑައަޅާފައިވާކަމަށް ބުނެފައިވެއެވެ.
ޕުޓިން އަދި ޝީވެސް ވަނީ އެމެރިކާއިން ދުނިޔޭގެ އެކި ސަރަހައްދުތަކުގައި މިސައިލް ސްޓޭޝަންތައް ހަރުކުރަމުންދާކަމަށް ތުހުމަތު ކޮށްފައެވެ. އަދި އެކަމުގެ ސަބަބުން ރަޝިއާ އާއި ޗައިނާގެ ސަލާމަތަށް ނުރައްކާތަށް ކުރިމަތިވެގެންދާކަމަށްވެސް ހިއްސާކޮށްފައިވެއެވެ. ދެ ގައުމު ގުޅިގެން ދީފައިވާ ބަޔާނުގައި ވަނީ އެމެރިކާއިން ގެންގުޅެމުންދާ ގެއްލުންދެނި އުސޫލުތަކާއްި ދެކޮޅަށް އަސްކަރީ މަސައްކަތްތައްވެސް ވަރުގަދަކުރާނެކަން ހާމަކޮށްފައެވެ.
