ސްޓެލްކޯގެ ކޮންޓެކްޓް ސެންޓަރުގެ ހޮޓްލައިން ނަންބަރު ތައާރަފްކޮށްފިއެވެ.
ސްޓެލްކޯއިން ސޯޝަލްމީޑިއާ މެދުވެރިކޮށް ކުރިއަށް ގެންދިޔަ ހަރަކާތެއްގައި ތައާރަފްކޮށްފައިވާ ހޮޓްލައިން ނަންބަރަކީ ”1545“ އެވެ. އެ ކުންފުނިން ބުނެފައިވާގޮތުން މިއީ ރައްޔިތުންނާއި ގާތުން މަސައްކަތްކޮށް ފަސޭހަކަމާއިއެކު، ރައްޔިތުންނަށް ޚިދުމަތް ދިނުމަށް ކުރަމުންދާ ކަންކަމުގެ ތެރެއިން ފެށިފައިވާ މަސައްކަތެއްކަމަށެވެ.
އެ ކުންފުނިން ބުނެފައިވާގޮތުން ކަރަންޓު ބިލްތަކާއި ގުޅުންހުރި ޝަކުވާތައް ހުށައެޅުމަށާއި ސްޓެލްކޯއިން ފޯރުކޮށްދެމުންދާ ހުރިހާ ޚިދުމަތަކާއި ގުޅުންހުރި މައުލޫމާތު ހޯދުމަށްވެސް މި ހިދުމަތް ބޭނުންކުރެވޭނެކަމަށެވެ. އަދި އެ ނޫންވެސް ކުންފުންޏާއި ގުޅުން ހުރި ކަންކަމުގައި ހޮޓްލައިން ނަންބަރު ބޭނުންކުރެވޭކަމަށެވެ.
މީގެ އިތުރުން ސްޓެލްކޯގެ ޚިދުމަތްތައް އިތުރަށް ފުރިހަމަ ކުރުމަށްޓަކައި، ސްޓެލްކޯ ކެއަރގެ ޚިދުމަތާއިއެކު ވައިބާ، ވަޓްސްއެޕް އަދި ޓެލެގްރާމް މެދުވެރިކޮށް ސްޓެލްކޯގެ ކޮންޓެކްޓް ސެންޓަރާއި މުޢާމަލާތު ކުރެވޭނެ އިންތިޒާމުވެސް މިހާރު ހަމަޖައްސާވައިވާކަމަށް މައުޅޫމާތު ދީފައިވެއެވެ
