އިމްޕޯޓު އަދި އެކްސްޕޯޓު ކުރި މުދަލުން ޖުލައި މަހު ދައުލަތަށް 364 މިލިޔަން ރުފިޔާ!

އިމްޕޯޓު އަދި އެކްސްޕޯޓު ކުރި މުދަލުން ޖުލައި މަހު ދައުލަތަށް 364 މިލިޔަން ރުފިޔާ ލިބިފައިވާކަމަށް ތަފާސް ހިސާބުތަކުން ދައްކައިފިއެވެ.

ކަސްޓަމްސްއިން އާންމުކޮށްފައިވާ ތަފާސްހިސާބުތަކުން ދައްކާގޮތުން އިމްޕޯޓު އަދި އެކްސްޕޯޓުން މިއަހަރުގެ މި މުއްދަތުގައި ލިބުނު އާމްދަނީ ވަނީ މިދިޔަ އަހަރާއި އަޅާ ބަލާއިރު އިތުރުވެފައެވެ. އެގޮތުން މިދިޔަ އަހަރުގެ މިމުއްދަތުގައި ދައުލަތަށް އިމްޕޯޓު އެކްސްޕޯޓުން ލިބިފައިވަނީ 361 މިލިޔަން ރުފިޔާއެވެ. އެއީ މިއަހަރުގެ މި މުއްދަތުގެ އާމްދަނީއާ އަޅާ ބަލާއިރު 0.8 އިންސައްތަ އިތުރު އަދަދެކެވެ.

ޖުލައި މަހުގެ ތެރޭގައި ރާއްޖެއަށް 4.5 ބިލިޔަން ރުފިޔާގެ މުދާ އެތެރެކޮށްފައިވާއިރު، މިދިޔަ އަހަރުގެ ޖުލައިމަހު ރާއްޖެއަށް އެތެރެކޮށްފައިވަނީ 4.7 ބިލިޔަން ރުފިޔާގެ މުދަލެވެ.

މި މުއްދަތުގައި ރާއްޖެއަށް އެންމެ ގިނައިން މުދާ އެތެރެ ކޮށްފައިވަނީ ޔޫއޭއީ، އިންޑިއާ، ޗައިނާ، ސިންގަޕޫރު އަދި ސްރީ ލަންކާއެވެ. ޔޫއޭއީއިން ވަނީ 991 މިލިޔަން ރުފިޔާގެ މުދާ އެތެރެކޮށްފައެވެ. ދެވަނައިގައި އޮތް އިންޑިއާއިން 766 މިލިއަން ރުފިޔާގެ މުދާ އެތެރެކޮށްފައިވާއިރު، ލިސްޓުގެ ތިން ވަނައިގައި އޮތް ޗައިނާއިން 681 މިލިއަން ރުފިޔާގެ މުދާ ރާއްޖެ އެތެރެކޮށްފައިވެއެވެ.