މެދުމިނުގެ ސިޔާސަތު ގެންގުޅުއްވާ ސިޔާސީ އިސްވެރިއެރިއެއް ކަމުގައިވާ އަނުރާ ކުމާރާ ދިސަނާޔަކެ، ސްރީލަންކާގެ ރިޔާސީ އިންތިޚާބުގައި ކުރިއަރައިވަޑައިގެންފައިވާ ކަމަށް ފާހަގަކުރެވިއްޖެއެވެ.
ހޮނިހިރު ދުވަހު ބޭއްވުނު މި އިންތިޚާބަކީ، 2022 ވަނަ އަހަރު ޤައުމު އެންމެ ނާޒުކު އިޤްތިޞާދީ ހާލަތަކާ ކުރިމަތިލާންޖެހުމާ ގުޅިގެން، ގޮތަބަޔާ ރާޖަޕަކްސާ ވެރިކަމުން ދުރުކުރުމަށް ބޮޑެތި މުޒާހަރާތަކެއް ކުރުމަށްފަހު ބޭއްވުނު ފުރަތަމަ އިންތިޚާބެވެ.
ދިސަނާޔަކެ ވަނީ ވޯޓުދޭ ފަރާތްތަކަށް ކޮރަޕްޝަނާ ދެކޮޅަށް ހަރުދަނާ ފިޔަވަޅުތަކެއް އެޅުމެޅުމާއި ރަނގަޅު ވެރިރިކަމެއް ކުރެއްވުމުގެ ވަޢުދުތަކެއް ވެވަޑައިގެންފައެވެ. މި މެސެޖުތަކަކީ އިޤްތިޞާދީ ހާލަތު ދަށްވުމާ ގުޅިގެން ނިޒާމީ ބަދަލުތަކަކަށް އެދެމުންދިޔަ ވޯޓުދޭ ފަރާތްތަކުގެ މެދުގައި ވަރަށް ބޮޑަށް އަޑުއިވިގެން ދިޔަ މެސެޖުތަކެކެވެ.
އާދީއްތަ ދުވަހުގެ ހެނދުނު ލިބުނު އެންމެ ފަހުގެ ނަތީޖާތަކުން ދައްކާގޮތުގައި ދިސަނާޔަކެ ވަނީ ގުނާފައިވާ ވޯޓުތަކުގެ 42% ހޯއްދަވާފައެވެ. ކެންޑިޑޭޓަކު ކާމިޔާބުވި ކަމުގައި އިޢުލާނުކުރުމަށް 51% ވޯޓު ބޭނުންވެއެވެ.
އިދިކޮޅު ފަރާތުގެ އިސްވެރިޔާ ސަޖިތު ޕްރެމަދާސަ ވަނީ މުޅި ވޯޓުގެ 32% އާ ގާތްކުރާ މިންވަރަކާއެކު ދެވަނަ ގޮނޑީގައެވެ. ދެވަނަ ދައުރަކަށް ކުރިމަތިލައްވާފައިވާ ރައީސް ރަނިލް ވިކްރަމަސިންގެއަށް މިހާތަނަށް ލިބިވަޑައިގެންފައިވަނީ 16% އެވެ. އަދި ވަކިކުރެވުނު ރައީސްގެ ކޮއްކޮފުޅު ނަމަލް ރާޖަޕަކްސާއަށް 3% އާ ގާތްކުރާ މިންވަރެއް ލިބިވަޑައިގެންފައިވެއެވެ.
ފުރަތަމަ ބުރުގެ ވޯޓު ގުނުމުގައި އެއްވެސް ކެންޑިޑޭޓަކަށް 51% ވޯޓު ނުލިބިއްޖެނަމަ، ވޯޓު ދިން ފަރާތްތަކުގެ ދެވަނަ އަދި ތިންވަނަ ޗޮއިސް ހިމެނޭގޮތަށް ދެވަނަ ބުރެއް ބޭއްވޭނެއެވެ.
1982 އިން ފެށިގެން ސްރީލަންކާގައި ބޭއްވުނު އަށް ރިޔާސީ އިންތިޚާބުގައިވެސް ކާމިޔާބުކުރެއްވި ފަރާތް ފާހަގަވެފައިވަނީ ފުރަތަމަ ބުރުގެ ވޯޓު ގުނުމުގައެވެ. މި އިންތިޚާބަކީ އެ ޤައުމުގެ ތާރީޚުގައި އެންމެ ވާދަވެރި އިންތިޚާބުތަކުގެ ތެރެއިން އެކެއް ކަމުގައި ބަޔާންކުރެވިފައިވެއެވެ.
ހޮނިހިރު ދުވަހު ސްރީލަންކާގެ 17 މިލިއަން މީހުންނަށް ވޯޓުލުމުގެ ޙައްޤު ލިބިގެންވެއެވެ. އަދި އެ ޤައުމުގެ އިލެކްޝަންސް ކޮމިޝަނުން ވިދާޅުވެފައިވަނީ މިއީ އެ ޤައުމުގެ ތާރީޚުގައި އެންމެ ސުލްޙަވެރި އިންތިޚާބު ކަމުގައެވެ.
ނަމަވެސް، ”އާންމު ރައްޔިތުންގެ ސަލާމަތާއި ރައްކާތެރިކަމަށްޓަކައި“ ހޮނިހިރު ދުވަހުގެ ރޭ ފުލުހުން ވަނީ ކަރުފިއު އިޢުލާންކުރައްވާފައެވެ. އަދި މި ކަރުފިއު ވަނީ މެންދުރު 12:00 (ސްރީލަންކާގެ ގަޑިން) އާ ހަމައަށް އިތުރުކުރެވިފައެވެ.
ނަތީޖާ ކާމިޔާބުކުރެއްވުމަށް ބޭނުންވާ ވޯޓުގެ އަދަދު އަދި ނުލިބުނު ނަމަވެސް، ދިސަނާޔަކަށް އެމަނިކުފާނުގެ ދެ މައިގަނޑު ވާދަވެރިން ކަމުގައިވާ ވިކްރަމަސިންގެ އަދި ޕްރެމަދާސާގެ ތާއީދުކުރައްވާ ފަރާތްތަކުން މަރުޙަބާގެ މެސެޖުތައް ލިބިވަޑައިގެންފައިވެއެވެ.
މި އިންތިޚާބަކީ ސްރީލަންކާގެ އިޤްތިޞާދީ އަދި ސިޔާސީ މަޝްރަޙު އަލުން އެކުލަވާލުމުގައި ނުހަނު މުހިންމު ދައުރެއް އަދާކުރާނެ އިންތިޚާބެއް ކަމުގައި ބެލެވެއެވެ. ދިސަނާޔަކެގެ ކުރިއެރުމަކީ ޤައުމުގެ ސިޔާސީ ވެށީގައި އައު ބަދަލުތަކެއް ގެނައުމުގެ ފުރުޞަތު އޮތްކަމުގެ ނިޝާނެއް ކަމުގައި ވެދާނެއެވެ.
އިންތިޚާބުގެ ފައިނަލް ނަތީޖާ އަދި ރަސްމީކޮށް އިޢުލާނު ނުކުރެވުނު ނަމަވެސް، މި ވަގުތީ ނަތީޖާތަކުން ދައްކައިދެނީ ސްރީލަންކާގެ ރައްޔިތުން ބަދަލަކަށް އެދޭކަމެވެ. އަދި މި ބަދަލަކީ ޤައުމުގެ އިޤްތިޞާދީ އަދި އިޖްތިމާޢީ ގޮންޖެހުންތަކަށް ޙައްލު ހޯދުމަށް އެޅޭ މުހިންމު ފިޔަވަޅެއް ކަމުގައި ވެދާނެއެވެ.
