އިޒްރޭލުން ހައްޔަރުކޮށްފައި ތިބި ފަލަސްތީނުގެ 20 ރައްޔިތަކު ދޫކޮށްލައިފިއެވެ.
އަލްޖަޒީރާގައި ރިޕޯޓު ކޮށްފައިވާ ގޮތުން އިޒްރޭލުގެ އަސްކަރިއްޔާއިން މިހާރު ވަނީ ފަލަސްތީނުގެ 20 ޤައިދީއަކު ދޫކޮށްލާފައެވެ. އެމީހުން ދޫކޮށްލާފައިވަނީ ކަރީމް އަބޫ ސަލީމް ސަރަޙައްދުންނެވެ.
ރިޕޯޓުތައް ބުނާ ގޮތުން އެމީހުން ދޫކޮށްލުމަށްފަހު ދެކުނު ގާޒާގެ ޚާން ޔޫނިސްގައި ހުންނަ ޔޫރޮޕިއަން ހޮސްޕިޓަލަށް ފަރުވާއަށް ވަނީ ގެންގޮސްފައެވެ. އެގޮތުން އިޒްރޭލުގެ ޖަލުތަކަށް ގެންދާ ހައްޔަރީންނަށް އަބަދުވެސް އެކިވަރުގެެ އަނިޔާތައް ކުރާކަމަށް ރިޕޯޓުތައް ބުނެއެވެ.
އަލްޖަޒީރާގައި ރިޕޯޓުކޮށްފައިވާ ގޮތުން މިހާރު ދޫކޮށްލާފައިވާ މީހުންގެ ތެރެއިން ގިނަ މީހުންނަކީ މީގެ މަހެއްހާ ދުވަސްކުރިން އުތުރު ގާޒާއިން ހައްޔަރުކޮށްފައިވާ މީހުންނެވެ.
އޭގެ އިތުރުން، ފަލަސްތީނުގެ ކޮމިޝަން އޮން ޑިޓެއިނީސްއާއި، އެކްސް ޑިޓެއިނީ އެފެއާޒާ ޙަވާލާދީ ބޭރުގެ ނޫސްތަކުން ރިޕޯޓު ކޮށްފައިވާ ގޮތުން މިދިޔަ އަހަރު އިޒްރޭލުން ގާޒާއަށް ޙަމަލާތައް ދޭން ފެށިފަހުން މިހާތަނަށް އިޒްރޭލުން ހައްޔަރުކުރި 43 ޤައިދީއަކު ޝަހީދުވެފައިވެއެވެ.
އިޒްރޭލުން ގާޒާއަށް ޙަމަލާތައް ދޭން ފެށީ މިދިޔަ އަހަރުގެ އޮކްޓޯބަރު މަހުގެ ތެރޭގައެވެ.
