ފެންޓެނޯއީ ގޭގެ 9 ވަނަ ފަންގިފިލާއިން ގުދަނެއްގެ ފުރާޅު މައްޗަށް ވެއްޓިފައި އޮއްވައި ފެނުނު ހައްވާ ޔުމްނު ރަޝީދުގެ މައްސަލައިގައި ރިޔާސީ ކޮމިޝަނުން ކުރި ތަޙުޤީޤު ނިމި، އެ ރިޕޯޓު އާންމުކޮށްފި އެވެ.
ކޮމިޝަނުގެ މި ރިޕޯޓް އާންމު ކުރެއްވީ، ކޮމިޝަނުގެ ރިޕޯޓް ރައީސުލްޖުމްހޫރިއްޔާއަށް ލިބިވަޑައިގެންނެވި ގޮތަށް ޢާންމު ކުރެއްވުމަށް ރައީސުލްޖުމްހޫރިއްޔާ ނިންމެވުމާ ގުޅިގެންނެވެ.
މައްސަލައިގައި ކޮމިޝަން ތައްޔާރު ކުރި ރިޕޯޓުގައި ވަނީ، ރައުދު އަހުމަދު ޒިލާލްއާއި ޔުމްނު އަދި އޭނާގެ އެކުވެރިންތަކެއް ބައްދަލުވުމަށްޓަކައި ފިހާރައިން ތަކެތި ގަނެގެން ފުރަތަމަ ގެއަށް ދާ ވަގުތުން ފެށިގެން ހުރިހާ ތަފްސީލެއް ހިމަނާފަ އެވެ. އަދި ވަގުތާއި އެކު އެރޭ ފަހުން ރައުދުއާއި ދިމާވި މީހުންނާއި ޔުމްނު ވެއްޓުމަށް ފަހު ރައުދު އޭނާގެ ގެއަށް ދިޔަ ގޮތުގެ މައުލޫމާތު ވެސް ހިމަނާފަ އެވެ.
މި ރިޕޯޓުން އެނގޭ ގޮތުގައި ހ. ފެންޓެނޯއީއަށް ރައުދުއާއި ޔުމްނު ފިޔަވައި އިތުރު މީހަކު ވަދެފައި ނުވެއެވެ. އަދި އެ ސަރަހައްދުގައި އުޅުނު މީހަކު، ކީއްކުރާ މީހެއްތޯ ސުވާލު ކުރުމުން ރައްޓެއްސެއްގެ އެޕާޓްމަންޓަށް އައީކަމަށް ރައުދު ބުނިކަމަށް ވެއެވެ.
