ދިވެހިރާއްޖޭގެ އާބާދީގެ ދެބައިކުޅަ އެއްބައި ހިއްސާކުރަނީ އަންހެނުންނެވެ. ޤައުމުގެ ތަރައްޤީއަށް މިފަދަ ބޮޑު ބައެއްގެ ޤާބިލުކަމާއި ހުނަރު އެންމެ ފުރިހަމަ ގޮތުގައި ބޭނުންކުރެވޭތޯ ބެލުމަކީ މުހިންމު ކަމެކެވެ.
މިލޭނިއަމް ޑިވެލޮޕްމަންޓް ގޯލްސްގެ ދަށުން ރާއްޖެއިން އެންމެ ފުރިހަމައަށް މިންތީގެ ހަމަހަމަކަން ޤާއިމްކުރެވިފައިވަނީ ތަޢުލީމީ ދާއިރާއިންނެވެ. ސާނަވީ އަދި މަތީ ސާނަވީ ތަޢުލީމުގައި އަންހެން ދަރިވަރުންގެ އަދަދު ފިރިހެން ދަރިވަރުންނަށްވުރެ މަތިވެފައިވާކަން ފާހަގަކުރެވެއެވެ. މީގެ އިތުރުން، މަތީ ތަޢުލީމު ހާސިލުކުރާ ދަރިވަރުންގެ ތެރޭގައިވެސް އަންހެން ދަރިވަރުންގެ ނިސްބަތް މަތިވެފައިވެއެވެ.
ތަޢުލީމީ ދާއިރާގައި ފެންނަ ކުރިއެރުމާ ޚިލާފަށް، ވަޒީފާގެ މައިދާނުގައި، ޚާއްޞަކޮށް އިސް މަޤާމުތަކުގައި އަންހެނުންގެ ނިސްބަތް ދަށްވެފައިވާކަން ފާހަގަކުރެވެއެވެ. މިކަން ޙައްލުކުރުމަށް ސަރުކާރުންނާއި އެކި މުއައްސަސާތަކުން ގިނަގުނަ މަސައްކަތްތަކެއް ކުރަމުންދެއެވެ.
ދެމެހެއްޓެނިވި ތަރައްޤީގެ ލަނޑުދަނޑިތައް ހާސިލުކުރުމުގައި އަންހެނުންގެ ދައުރު އިންތިހާއަށް މުހިންމެވެ. މުޖުތަމަޢުގެ މައްސަލަތަކުގައި އަންހެނުންގެ ބޭނުންތަކަށް ރިޢާޔަތްކުރުމަކީ ކޮންމެހެން މުހިންމު ކަމެކެވެ. އަދި މިކަމަކީ ބައިނަލްއަޤްވާމީ ފެންވަރުގައިވެސް ޤަބޫލުކުރެވޭ ޙަޤީޤަތެކެވެ.
އަންހެނުން އިސް މަޤާމުތަކަށް ގެނައުމުގައި ދިމާވާ އެންމެ ބޮޑު އެއް ގޮންޖެހުމަކީ މުޖުތަމަޢުގެ ވިސްނުމެވެ. ކުޑައިރުއްސުރެ އަންހެން ކުދިން ތަރުބިއްޔަތު ކުރެވެނީ ނާޒުކު ދަރިންގެ ގޮތުގައި ކަމަށްވުމުން، އަމިއްލަ ނަފުސަށް އިތުބާރު ކުރުމުގެ ބަދަލުގައި އެހެން މީހުންނަށް ބަރޯސާވުމުގެ އާދަ އަށަގަނެއެވެ.
އަންހެނުންގެ ލީޑަރޝިޕް ހުނަރުތައް ތަރައްޤީކޮށް، އިސް މަޤާމުތަކުގައި ތިބި އަންހެން ނަމޫނާ ޝަޚްޞިއްޔަތުތައް ފާހަގަކުރުމަކީ އަންނަން އޮތް ޖީލުގެ އަންހެން ކުދިންގެ އަމިއްލަ ނަފުސަށް ކުރާ އިތުބާރު އިތުރުކޮށް، އެ ކުދިން ބާރުވެރިކުރުވުމަށް މަގުފަހިވާނެ ކަމެކެވެ.
ޤައުމުގެ ތަރައްޤީއަށް އަންހެނުންގެ ހުނަރާއި ޤާބިލުކަން އިތުރަށް ބޭނުންކުރުމުގެ ފުރުޞަތު ފަހިކުރުމަކީ މުޅި މުޖުތަމަޢުގެ ކުރިއެރުމަށް ކޮންމެހެން މުހިންމު ކަމެކެވެ. މިކަމަށްޓަކައި ސަރުކާރާއި، އަމިއްލަ ޖަމްޢިއްޔާތަކާއި، މުޅި މުޖުތަމަޢު ގުޅިގެން މަސައްކަތްކުރުން މުހިންމެވެ.
