ރައްޔިތުންގެ ގާތުގައި އަހައިގެން ކަންކަން ކުރިއަށް ގެންދަން އެމްޑީޕީން ބޭނުން ނުވާކަމަށާއި، އެ ޕާޓީން އެދެނީ ހުދުމުހުތާރު ގޮތެއްގެ މަތިން ވެރިކަން ކުރުމަށްކަމަށް ޕީއެންސީގެ ޕީޖީ ލީޑަރު އިބްރާހިމް ފަލާހު ވިދާޅުވެއްޖެއެވެ.
ރައްޔިތުންގެ މަޖިލީހުގެ ތަޅުމުގައި ވާހަކަފުޅު ދައްކަވަމުން ފަލާހު ވިދާޅުވީ، ރައްޔިތުންގެ ތެރޭގައި ނެގޭ ފެންނަ ނުފެންނަ ވޯޓަކީ ވަރަށް މުހިންމު އެއްޗެއްކަން ފެނިގެންދާ ކަމަށެވެ. އަދި ރައްޔިތުންގެ ގާތުގައި ކަންކަން އެހުމަށް ޕީއެންސީން ކުރާ މަސައްކަތްތަކަކީ އެމްޑީޕީއަށް އުނދަގޫތަކެއް ވެގެންދާ ކަމެއްގެ ގޮތުގައި ފެންނަ ކަމަށް ވިދާޅުވެ، އެކަމާމެދު ހިތާމަކުރައްވާ ކަމަށް ވިދާޅުވިއެވެ.
”އެމްޑީޕީން ބޭނުންވަނީ ވަރަށް ހުދުމުހުތާރު ގޮތެއްގެ މަތިން ވެރިކަން ކުރަން. އެއްވެސް ކަމެއްގައި ރައްޔިތުންގެ ގާތުގައި އެހުމަކީ އެ ޕާޓީން ގަބޫލުކުރާ ކަމެއް ނޫންކަން މަޖިލީހުގައި ތިއްބެވި އެމްޑީޕީއަށް ނިސްބަތްވާ މެމްބަރުން ދައްކަވާ ވާހަކަތަކުން ދޭހަވޭ،“ ފަލާހު ވިދާޅުވިއެވެ.
އާންމު ރައްޔިތުންގެ ތެރޭގައި ފެންނަ ނުފެންނަ ވޯޓު ނެގުމުގެ މަސައްކަތްތައް ހަރުދަނާކުރުމުގެ ގޮތުން ޕީއެންސީން ގެނައުމަށް މަސައްކަތްކުރަމުންދަނީ ވަރަށް މުހިންމު އިސްލާހެއްކަމަށް ފަލާހު ވިދާޅުވިއެވެ. އަދި ރާއްޖޭގެ އެކިއެކި އަތޮޅުތަކަށް ބެހިފައި އޮންނައިރު، ކަންކަންވެސް ހުންނަނީ އެކި ގޮތްގޮތަށްކަން ފާހަގަކުރެއްވިއެވެ.
ރައީސް ޑރ. މުހައްމަދު މުއިއްޒު ބޭނުންފުޅުވަނީ ބޮޑެތި މުހިންމު ކަންކަމުގައި ރައްޔިތުންގެ ގާތުގައި އަހައިގެން ކުރިއަށް ވަޑައިގަތުމަށްކަމަށް ފަލާހު ވިދާޅުވިއެވެ. އަދި އެމްޑީޕީން ވަކާލާތުކުރާ މިންވަރަށް ރައްޔިތުން ބާރުވެރިކުރުމަށް ވަކާލާތުކުރާއިރު، މިކަން ކަމުނުގޮސްގެން އުޅެނީ ކީއްވެގެންކަން ވިސްނާ ހައިރާންވެގެންދާ ކަމަށްވެސް ވިދާޅުވިއެވެ.
ފަލާހު ވިދާޅުވީ، މިހާރުގެ ރައީސް ޑރ. މުއިއްޒު މިވަގުތުވެސް ހުންނެވީ ރައްޔިތުންގެ ގާތަށް ވަޑައިގެން ކަމަށާއި، ކުރައްވަމުންދާ ދަތުރުފުޅުތަކުގެ ތެރެއިން ގައުމުގެ ކަންކަން ކުރިއަށް ގެންދިއުމުގައި ރައްޔިތުންގެ ހިޔާލުތައް ހޯއްދަވަމުން ގެންދަވާ ކަމަށެވެ. އަދި މިކަން އެމްޑީޕީއަށް ހަޖަމުނުވުން އެކަށީގެންވާ ކަމަށާއި، ސަބަބަކީ އެމްޑީޕީން ވެރިކަން ކުރި މީހުންގެ ކިބައިން މިފަދަ އަމަލުތަކެއް ފެނިގެން ނުދިއުން ކަމަށް ވިދާޅުވިއެވެ.
