ދިވެހިރާއްޖޭގެ ޒަކާތު ހައުސްއިން ފަޤީރުންނާއި މިސްކީނުންގެ ދަފްތަރުގައި ހިމެނޭ ފަރާތްތަކަށް ޚާއްސަކޮށްގެން ”ޒަކާތު ބެނެފެޝިއަރީ ކާޑެއް“ ތަޢާރަފްކުރުމަށް ނިންމާފިއެވެ.
މިއީ އިސްލާމީ ޝަރީޢަތުގައި ފަރުޟުކުރެވިފައިވާ ޒަކާތުގެ ނިޒާމުގެ ދަށުން، އެހީތެރިކަން ބޭނުންވާ ފަރާތްތަކަށް އެހީތެރިކަން ފޯރުކޮށްދިނުމުގައި އިތުރު ހަރުދަނާކަމާއި ފަސޭހަކަމެއް ގެނެސްދޭނެ މުހިއްމު ފިޔަވަޅެކެވެ.
މި ކާޑުގެ ސަބަބުން، ޒަކާތުގެ ފައިސާ ބޭނުންކޮށްގެން ދެވޭ އެހީތައް އިތުރަށް އަމާޒުކުރެވި، އެންމެ ބޭނުންޖެހިފައިވާ ފަރާތްތަކަށް އެ ފައިސާގެ މަންފާ ލިބޭނެ މަގު ފަހިވެގެންދާނެއެވެ.
ޒަކާތު ބެނެފެޝިއަރީ ކާޑު ތަޢާރަފްވުމާއެކު، ދަފްތަރުގައި ހިމެނޭ ފަރާތްތަކަށް ގިނަ ޢަދަދެއްގެ ޚިދުމަތްތައް ފަސޭހަކަމާއެކު ލިބިގެންދާނެއެވެ.
އެގޮތުން، ޞިއްޙީ ޚިދުމަތްތަކަށް އާސަންދަ ސްކީމުގެ ދަށުން ކަވަރުނުކުރާ ޚަރަދުތައް ޒަކާތު ފަންޑުން ކަވަރުކޮށްދިނުމަކީ އެންމެ މުހިއްމު އެއް ކަމެވެ. މީގެ އިތުރުން، ރަމަޟާންމަހު ކާބޯތަކެތި ގަތުމަށް ޚާއްސަ އެހީތެރިކަން ފޯރުކޮށްދިނުމާއި، ބޯހިޔާވަހިކަމާއި ތަޢުލީމާ ގުޅުންހުރި އެހީތައްވެސް މި ކާޑުގެ ދަށުން ދެވޭނެއެވެ. މިފަދަ އަސާސީ ބޭނުންތައް ފުއްދައިދިނުމަކީ، އިސްލާމީ ދުނިޔޭގެ ޒަކާތާ ބެހޭ މުއައްސަސާތަކުން އަބަދުވެސް އިސްކަންދޭ ކަންކަމެވެ.
މި ކާޑު އުފެއްދުމުގެ މައިގަނޑު މަޤްސަދަކީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދިވެހިރާއްޖޭގެ ޒަކާތު ހައުސް ވަކި އިދާރާއެއްގެ ގޮތުގައި އުފައްދަވައި އެ އިދާރާއާ ހަވާލުކުރެއްވި މުހިއްމު މަސްއޫލިއްޔަތު އަދާކުރުމެވެ. އެއީ ފަޤީރުކަމުގައި ތިބި ފަރާތްތައް ތަނަވަސް ޙާލަތަކަށް ގެނައުމެވެ.
މި ކާޑަކީ އެ މަޤްސަދު ހާސިލުކުރުމަށް އެޅިގެންދާ ވަރަށް މުހިއްމު ފިޔަވަޅެކެވެ. ޒަކާތު ހައުސްގެ އަމާޒަކީ ހަމައެކަނި އެހީ ދިނުމުގެ ބަދަލުގައި، އެހީ ބޭނުންވާ ފަރާތްތަކުގެ ދިރިއުޅުމުގެ ފެންވަރު ރަނގަޅުކޮށް، އެމީހުންގެ އަމިއްލަ ފައިމައްޗަށް ތެދުވެވޭނެ ގޮތްތައް ފަހިކޮށްދިނުމެވެ.
ޒަކާތު ބެނެފެޝިއަރީ ކާޑުގެ ސަބަބުން އިޤްތިޞާދީ ގޮތުންނާއި އިޖްތިމާޢީ ގޮތުން ގިނަ ފައިދާތަކެއް ލިބިގެންދާނެއެވެ. އިޤްތިޞާދީ ގޮތުން ބަލާއިރު، ޒަކާތުގެ ފައިސާގެ ބޭނުން ހެޔޮގޮތުގައި ހިފި، އެ ފައިސާގެ ދައުރުވުން އިތުރުވެ،
ފަޤީރުކަން ކުޑަކުރުމަށް އެހީތެރިވެދޭނެއެވެ. އިޖްތިމާޢީ ގޮތުން ބަލާއިރު، މި ކާޑުގެ ސަބަބުން އެހީ ބޭނުންވާ ފަރާތްތަކަށް ލިބޭ ޚިދުމަތްތައް ހަރުދަނާވެ، އެމީހުންގެ ހިތްހަމަޖެހުން އިތުރުވެގެންދާނެއެވެ. އަދި ޞިއްޙީ، ތަޢުލީމީ، އަދި ބޯހިޔާވަހިކަމުގެ ބޭނުންތައް ފުއްދިގެންދިއުމަކީ، މުޖުތަމަޢުގެ ހަމަޖެހުމަށް މަގުފަހިކޮށްދޭނެ ކަމެކެވެ.
ޒަކާތު ބެނެފެޝިއަރީ ކާޑަކީ ޒަކާތުގެ ނިޒާމު ޒަމާނީކޮށް، ޑިޖިޓަލްކުރުމަށް އެޅޭ މުހިއްމު ފިޔަވަޅެކެވެ. މި ކާޑުގެ ސަބަބުން އެހީ ދިނުމުގެ ކަންކަން ހަރުދަނާވެ، ޒަކާތުގެ ފައިސާ ބޭނުންކުރާ ގޮތްތައް ޓްރެކްކުރުމަށް ފަސޭހަވެގެންދާނެއެވެ.
މިއީ ޒަކާތުގެ ފައިސާގެ ހިސާބުތައް ސާފުކޮށް ބެލެހެއްޓުމަށާއި، ޒަކާތް ދޭ ފަރާތްތަކުގެ އިތުބާރު ހޯދުމަށްވެސް އެޅޭ މުހިއްމު ފިޔަވަޅެކެވެ. އިސްލާމީ މާލިއްޔަތުގެ އުސޫލުތަކާ އެއްގޮތަށް، އެންމެ ފައިދާހުރި ގޮތުގައި ޒަކާތުގެ ފައިސާ ބޭނުންކުރުމަށް މި ކާޑު އެހީތެރިވެދޭނެއެވެ.
ފަޤީރުންނާއި މިސްކީނުންނަށް ޚާއްސަކޮށްގެން ޒަކާތު ބެނެފެޝިއަރީ ކާޑެއް ތަޢާރަފްކުރުމަކީ، ދިވެހިރާއްޖޭގައި ޒަކާތުގެ ނިޒާމު ހަރުދަނާކޮށް، އެހީތެރިކަން ބޭނުންވާ ފަރާތްތަކަށް ދާއިމީ ހައްލެއް ހޯދައިދިނުމަށް އެޅޭ ވަރަށް މުހިއްމު ފިޔަވަޅެކެވެ.
މި ކާޑުގެ ސަބަބުން ޞިއްޙީ، ކާބޯތަކެތީގެ އަދި ތަޢުލީމީ އެހީތައް ފަސޭހަކަމާއެކު ލިބި، އެ ފަރާތްތަކުގެ ދިރިއުޅުމުގެ ފެންވަރު ރަނގަޅުވެގެންދާނެއެވެ. ޒަކާތު ހައުސްއިން މިފަދަ ޒަމާނީ ނިޒާމެއް ތަޢާރަފްކުރުމަކީ، އިސްލާމީ މާލިއްޔަތުގެ ރޮނގުން ރާއްޖެ ކުރިއަރަމުންދާކަން ހާމަކޮށްދޭ ކަމެކެވެ.
