މާލެ ސިޓީގެ މަގުތަކުގައި ގަވާއިދާ ޚިލާފަށް ޕާކުކޮށްފައި ހުރި 70 ދެފުރޮޅުލީ އުޅަނދު ޓޯކޮށްފައިވާ ކަމަށް ދިވެހި ފުލުހުންގެ ޚިދުމަތުން ބުނެފިއެވެ. މި އުޅަނދުތައް ޓޯކޮށްފައިވަނީ އާންމު ދަތުރުފަތުރަށާއި، ހިނގާބިނގާވެ އުޅޭ މީހުންނަށް ދަތިވާގޮތަށް ޕާކުކޮށްފައި ހުރުމުގެ ސަބަބުން ކަމަށް ފުލުހުން ހާމަކުރެއެވެ.
ފުލުހުން ބުނާގޮތުގައި، މާލޭގެ މަގުތަކުގައި ގަވާއިދާ ޚިލާފަށް ޕާކުކޮށްފައި ހުންނަ އުޅަނދުތައް ޓޯކުރުމުގެ މަސައްކަތްތައް ދަނީ ކޮންމެ ދުވަހަކުވެސް ކުރިއަށް ގެންދަމުންނެވެ. މި މަސައްކަތުގެ ދަށުން މިއަދު ޓޯކުރެވުނު 70 އުޅަނދަކީވެސް ގާނޫނާއި ޚިލާފަށް ޕާކުކޮށްފައި ހުރި އުޅަނދުތަކެކެވެ. ގަވާއިދާ ޚިލާފަށް ޕާކުކުރުމުގެ ސަބަބުން މަގުތައް ބާރުބޮޑުވެ، ދަތުރުފަތުރު ކުރުމަށް ދަތިތަކާ ކުރިމަތިވާ ހާލަތްތައް ގިނަވެފައިވާކަން ފާހަގަކުރެވެއެވެ.
ޚާއްސަކޮށް މާލޭގެ އެންމެ ބާރުބޮޑު މަގުތަކުގެ ތެރޭގައި ހިމެނޭ މަޖީދީމަގުގައި ގިނަ އަދަދެއްގެ އުޅަނދުތައް ގަވާއިދާ ޚިލާފަށް ޕާކުކުރަމުން ދިއުމަކީ ދަތުރުފަތުރު ކުރުމަށް ވަރަށް ބޮޑު ގޮންޖެހުމަކަށް ވެފައިވާ ކަމެކެވެ. އެހެންކަމުން، މި މައްސަލަ ހައްލުކުރުމަށްޓަކައި، ނުގަވާއިދުން ޕާކުކޮށްފައި ހުންނަ އުޅަނދުތައް ޓޯކުރުމުގެ މަސައްކަތް ފުލުހުން ދަނީ ކެނޑިނޭޅި ކުރިއަށް ގެންދަމުންނެވެ.
ގަވާއިދަށް ހުރުމަތްތެރިކޮށް ހިތުމަށް ފުލުހުންގެ އިލްތިމާސް
މިފަދަ އަމަލުތައް ހުއްޓުވުމަށް ފުލުހުން ވަނީ އާންމުންނަށް އިލްތިމާސްކުރައްވާފައެވެ. ފުލުހުންގެ އިލްތިމާސްގައި ބުނެފައިވަނީ، ކަފިހިހުރަސްތަކާއި ލައިން ދަމާފައިވާ ސަރަހައްދުތަކާއި ގޯޅިކަންމަތީގައި ޕާކްކުރުމުގެ ބަދަލުގައި، ޕާކްކުރުމަށްޓަކައި ހާއްސަ ކުރެވިފައިވާ ޒޯންތަކުގައި ޕާކްކުރެއްވުމަށް ހާއްސަ ސަމާލުކަން ދެއްވުމަށެވެ.
