ކޮރަޕްޝަނުގެ ތުހުމަތުތަކެއް ކުރެވޭ މައްސަލައެއް ތަހުގީގުކުރަމުންދާތީ، ހުޅުމާލެ ޕޮލިސްގެ ހެޑްގެ މަގާމުގައި ހުންނެވި އެސިސްޓެންޓު ކޮމިޝަނަރު (އޭސީޕީ) މުހައްމަދު ދާއޫދު، ވަޒީފާގެ މަސްއޫލިއްޔަތުތަކުން ވަގުތީ ގޮތުން އެކަހެރިކޮށް، ހަމައެކަނި ފުލުހުންގެ ކޮމިޝަނަރަށް ރިޕޯޓްކުރާ ގޮތަށް ހަމަޖައްސައިފި ކަމަށް ދިވެހި ފުލުހުންގެ ހިދުމަތުން ބުނެފިއެވެ.
ފުލުހުން ހާމަކުރެއްވި ގޮތުގައި، މި ނިންމުން ވަނީ މި މަހުގެ 1 ވަނަ ދުވަހުން ފެށިގެން ތަންފީޒުކޮށްފައެވެ. އަދި ދާއޫދުގެ ބަދަލުގައި ހުޅުމާލެ ޕޮލިސްގެ ހެޑްގެ މަގާމަށް ވަނީ އޭސީޕީ އަހުމަދު މުހައްމަދު އައްޔަންކޮށްފައެވެ.
ދާއޫދާ ގުޅޭ މައްސަލަތައް ތަހުގީގުކުރަނީ
ފުލުހުން ވިދާޅުވި ގޮތުގައި، ދާއޫދާއި ގުޅުންހުރި މައްސަލަތައް ރައްޔިތުންގެ މަޖިލީހުގެ މާލިއްޔަތު ކޮމިޓީންނާއި، ނޭޝަނަލް އިންޓެގްރިޓީ ކޮމިޝަނުން (އެންއައިސީ) ވެސް ދަނީ ބަލަމުންނެވެ. މީގެއިތުރުން، އެމްއެމްޕީއާރުސީގެ ކޮރަޕްޝަން މައްސަލައިގައި ދާއޫދު ހިމެނޭހެން އިތުރު ފުލުހުންނަށް ތުހުމަތުކުރެވޭތީ، މިކަމާއި ގުޅިގެން ތަހުގީގުތައް ކުރިއަށްދާކަމަށް ފުލުހުން ވިދާޅުވިއެވެ. މި މައްސަލަތަކުގައި ވަކި ގޮތެއް ނިމެންދެން ވަޒީފާގެ މަސްއޫލިއްޔަތުތަކުން ދާއޫދު އެކަހެރިކޮށްލީއެވެ.
އެމްއެމްޕީއާރުސީގެ ހިޔާނާތުގެ ތުހުމަތުތައް
މާލިއްޔަތު ކޮމިޓީގެ ބައްދަލުވުމެއްގައި، މެންބަރެއް ކަމަށްވާ ނާޒިމް ވަނީ ދާއޫދުގެ މައްޗަށް ސީރިއަސް ތުހުމަތުތަކެއް ކުރައްވައިފައެވެ. ނާޒިމް ވިދާޅުވި ގޮތުގައި، 2023 ވަނަ އަހަރާއި 2024 ވަނަ އަހަރާ ދޭތެރޭގައި ދާއޫދުގެ ބޭންކް އެކައުންޓަށް އާމްދަނީގެ ވަސީލަތެއް ނޭނގޭ ގޮތަށް ގިނަ އަދަދެއްގެ ފައިސާ ޖަމާވެފައިވެއެވެ. އަދި މި ފައިސާއިން ޖުމްލަ 14.6 މިލިއަން ރުފިޔާގެ އެސެޓް ދާއޫދު އުފައްދާފައިވާ ކަމަށާއި، މި އެސެޓްތަކަކީ އެމްއެމްޕީއާރްސީގެ ހިޔާނާތުގެ ފައިސާއިން ދާއޫދު ނެގި މަންފާކަމަށް ނާޒިމް ތުހުމަތުކުރެއްވިއެވެ.
ދާއޫދުގެ ދިފާއު އަދި ވަކީލުންގެ ބަޔާން
ނަމަވެސް، މި ތުހުމަތުތައް ދޮގުކޮށް، ދާއޫދުގެ ފަރާތުން އާންމު ކުރި ބަޔާނެއްގައި ވަނީ މަޖިލީހުގެ މާލިއްޔަތު ކޮމިޓީގައި ނާޒިމް ދެއްކެވީ ވަރަށް ޒިންމާދާރުކަން ކުޑަ، އެއްވެސް ހަގީގަތެއް ނެތް ވާހަކަތަކެއް ކަމަށެވެ. ދާއޫދުގެ ވަކީލުންގެ ޓީމުން ބުނީ، އޭނާގެ އެކައުންޓަށް ގޮތް ނޭނގޭ އެއްވެސް ފައިސާއެއް ވެދެފައިނުވާނެ ކަމަށާއި، ގާނޫނާއި ހިލާފު އެއްވެސް މުއާމަލާތެއް އެކައުންޓް މެދުވެރިކޮށް ހިނގާފައިނުވާނެ ކަމުގެ ފުރިހަމަ ޔަގީންކަން ދޭކަމަށެވެ.
އެމްއެމްޕީއާރުސީގެ ހިޔާނާތުގެ އެއްވެސް ފައިސާއަށް ދާއޫދަށް ލިބިފައި ނުވާކަމަށް ބަޔާނުގައި ބުނެފައި ވެއެވެ. އަދި މިކަން ދައުލަތުގެ އިދާރާތަކުން ކުރިޔަށް ގެންދިޔަ ހިޔާނާތުގެ ތަހުގީގުތަކުންނާއި، ކުރީގެ ނައިބު ރައީސް އަހުމަދު އަދީބު އަބްދުލްޤަފޫރު ދީފައިވާ ބަޔާންތަކުން އެނގޭނެކަމަށް ދާއޫދުގެ ފަރާތުން ހާމަކުރިއެވެ. ދާއޫދު މިހާރު ހުންނެވީ ހަމައެކަނި ފުލުހުންގެ ކޮމިޝަނަރަށް ރިޕޯޓްކުރާ ގޮތަށް ކަމަށް ފުލުހުން ވިދާޅުވިއެވެ.
