ބޭންކް އޮފް މޯލްޑިވްސް (ބީއެމްއެލް) އިން ރާއްޖޭގެ ޑިޖިޓަލް އިޤްތިޞާދު ކުރިއެރުވުމަށް އަދި އީޖާދީ ބަދަލެއް ގެނައުމަށް ކެނޑިނޭޅި ކުރަމުންދާ މަސައްކަތްތަކުގެ އަގުވަޒަންކުރުމުގެ ގޮތުން، މާސްޓަރކާޑުން ވަނީ އެ ބޭންކަށް އެވޯޑެއް އަރުވާފައެވެ.
މި އެވޯޑަކީ، ބީއެމްއެލްއިން ’ޑިޖިޓަލް ކަންޓްރީ ޕާޓްނަރޝިޕް‘ ގެ ދަށުން ރާއްޖޭގެ މާލީ ދާއިރާއަށް ގެންނަމުންދާ ކުރިއެރުންތަކުގެ ހެއްކެކެވެ. ސިންގަޕޫރުގައި ބޭއްވި ’ޑިޖިޓަލް ފައިނޭންސް ލީޑަރޝިޕް‘ އިވެންޓެއްގައި މި އެވޯޑް ބޭންކުގެ ސީއީއޯ އަދި މެނޭޖިންގ ޑިރެކްޓަރ މުޙައްމަދު ޝަރީފާ ހަވާލުކޮށްދެއްވީ މާސްޓަރކާޑްގެ ސްރީލަންކާ އަދި ރާއްޖޭގެ ކަންޓްރީ މެނޭޖަރ، ސަންދުން ހަޕުގޮޑާއެވެ. މި ރަސްމިއްޔާތުން ދައްކުވައިދެނީ ރާއްޖޭގެ ޑިޖިޓަލް މުސްތަޤްބަލު ބައްޓަންކުރުމުގައި ބީއެމްއެލް އަދާކުރާ މުހިންމު ދައުރެވެ.
ބީއެމްއެލްއަށް މި އެވޯޑް ލިބުމުގައި އެންމެ ބޮޑު ދައުރެއް އަދާކުރީ، މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީއާއި މާސްޓަރކާޑު އަދި ބޭންކް އޮފް މޯލްޑިވްސްއާއެކު ސޮއިކުރެވުނު ’ޑިޖިޓަލް ކަންޓްރީ ޕާޓްނަރޝިޕް‘ އެވެ.
މި ޕާޓްނަރޝިޕަކީ، ދިވެހިރާއްޖޭގައި ޑިޖިޓަލް ބަދަލުތައް ގެނައުމަށާއި، އީޖާދީ ކަންކަން ކުރިއެރުވުމަށް ބީއެމްއެލްއިން ވެފައިވާ ވައުދު ފުއްދުމަށް ކުރާ މަސައްކަތްތަކުގެ ރަމްޒެކެވެ. މި އެއްބަސްވުމުގެ ދަށުން، ރާއްޖޭގެ ޑިޖިޓަލް އިންފްރާސްޓްރަކްޗަރ ޒަމާނީކުރުމަށާއި، ރައްކާތެރި، އަދި ހަލުވި ޑިޖިޓަލް ޚިދުމަތްތައް ފުޅާކުރުމަށް ބޮޑެތި މަސައްކަތްތަކެއް ދަނީ ކުރެވެމުންނެވެ.
ޑިޖިޓަލް ކަންޓްރީ ޕާޓްނަރޝިޕްގެ މައިގަނޑު އަމާޒަކީ، އަމިއްލަ ފަރުދުންނާއި، ވިޔަފާރިތަކާއި، މުޖުތަމަޢުތަކަށް އިތުރު ފުރުސަތުތައް ހޯދައިދިނުމެވެ. ބީއެމްއެލްއާއި މާސްޓަރކާޑް ގުޅިގެން މަސައްކަތްކުރަމުންދަނީ، މާލީ ޚިދުމަތްތައް ފަސޭހަ އަދި އެންމެންނަށް ވެސް ލިބޭނެ ގޮތަކަށް ބައްޓަންކުރުމަށެވެ.
މީގެ ތެރޭގައި ޑިޖިޓަލް ދައްކާލުމުގެ ނިޒާމުތައް ހަރުދަނާކުރުމާއި، ސައިބަރ ސެކިއުރިޓީގެ ފިޔަވަޅުތައް ވަރުގަދަކުރުން ހިމެނެއެވެ. މި މަސައްކަތްތަކުގެ ސަބަބުން ރާއްޖޭގެ އިޤްތިޞާދީ ހަރަކާތްތަކަށް ބޮޑު ހަލުވިކަމެއް ލިބި، ވިޔަފާރިތަކަށް އާ ދޮރުތައް ހުޅުވިގެންދާނެއެވެ.
ބޭންކް އޮފް މޯލްޑިވްސް އާއި މާސްޓަރކާޑުގެ ގުޅުމަކީ މިއަދު ފެށުނު ގުޅުމެއް ނޫނެވެ. 2002 ވަނަ އަހަރު ބީއެމްއެލްއަކީ މާސްޓަރކާޑުގެ ޕްރިންސިޕަލް މެންބަރަކަށް ވުމަށް ފަހު، ރާއްޖޭގެ ފައިސާ ދެއްކުމުގެ ނިޒާމަށާއި، މާލީ ދާއިރާއަށް ބޮޑެތި ބަދަލުތައް ގެނައުމަށް ދެ ފަރާތުން ގުޅިގެން ގިނަ މަޝްރޫއުތަކެއްގައި މަސައްކަތްކޮށްފައިވެއެވެ. މި ދިގު މުއްދަތުގެ ސްޓްރެޓީޖިކް ގުޅުމުގެ ސަބަބުން، ދިވެހި ރައްޔިތުންނަށް ދުނިޔޭގެ ފެންވަރުގެ މާލީ ޚިދުމަތްތައް ފޯރުކޮށްދިނުމުގެ މަގު ފަހިވެފައިވެއެވެ.
ބީއެމްއެލްއާއި މާސްޓަރކާޑުގެ އެއްބާރުލުމުގެ ދަށުން ގެނެސްފައިވާ އީޖާދީ ހައްލުތަކުގެ ތެރެއިން ފާހަގަކޮށްލެވޭ އެއް ކަމަކީ، ރާއްޖެ ޓްރާންސްޕޯޓް ލިންކް (އާރްޓީއެލް) ގައި ފައިސާ ދެއްކޭނެ ހާއްސަ އިންތިޒާމެއް ހަމަޖެއްސުމެވެ. މިއީ ’ސްމާޓް ސިޓީ‘ ހައްލުތަކުގެ ތެރެއިން، ދަތުރުފަތުރުގެ ނިޒާމު ޑިޖިޓަލައިޒްކޮށް، ރައްޔިތުންނަށް ލުއިފަސޭހަ ގޮތްތައް ހޯދައިދިނުމަށް ކުރެވުނު މަސައްކަތެކެވެ.
މިފަދަ ޢަމަލީ މަސައްކަތްތަކުން ދައްކުވައިދެނީ، ބީއެމްއެލްއަކީ ހަމައެކަނި ބޭންކިންގ ޚިދުމަތްދޭ ތަނެއް ނޫންކަމާއި، ޤައުމީ ފެންވަރުގައި ޓެކްނޮލޮޖީގެ ބަދަލުތައް ގެނައުމަށް އިސްނަގައިގެން މަސައްކަތްކުރާ މުއައްސަސާއެއްކަމެވެ.
މާސްޓަރކާޑްގެ ފަރާތުން މި އެވޯޑް ލިބުމަކީ، ސްޓްރެޓީޖިކް ޕާޓްނަރޝިޕްތައް ބިނާކޮށް، ޓެކްނޮލޮޖީއާއި އެއްބާރުލުމުގެ ބޭނުންކޮށްގެން އީޖާދީ ޑިޖިޓަލް ހައްލުތައް ހޯދައި ރާއްޖޭގެ އިޤްތިޞާދާއި ޓެކްނޮލޮޖީ ކުރިއަރުވަން ބޭންކުން އަދާކުރާ އިސް ދައުރުގެ ހެއްކެކެވެ. ބޭންކް އޮފް މޯލްޑިވްސްއިން ދަނީ ރާއްޖޭގެ ޑިޖިޓަލް މުސްތަޤްބަލަށް އިންވެސްޓްކޮށް، ޤައުމީ ތަރައްޤީއަށް މުހިންމު ދައުރެއް އަދާކުރަމުންނެވެ. މިފަދަ ބައިނަލްއަޤްވާމީ އިޢުތިރާފަކީ، ބީއެމްއެލްގެ މުވައްޒަފުންނާއި، ޙިއްޞާދާރުންގެ މަސައްކަތުގެ ކާމިޔާބީއެވެ.
