ދިވެހިރާއްޖެއަކީ އިސްލާމީ ޝަޚުޞިއްޔަތެއް ދަމަހައްޓައި، އިސްލާމީ ޙަޟާރަތަށް އަބަދުމެ އިސްކަންދޭ ޤައުމެކެވެ. މިގޮތުން، ރާއްޖޭގެ ރައީސުލްޖުމްހޫރިއްޔާ ޑރ. މުޙަންމަދު މުޢިއްޒުގެ ސަރުކާރުން އިސްލާމީ ކަންތައްތަކަށް ދެއްވާ ސަމާލުކަން ފާހަގަކޮށްލެވެއެވެ.
ސަރުކާރުގެ ދެ އަހަރުގެ ދައުރު ނިމިގެންދާއިރު، ރާއްޖޭގެ އިސްލާމީ ޝަޚުޞިއްޔަތު ވަރުގަދަކުރުމަށްޓަކައި، ޚާއްޞަކޮށް މިސްކިތްތައް ޒަމާނީ ފެންވަރަކަށް ތަރައްޤީކުރުމަށް ގިނަ މަސައްކަތްތަކެއް ވަނީ ފަށާފައެވެ.
އިސްލާމީ ކަންތައްތަކާ ބެހޭ ވަޒީރު ޑރ. ޝަހީމް އަލީ ސަޢީދު ވިދާޅުވެފައިވާ ގޮތުގައި، މި ރިޔާސީ ދައުރު ނިމޭއިރު، މާލޭ ސަރަޙައްދުގައި ބާ އެއްވެސް މިސްކިތެއް ނުހުންނާނެއެވެ. މިއީ ސަރުކާރުން އިސްލާމީ ޝަޢާއިރުތަކަށް ދެއްވާ އަހަންމިއްޔަތުގެ ހެއްކެކެވެ.
މާލޭ ސަރަޙައްދުގެ މިސްކިތްތައް އާކުރުން
ސަރުކާރުގެ މި ޕްރޮގްރާމުގެ އެންމެ ބޮޑު ސަމާލުކަމެއް ދެވިފައިވަނީ މާލޭ ސަރަޙައްދުގައި ހުރި ބާ މިސްކިތްތައް އާކޮށް، ޒަމާނީ ފެންވަރަށް ބިނާކުރުމަށެވެ. މިނިސްޓްރީން ދެއްވާފައިވާ މަޢުލޫމާތަށް ބަލާއިރު، ސަގާފީ ގޮތުން ރައްކާތެރިކުރާން ޖެހޭ މިސްކިތެއް ފިޔަވައި، މާލޭ ސަރަޙައްދުގައި ހުރި ހުރިހައި ބާ މިސްކިތެއް އަލުން ބިނާކުރުމުގެ މަސައްކަތް މިހާރު ވަނީ ނިމުމަކާ ގާތްވެފައެވެ. މިއީ މާލޭގެ ރަށްވެހިންނަށް ފަސޭހަކަމާއެކު އަޅުކަންކުރުމުގެ ފުރުޞަތު ފުޅާކޮށްދޭނެ ކަމެކެވެ.
މިގޮތުން، މާލޭގައި ހުރި މަސްޖިދުލްބަރުބަރީ ބާވެފައި ވަނިކޮށް، އެ މިސްކިތް އަލުން ޒަމާނީ ފެންވަރަށް ޢިމާރާތްކުރުމުގެ މަސައްކަތް މިހާރު ނިމެމުންދެއެވެ. އަދި މަސްޖިދުއްޒިކުރާގެ ގޮތުގައި މިހާރު ހުރި ވަގުތީ ޢިމާރާތުގެ ބަދަލުގައި، ޒަމާނީ ފެންވަރުގެ އާ މިސްކިތެއް ބިނާކުރުމުގެ މަސައްކަތް ވަނީ ކުންފުންޏަކާ ޙަވާލުކުރެވިފައެވެ.
މީގެ އިތުރުން، މާލޭ-ވިލިނގިލީގައި އެންމެ ފުރަތަމަ ބިނާކުރެވުނު މަސްޖިދުއްސަލާމުގެ ޢިމާރާތް ބާވެ ހަލާކުވެފައިވާތީ، އެ ތަނުގައި ޒަމާނީ މިސްކިތެއް އެޅުމުގެ މަސައްކަތް ވެސް ވަރަށް އަވަހަށް ފެށޭނެކަމަށް މިނިސްޓްރީން ވަނީ ހާމަކުރައްވާފައެވެ.
އިސްލާމީ ދަޢުވަތު ފެތުރުވުމަށް ޚާއްޞަ ސަމާލުކަން
މިސްކިތްތައް އާކުރުމުގެ މަސައްކަތުގެ އިތުރުން، އިސްލާމީ ދަޢުވަތު ފެތުރުވުމަށް ޚާއްޞަ މަރުކަޒުތައް ޤާއިމުކުރުމަށް ސަރުކާރުން ދަނީ މަސައްކަތްކުރަމުންނެވެ. މިގޮތުން، އިސްލާމީ ދަޢުވަތު ފެތުރުއްވާނެ މަރުކަޒަކާއެކު، ޒަމާނީ ފެންވަރުގެ ބޮޑު މިސްކިތެއް މާފަންނު ބޮޑުގެ ހުރި ބިމުގައި ބިނާކުރުމަށްޓަކައި ރައީސުލްޖުމްހޫރިއްޔާ ޚުދު ވަނީ ބިންގާ އަޅުއްވައި ދެއްވައިފައެވެ. މިއީ އިސްލާމީ ދަޢުވަތަށް އެ މަނިކުފާނު ދެއްވާ ޚާއްޞަ ސަމާލުކަން ރަމްޒުކޮށްދޭ ކަމެކެވެ. މިފަދަ މަރުކަޒުތަކުގެ ސަބަބުން އިސްލާމީ ޢިލްމާއި ހޭލުންތެރިކަން އިތުރުކުރުމަށް ބޮޑު އެހީއަކަށް ވެގެންދާނެއެވެ.
ހުޅުމާލޭގެ ތަރައްޤީއާއި ރައްޔިތުންގެ ބައިވެރިވުން
މާލޭގެ އިތުރުން ހުޅުމާލޭގެ ދެ ފިޔަވަހީގައި ވެސް ހުރި ވަގުތީ މިސްކިތްތަކުގެ ބަދަލުގައި އަދި މުޅިން އަލަށް އާ މިސްކިތްތައް ބިނާކުރުމުގެ މަސައްކަތްތައް ދަނީ ކުރިއަށްނެވެ. މި މަސައްކަތްތައް އިސްލާމީ ކަންތައްތަކާ ބެހޭ ވުޒާރާގެ ބެލުމުގެ ދަށުން ކުރިއަށް ގެންދަނީ، ތަނަވަސްކަމުގެ އަހުލުވެރީންގެ ތެރެއިން މިފަދަ ކަންކަމަށް ހޭދަކުރައްވާން އެދިވަޑައިގަންނަވާ ފަރާތްތައް ބައިވެރިކުރައްވައިގެން، އެ ބޭފުޅުންގެ އެހީތެރިކަމާއެކުގައެވެ.
މިނިސްޓްރީން ފާހަގަކުރާ ގޮތުގައި، މިއީ ސަރުކާރުން އިސްލާމީ ކަންތައްތަކަށް ދެއްވާ ޚާއްޞަ އަހަންމިއްޔަތު ދިވެހި ރައްޔިތުން ވެސް ބަލައިގަންނަކަމުގެ ހެއްކެކެވެ. ރައްޔިތުންގެ ބައިވެރިވުމާއެކު މިފަދަ ބޮޑެތި މަޝްރޫޢުތައް ކުރިއަށް ގެންދިއުމަކީ، އިސްލާމީ ޝަޢާއިރުތައް ދިރުވުމަށް ޤައުމީ ފެންވަރުގައި ލިބޭ ބާރެކެވެ.
ރައީސް ޑރ. މުޙަންމަދު މުޢިއްޒުގެ ޒަޢާމަތުގެ ފުރަތަމަ ދެ އަހަރުގެ ތެރޭގައި މިސްކިތްތައް ޒަމާނީ ފެންވަރަކަށް ތަރައްޤީކުރުމަށް ފަށާފައިވާ މަސައްކަތްތަކަކީ، ދިވެހިރާއްޖޭގެ އިސްލާމީ ޝަޚުޞިއްޔަތު ރަމްޒުކޮށްދޭ އަދި އިސްލާމީ ހައިބަތު ދައްކުވައިދޭ މުހިންމު މަސައްކަތްތަކެކެވެ.
ސަރުކާރުގެ އަމާޒަކީ މި ފަސް އަހަރު ނިމޭއިރު، މާލޭ ސަރަޙައްދުގައި ބާ އެއްވެސް މިސްކިތެއް ނުބަހައްޓައި، ރާއްޖޭގެ އެކި ކަންކޮޅުތަކުގައި ވެސް ޒަމާނީ މިސްކިތްތަކާއި އިސްލާމީ މަރުކަޒުތައް ފުރިހަމަ ވަސީލަތްތަކާ އެކު ޤާއިމުކުރުމެވެ. މި މަސައްކަތްތަކުގެ ސަބަބުން ދިވެހިންގެ ދީނީ އަޅުކަންތައް ފަސޭހަވެ، އިސްލާމީ ޙަޟާރަތު އިތުރަށް ވަރުގަދަވެގެންދާނެކަމީ ޝައްކެއް ނެތް ކަމެކެވެ.
