“ހިތަށް ދަތިކުރުވި ކަޅު ކޮންމެ ރެއެއްވެސް ނިމިދާނީ ފަތިހަށެއް އަމުދުން!” މި ފާހަގަކޮށްލީ ޅެންވެރިއެއްގެ ގަލަމުން ބަޔާންކޮށްފައިވާ އުންމީދާއި، އަޒުމާއި، ކުރިމަގުގެ ފޮނި ހުވަފެންތައް ހިމެނޭ ބަސްފުޅެކެވެ. ދިރިއުޅުމުގައި ދިމާވާ ދަތިތަކާއި، ގޮންޖެހުންތަކަކީ ވަގުތީ ކަންކަމެއް ކަމުގައި ދައްކުވައިދޭ މި ޢިބާރާތަކީ، ޤައުމީ ތަރައްޤީގެ މަގުގައި ކުރިމަތިވާ ކޮންމެ ހުރަހަކަށް ވެސް ހައްލެއް ލިބި، އަލިގަދަ ފަތިހެއް އަންނާނެ ކަމުގެ ޔަޤީންކަން ދޭ ޢިބާރާތެކެވެ. ޚާއްޞަކޮށް، ރާއްޖޭގެ ތަޢުލީމީ، އިޖުތިމާޢީ، އަދި އިޤްތިޞާދީ ދާއިރާއިން ކުރިމަތިވެފައިވާ ގޮންޖެހުންތަކަށް ހައްލު ހޯދުމަށް ސަރުކާރުން ކުރަމުންދާ މަސައްކަތްތަކަކީ، މި ބަސްފުޅުގެ ޙަޤީޤީ މާނަ ދައްކުވައިދޭ މިސާލުތަކެކެވެ.
ތަޢުލީމީ ދާއިރާގެ އިންޤިލާބު
ޤައުމެއްގެ ތަރައްޤީގެ ބިންގަލަކީ ތަޢުލީމެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެފައިވާ ފަދައިން، ވަށާޖެހޭ ތަރައްޤީއަކަށް ވާނީ ޅަދަރީންގެ ފިކުރު ތަރައްޤީކުރުމަށްޓަކައި، ފިކުރު ތަރައްޤީކުރުމަށް ތަޢުލީމީ ސިޔާސަތެއް އެކުލަވާލައިގެންނެވެ. އަދުގެ ސަރުކާރުގެ ތަޢުލީމީ ސިޔާސަތުގެ ދަށުން ދިވެހި އައިޑެންޓިޓީ ހިމާޔަތްކޮށް، ޤައުމީ ރޫޙު އާލާކުރުމަށްޓަކައި “ޤައުމިއްޔަތު” މާއްދާ ތަޢާރަފުކޮށްފައިވަނީ، އަންނަންއޮތް ޖީލުތަކަށް ދިވެހިވަންތަކަން ފޯރުކޮށްދިނުމުގެ މުހިންމު ވިސްނުމެއްގެ ތެރެއިންނެވެ.
ތަޢުލީމީ ދާއިރާގެ ދަތިކަން ކުޑަކުރުމަށްޓަކައި، ދިވެހި މުދައްރިސުންގެ ޢަދަދު އިތުރުކުރުމަށް ސަރުކާރުން ވަނީ ބޮޑު މަސައްކަތެއް ފަށާފައެވެ. މިހާރު 190 ދަރިވަރުންނަށް މުދައްރިސުކަމުގެ ތަމްރީނު ދެމުންދާއިރު، މިއީ މި ދާއިރާގައި ދިވެހިންގެ ބައިވެރިވުން އިތުރުކުރުމަށް އެޅޭ މުހިންމު ފިޔަވަޅެކެވެ.
މީގެ އިތުރުން، ދަރިވަރުންގެ ކާމިޔާބީގެ ނިސްބަތް މަތިކުރުމަށް ބޮޑެތި އަމާޒުތަކެއް ވަނީ ކަނޑައަޅާފައެވެ. 2023 ވަނަ އަހަރު ގްރޭޑް 10 ނިންމާ ކުދިން ފާސްވާ ނިސްބަތް 31% ގައި ހުރި ނަމަވެސް، 2025 އަށް އެ އަދަދު 49% އަށް މަތިކުރުމުގެ ޢަޒުމުގައި ސަރުކާރުން މަސައްކަތް ކުރަމުންދެއެވެ.
ދަރިވަރުންނަށް އަމާޒުކުރެވޭ އާ މަގުތައް
ސްކޫލު ނިންމާ ދަރިވަރުންނަށް އޭ-ލެވެލް ފެންވަރަށް ކުރިއަށްދެވޭނެ އެކެޑަމިކް، ވޮކޭޝަނަލް އަދި ވަރކް ބޭސްޑް (އެޕްރެންޓިސްޝިޕް) މި ތިން މަގު ކަނޑައެޅުމަކީ، ކޮންމެ ދަރިވަރަކަށް ވެސް އެމީހެއްގެ ޤާބިލުކަމާ އެކަށޭނަ މަގެއް އިޚްތިޔާރުކުރުމުގެ ފުރުޞަތު ފަހިކޮށްދޭ ކަމެކެވެ.
ގްރޭޑް 10 ގެ ބަދަލުގައި ގްރޭޑް 12 އަކީ ސްކޫލު ނިންމާ އަހަރަށް ހެދުމުގެ ވިސްނުމަކީ، ދަރިވަރުންނަށް އިތުރު ދެ އަހަރު ދިރާސާކުރުމުގެ ފުރުޞަތު ދިނުމުގެ އިތުރުން، އެމީހުންގެ މުސްތަޤްބަލަށް ތައްޔާރުވުމަށް ލިބޭ ރަނގަޅު ފުރުޞަތެކެވެ. އަދި ދިރާސީ އައު އަހަރު ޖެނުއަރީ މަހު ފެށޭގޮތަށް ބަދަލުކުރުމަކީ، ކުރީގެ އުޞޫލުތަކަށް އަނބުރާ ގޮސް، ޢާންމުކޮށް ހުރި ދަތިތަކަށް ހައްލު ހޯދުމުގެ މަސައްކަތެކެވެ.
އަންނަ އަހަރު ރާއްޖޭގައި ފުރަތަމަ ފަހަރަށް ޕްރައިމަރީ ދަރިވަރުން ބައިނަލްއަޤްވާމީ ޓެސްޓެއްގައި ބައިވެރިވެ ބެންޗްމާކް ކުރެވޭނެކަމީ، ދިވެހި ތަޢުލީމީ ނިޒާމުގެ ފެންވަރު ބައިނަލްއަޤްވާމީ މިންގަނޑުތަކާ އަޅާކިޔުމަށް ލިބޭ ފުރުޞަތެކެވެ.
މީގެ އިތުރުން، ހުޅުމާލޭގައި އައު ސްކޫލެއް ހަދާ ނިމި އަންނަ އަހަރު ހުޅުވުމާއި، މަތީ ތަޢުލީމު ފުޅާކުރުމަށް ގައުމީ ޔުނިވަރސިޓީގެ 26 ކެމްޕަސް މަޝްރޫޢާއި، އިސްލާމީ ޔުނިވަރސިޓީގެ 12 ކެމްޕަސް މަޝްރޫޢެއް ފެށުމަކީ، ތަޢުލީމީ ދާއިރާގެ ދަތިކަން ނައްތާލުމަށް ކުރެވޭ ބޮޑެތި މަސައްކަތްތަކެކެވެ.
ޒުވާނުންނާއި މުޖުތަމަޢުގެ މައްސަލަތައް ހައްލުކުރުން
ޤައުމީ މައްސަލަތައް އެންމެ ބުޑުން ހައްލުކޮށް ދާއިމީ ނަތީޖާ ނެރުމަށް ސަރުކާރުން މަސައްކަތްކުރާކަން ރައީސުލްޖުމްހޫރިއްޔާ ވަނީ ފާހަގަކުރައްވާފައެވެ. ޚާއްޞަކޮށް މަސްތުވާތަކެތީގެ މައްސަލައަކީ، މުޖުތަމަޢަށް ކަޅު ރެއެއް ގެނެސްދޭ މައްސަލައެކެވެ.
މި މައްސަލަ ހައްލުކުރުމުގެ މައިގަނޑު ސިޔާސަތަކީ ޒުވާނުން އެކަމުން ސަލާމަތްކޮށް، މުޖުތަމަޢަށް އަނބުރާ ނެރުމަށް ރިހެބިލިޓޭޝަންގެ ފުރުސަތުތައް ފަހިކުރުމެވެ. މިއީ، ޒުވާނުންނަށް އައު ދިރިއުޅުމެއް ފެށުމުގެ އުންމީދު ދިނުމަށް ކުރެވޭ މަސައްކަތެކެވެ.
ޒުވާނުން ބާރުވެރިކުރުވުމަށް ވަޠަނީ ޚިދުމަތާއި، އެޕްރެންޓިސްޝިޕް، އަދި ކޮމިއުނިޓީ އަޕްސްކިލިންގ ޕްރޮގްރާމްތަކުގެ ފުރުސަތުތައް ފަހިކޮށްދީ، މާލީ އެހީތެރިކަން ވެސް ދެމުންދެއެވެ. ކުޅިވަރާއި ހަށިހެޔޮކަން ކުރިއެރުވުމަށް ކޮންމެ ރަށެއްގައި ފިޓްނަސް އެންޑް ރެކްރިއޭޝަން ސެންޓަރުތައް ބިނާކުރުމަކީ، ޒުވާނުންނަށް ހެޔޮ ބަދަލުތަކެއް ގެނެސްދޭނެ ކަމެކެވެ.
މީގެ އިތުރުން، ކުޅިވަރުގެ ޤާނޫނަށް އިސްލާހު ގެނެސް އެތުލީޓުންނާއި އޮފިޝަލުންގެ މުސާރަ ބޮޑުކުރުމާއި، ސިއްޙީ އިންޝުއަރެންސް ހަމަޖެއްސުމުގެ މަސައްކަތަކީ، މި ދާއިރާގެ ދަތިތަކަށް ލިބޭ ހައްލެކެވެ.
ބޯހިޔާވަހިކަމުގެ އުންމީދުގެ އަލިކަން
ބޯހިޔާވަހިކަމަކީ ދިވެހި ރައްޔިތުންނަށް އެންމެ ބޮޑަށް ކުރިމަތިވެފައިވާ އެއް ދަތިކަމެވެ. އަދުގެ ސަރުކާރުގެ އެންމެ މުހިންމު ވަޢުދަކީ ވެސް މި މައްސަލަ ދާއިމަށް ހައްލުކުރުމެވެ. މާލޭގެ ބޯހިޔާވަހިކަމުގެ މައްސަލަ ހައްލުކުރުމަށް އަލަށް ފަށާ މަޝްރޫޢުތަކާއެކު، މިހާރު 13 ރަށެއްގައި 825 ހައުސިންގ ޔުނިޓު އެޅުމަށް ސޮއިކޮށްފައިވެއެވެ.
މީގެ އިތުރުން، ކުރީ ސަރުކާރުން ފަށައި ނުނިމި ހުރި ޕްރޮޖެކްޓުތައް ނިންމުމުގެ މަސައްކަތް ކުރަމުންދާއިރު، އެފްޑީސީގެ 4000 ފްލެޓުގެ ތެރެއިން މިހާރު ވެސް 84 އާއިލާއަށް ތަޅުދަނޑި ހަވާލުކޮށްފައިވެއެވެ. ސަރުކާރުގެ އަމާޒަކީ އަންނަ ރަމަޟާންމަހުގެ ކުރިން ހުރިހާ ފްލެޓުތަކެއް ހަވާލުކުރުމެވެ. ގޯތީގެ މައްސަލައަށް ހައްލެއް ހޯދުމުގެ ގޮތުން، ހުޅުމާލެއާއި ގުޅިފަޅުން ގޯތި ދޫކުރުމަކީ، ރައްޔިތުންގެ ހިތްތަކަށް ލުއިކަމާއި އުފާވެރިކަން ގެނެސްދޭނެ ކަމެކެވެ.
ދިވެހިރާއްޖޭގެ ތަރައްޤީގެ މަގުގައި ކުރިމަތިވާ ކޮންމެ ދަތިކަމަކީ، އެއަށްވުރެ ބޮޑު ކާމިޔާބީއަކަށް މަގުފަހިކޮށްދޭނެ ވަގުތީ ހުރަހެކެވެ. ތަޢުލީމީ ދާއިރާގެ އިންޤިލާބީ ބަދަލުތަކާއި، ޒުވާނުން ބާރުވެރިކުރުވުމުގެ ޕްރޮގްރާމްތައް، އަދި ބޯހިޔާވަހިކަމުގެ މައްސަލައަށް ދާއިމީ ހައްލެއް ހޯދުމަށް ކުރެވޭ މަސައްކަތްތަކުން ދައްކުވައިދެނީ، “ހިތަށް ދަތިކުރުވި ކަޅު ކޮންމެ ރެއެއްވެސް ނިމިދާނީ ފަތިހަށެއް އަމުދުން!” ކަމެވެ. މި މަސައްކަތްތަކުގެ ނަތީޖާއަކީ، ދިވެހި ޤައުމަށް އުޖާލާ، އުފާވެރި މުސްތަޤްބަލެއް ގެނެސްދިނުމެވެ.
