ކޮންމެހެން ކުރަންޖެހިއްޖެ ހާލަތުގައި ނޫނީ ދަތުރު ނުކުރުމަށް ލަންކާގައި ހުންނަ ރާއްޖޭގެ ހައިކޮމިޝަނުން އެދިފި

ސްރީލަންކާގައި ހުންނަ ރާއްޖޭގެ ހައިކޮމިޝަނުން، އެ ޤައުމުގައި ދިރިއުޅޭ ދިވެހިންނަށް އަންނަނީ ތޫފާން ”ޑިޓުވާ“ގެ ސަބަބުން ކުރިމަތިވެފައިވާ ނުރައްކާތެރި މޫސުމީ ހާލަތާ ގުޅިގެން ދަތުރުފަތުރު ކުރުން ހުއްޓާލުމަށް އިލްތިމާސްކޮށްފިއެވެ.

ހައިކޮމިޝަނުން ނެރުނު ބަޔާނެއްގައި ބުނެފައިވަނީ، ކޮންމެހެން ކުރަންޖެހިއްޖެ ހާލަތުގައި މެނުވީ ދަތުރުފަތުރު ނުކުރެއްވުމަށާއި، ހާއްސަކޮށް ފެންބޮޑުވެ، ބިންގަނޑު ކަނޑައިގެންދިއުމުގެ ހާދިސާތައް ހިނގާ ސަރަހައްދުތަކަށް ދަތުރުފަތުރު ނުކުރުމަށެވެ.

ތޫފާން ”ޑިޓުވާ“ގެ އަސަރު ލަންކާއަށް ބޮޑަށް ކުރަމުންދާތީ، ބޯކޮށް ވާރޭވެހި، ފެންބޮޑުވެ، ކަނޑު ގަދަވެ، ބިންގަނޑު ކަނޑައިގެން ދިއުންފަދަ ނުރައްކާތެރި ހާދިސާތައް ހިނގުމުގެ ފުރުސަތު ބޮޑުކަމަށް ލަންކާގެ ކަމާބެހޭ އިދާރާތަކުން ވަނީ އަންގައިފައެވެ.

މި ވިއްސާރައިގެ ސަބަބުން ލަންކާއަށް މިހާރު ވަނީ ރަތް ސަމާލު ނެރެފައެވެ. މި ކާރިސާގައި ލަންކާގެ އެކި ހިސާބުތަކަށް ބޮޑެތި ގެއްލުންތަކެއް ލިބިފައިވާއިރު، މިހާތަނަށް 56 މީހުން މަރުވެ، 21 މީހުން ވަނީ ގެއްލިފައެވެ. މިއީ މި ސަރަހައްދަށް ދިމާވި ވަރަށް ބޮޑު ޤުދުރަތީ ކާރިސާއެކެވެ.

ލަންކާގައި ދިރިއުޅޭ ދިވެހިންގެ ސަލާމަތާއި ރައްކާތެރިކަން ކަށަވަރު ކުރުމަށްޓަކައި ހައިކޮމިޝަނުން ވަނީ އިތުރު ސަމާލުކަމެއް ދިނުމަށް އެދިފައެވެ.

އެގޮތުން، ބޯކޮށް ވާރޭވެހި، ވައިގަދަވާ ވަގުތުތަކުގައި ގެއިން ބޭރަށް ނުކުމެ ނޫޅުމަށާއި، ސްރީލަންކާގެ މޫސުމާ ބެހޭ އިދާރާ އަދި ޑިޒާސްޓަރ މެނޭޖްމަންޓް ސެންޓަރުން ދެއްވާ އެންގެވުންތަކަށް ސަމާލުކަން ދިނުމަށް އެދިފައިވެއެވެ. އަދި ޒަރޫރީ ބޭނުންތަކަށް ބޭނުންވާ ކާޑުގެ ބާވަތްތަކާއި ފެނާއި، ބޭސްފަދަ ސާމާނު ހޯދައި ރައްކާތެރި ތަނެއްގައި ބެހެއްޓުމަށާއި، މޮބައިލް ފޯން ޗާޖުކޮށް، މުހިންމު ލިޔެކިޔުންތައް ރައްކާތެރިކަމާއެކު ބެލެހެއްޓުމަށްވެސް ވަނީ އިލްތިމާސްކޮށްފައެވެ.

މީގެ އިތުރުން، ވިއްސާރައިގައި ކޯރުތައް ފުރި ބަންޑުންވަމުންދާކަމުގެ އިންޒާރު ކަމާބެހޭ ފަރާތްތަކުން ދީފައިވާތީ، އެފަދަ ސަރަހައްދުތަކުގައި ދިރިއުޅޭ ފަރާތްތަކާއި، ބިންތިރި ސަރަހައްދުތަކާއި، މޫދާ ކައިރި ސަރަހައްދުތަކުގައި ދިރިއުޅޭ ފަރާތްތަކުން ހާއްސަ ސަމާލުކަމެއް ދީގެން ރައްކާތެރި ސަރަހައްދުތަކަށް ބަދަލުވުމަށް ހައިކޮމިޝަނުން ވަނީ އިރުޝާދު ދީފައެވެ. މާލެ ދަތުރުކުރާ ފަރާތްތަކުން ދުރާލާ ވަގުތު އޮއްވާ އެއާޕޯޓަށް ދިއުމަށާއި، ކަމާގުޅޭ އިދާރާތަކުގެ މައުލޫމާތު ހޯދުމަށްވެސް ހައިކޮމިޝަނުން ވަނީ އެދިފައެވެ.