މުޒާހަރާ ކުރެވޭނެ ސަރަހައްދުތައް ކަނޑައަޅައިގެން، އެތަންތަނުގައި ރީތިކޮށް މުޒާހަރާ ކުރެވޭނެ އިންތިޒާމުތައް ހަމަޖައްސައިދިނުމަކީ، ޑިމޮކްރަސީގައި ލިބުނު ކުރިއެރުމެއްކަމަށް އިހަވަންދޫ ދާއިރާގެ މެމްބަރު އަހުމަދު ނަސީރު ވިދާޅުވެއްޖެ އެވެ.
ނަސީރު މިހެން ވިދާޅުވީ ސަންގުޓީވީގެ ޚަބަރަށްފަހު ޕްރޮގްރާމްގައި ވާހަކަ ދައްކަވަމުންނެވެ.
ނަސީރު ވިދާޅުވީ ހިޔާލުފާޅުކުރުމާއި، އިހުތިޖާޖު ކުރުމަކީ ކޮންމެ ރައްޔިތަކަށް ވެސް ލިބިގެންވާ ހައްގެއްކަމަށާއި އެހެން ނަމަވެސް އެ ހައްގުގެ ބޭނުން ކުރަން ޖެހޭނީ އެހެން މީހުންނަށް އުނދަގޫ ނުވާގޮތަށް ކަމަށެވެ. ނަސީރު ވިދާޅުވީ ހިޔާލުފާޅުކުރުމުގެ މިނިވަންކަން މި ސަރުކާރުން އެންމެ ފުރިހަމައަށް އިދިކޮޅަށް ސަރުކާރުން ފުރުސަތު ދީފައިވާޖކަމަށެވެ. އަދި މީގެ ކުރިން އޮތް ގޮތާއި ހިލާފަށް، އެއްވެވޭނެ ސަރަހަރައްދުތައް ވެސް އިތުރުކޮށްފައިވާކަމަށް ވިދާޅުވި އެވެ.
ނަސީރު ވިދާޅުވީ މާލެއަކީ ފުރިބާރުވެފައިވާ ސަރަހައްދެއްކަމަށާއި، އާންމުނާއި ވިޔަފާރިތަކަށް ދަތިވާގޮތަށް މުޒާހަރާ ކުރުމަކީ އެންމެ ރަނގަޅު ގޮތެއް ނޫންކަމަށެވެ. އެގޮތުން މަލްޓި ޕާޓީ ސިސްޓަމްގައި މިދިޔަ 15 އަހަރުގެ ތެރޭގައި ވެސް ފެނިގެން ދިޔައީ ބެރު ޖެހުމާއި، އަޑުގަދަ ކުރާ ބޭނުންކޮށްގެން މުޒާހަރާކޮށް ބޮޑެތި އަޑުގަދަ ސްޕީކަރުތައް ބޭނުން ކުރަމުން ގެންދިޔަ މަންޒަރުކަމަށް ނަސީރު ވިދާޅުވި އެވެ.
މިއީ ކުޑަކުދިންނާއި، އެތައް ބަޔަކަށް އުނދަގޫވާނެ ހާލަތެއްކަމަށް ނަސީރު ވިދާޅުވި އެވެ. އަދި ވިޔަފާރިވެރިންނާއި، އެތައް ބަޔަކަށް ގެއްލުންވިކަމަށް ވިދާޅުވި އެވެ.
ނަސީރު ވިދާޅުވި ގޮތުގައި، އިދިކޮޅު ޕާޓީތަކުން މުޒާހަރާ ކުރުމުގައި ރައްޔިތުންނަށް އުނދަގޫ ނުވާނެ ގޮތްތަކެއް ގެންގުޅެން ޖެހެއެވެ.
މި ސަރުކާރުން މުޒާހަރާ ކުރުމަށްޓަކައި، ކުރިން ހަމައެކަނި އެއްތަނެއް ދެތަނެއް އޮތްއިރު އިތުރު ސަރަހައްދުތައް ކަނޑައަޅާފައިވާކަން ނަސީރު ފާހަގަކުރެއްވިއެވެ. އެތަންތަނުގައި އެއްވެ، މަޝްވަރާކޮށް، ވާހަކަ ދައްކައި، މުޒާހަރާ ކުރުމުގެ ފުރުސަތު އޮންނާނެކަމަށް އޭނާ ވިދާޅުވިއެވެ.
ނަސީރު އިތުރަށް ވިދާޅުވީ، ކޮމާޝަލް ސަރަހައްދުތަކުގައި ނުވަތަ ވިޔަފާރި ޒޯންތަކުގައި، ހަލަބޮލި ގަޑިތަކުގައި ޕިކަޕާއި، ސްޕީކަރާއި، ބޮޑުބެރާއި، އަޑުގަދަ ކުރާ ބޭނުންކުރާނަމަ މަގުތައް ބޭނުން ކުރާ އާންމު ރައްޔިތުންނާއި، ވެހިކަލްތަކަށް އުނދަގޫވާ ކަމަށެވެ. އަދި އެފަދަ ހާލަތްތަކުގައި މުޒާހަރާ ކުރާ ފަރާތްތަކަށްވެސް އެބޭފުޅުން ބުނަން އުޅޭ ވާހަކައެއް ރަނގަޅަށް ރައްޔިތުންނަށް ފޯރުކޮށްނުދެވޭނެކަމަށް ވިދާޅުވި އެވެ.
އެހެންކަމުން، މުޒާހަރާ ކުރެވޭނެ ސަރަހައްދުތައް ކަނޑައަޅައިގެން، އެތަންތަނުގައި ރީތިކޮށް މުޒާހަރާ ކުރެވޭނެ އިންތިޒާމުތައް ހަމަޖައްސައިދިނުމަކީ، މި ފަހުގެ ޑިމޮކްރަސީގައި ލިބުނު ކުރިއެރުމެއް ކަމަށް ނަސީރު ގަބޫލުކުރައްވައެވެ. ރާއްޖެއަކީ ކުޑަ، ހަނި މަގުތައް ހުރި ތަނަކަށްވާތީ، ބޮޑެތި ގައުމުތަކުގައި މުޒާހަރާ ކުރާ ގޮތަށް އުޅުމަކީ ގޯސްކަމެއް ކަމަށް އޭނާ ވިދާޅުވިއެވެ.
