ޖުޑީޝަލް ސަރވިސް ކޮމިޝަނުން، ދިވެހިރާއްޖޭގެ ހައިކޯޓުގެ ފަނޑިޔާރުކަމުގެ މަގާމަށް، އަލްއުސްތާޛު ހާތިފް ޙިލްމީއާއި އަލްއުސްތާޛު ހުސައިން މަޒީދު މިރޭ އައްޔަން ކުރައްވައިފިއެވެ.
ހައިކޯޓުގެ ފަނޑިޔާރުކަމުގެ މަގާމަށް އައްޔަން ކުރެއްވި، އަލްއުސްތާޛު ހާތިފް ޙިލްމީއާއި އަލްއުސްތާޛު ހުސައިން މަޒީދުއަށް ފަނޑިޔާރުކަމުގެ ހުވާލައިދެއްވީ، ދިވެހިރާއްޖޭގެ އުއްތަމަ ފަނޑިޔާރު ޑރ. އަޙްމަދު ޢަބްދުﷲ ދީދީއެވެ. މި ދެބޭފުޅުންނައް ފަނޑިޔާރުކަމުގެ ފަތްކޮޅު އެރުއްވީ، ޖުޑީޝަލް ސަރވިސް ކޮމިޝަންގެ ރައީސް، ސުޕްރީމް ކޯޓުގެ ފަނޑިޔާރު އޮނަރަބުލް އަލްއުސްތާޛު ޢަބްދުﷲ ޢަރީފުއެވެ.
ހުވާ ކުރެއްވުމަށް މިރޭ ޖޭއެސްސީގައި ބޭއްވި ރަސްމިއްޔާތުގައި ރައްޔިތުންގެ މަޖިލީހުގެ ރައީސް އަދި ޖޭއެސްސީގެ މެންބަރު މުހައްމަދު ނަޝީދުއާއި ޖޭއެސްސީގެ މެންބަރުންނާއި ސުޕްރީމް ކޯޓާއި ހައިކޯޓުގެ ބައެއް ފަނޑިޔާރުންނާއި ސްޕީރިއާ ބައެއް ކޯޓުތަކުގެ އިސް ގާޒީން ބައިވެރިވެވަޑައިގެންނެވި އެވެ.
އަލްއުސްތާޛު ހާތިފް ޙިލްމީއާއި އަލްއުސްތާޛު ހުސައިން މަޒީދު ދިވެހިރާއްޖޭގެ ހައިކޯޓުގެ ފަނޑިޔާރުކަމުގެ މަގާމަށް އައްޔަން ކުރެއްވުމުން، ހައިކޯޓުގައި މިހާރު ޖުމްލަ އެގާރަ ފަނޑިޔާރުން ތިއްބަވައެވެ
