އްޖޭގައި އިސްލާމީ އަޅުކަންތަކުގެ ތެރެއިން ހައްޖާއި އުމްރާގެ ހިދުމަތްތައް ހަރުދަނާކޮށް، އެ ހިދުމަތްތައް ދޭ ފަރާތްތަކާއި އާއްމުންނާ ދެމެދު ގުޅުން ބަދަހިކުރުމުގެ މަގްސަދުގައި ބާއްވާ 2025 ވަނަ އަހަރުގެ ހައްޖު-އުމްރާ ކޮންފަރެންސް އެންޑު އެކްސްހިބިޝަން މާދަމާ ފެށުމަށް ނިންމައިފިއެވެ.
މިއީ މިފަދަ އެކްސްހިބިޝަނެއް ބާއްވާ ދެވަނަ ފަހަރެވެ. މި ކޮންފަރެންސަކީ ހައްޖާއި އުމްރާގެ ދާއިރާގައި ހަރަކާތްތެރިވާ ފަރާތްތަކަށް މުހިންމު މަޢުލޫމާތުތަކެއް ހިއްސާކޮށް، އާންމުންނަށް އެފަރާތްތަކުގެ ހިދުމަތްތައް ފަސޭހަކޮށްދިނުމަށް ހުޅުވާލެވޭ ރަނގަޅު ފުރުސަތެކެވެ.
ކޮންފަރެންސް ބާއްވާ ތާރީޚާއި ވަގުތު
މި އެކްސްހިބިޝަން ބޭއްވުމަށް ހަމަޖެހިފައިވަނީ 2025 ޑިސެމްބަރު 11 ވާ ބުރާސްފަތި ދުވަހު، އިސްލާމީ މަރުކަޒުގެ ޖަލްސާކުރާ މާލަމުގައެވެ. ބުރާސްފަތި ދުވަހު ހެނދުނު 8:30 އިން ފެށިގެން އެދުވަހުގެ ހަވީރު 17:00 އަށް ކޮންފަރެންސްގެ މައިގަނޑު ސެޝަންތައް ކުރިއަށްދާނެއެވެ. މީގެ އިތުރުން، މި ކޮންފަރެންސާއެކު ބޭއްވާ މައުރަޒުގެ ހަރަކާތްތައް ބުރާސްފަތި ދުވަހު ހެނދުނު 9:00 އިން ހަވީރު 5:00 އަށާއި، ހުކުރު ދުވަހު ހަވީރު 4:00 އިން ރޭގަނޑު 7:00 އާ ހަމައަށް ކުރިއަށް ގެންދެވޭނެއެވެ.
ބައިވެރިވާ މުހިންމު ފަރާތްތައް
މި އަހަރުގެ ކޮންފަރެންސް ބޭއްވުމަށް ހަމަޖެހިފައިވަނީ މައުރަޒަކާއިއެކުގައިކަމަށްވާއިރު، މި ކޮންފަރެންސްގައި މޯލްޑިވްސް ހައްޖު ކޯޕަރޭޝަން ލިމިޓެޑާއި، އުމްރާގެ ހިދުމަތްދޭ ކުންފުނިތަކާއި، ދިވެހިރާއްޖޭގެ ގައުމީ އެއާލައިން މޯލްޑިވިއަންއިން ބައިވެރިވާނެއެވެ. މިފަދަ މުހިންމު ފަރާތްތަކުގެ ބައިވެރިވުމަކީ ހައްޖާއި އުމްރާގެ ދަތުރުތަކާ ގުޅުންހުރި ހުރިހާ ދިމާލަކުން މައުލޫމާތު ހިއްސާކުރުމަށް ލިބޭ ބޮޑު ފުރުސަތެކެވެ.
މި ކޮންފަރެންސްގައި ސަޢޫދީޢަރަބިއްޔާގެ އައްޞަފްވާ ފައުންޑޭޝަނުގެ ވަފުދެއް ބައިވެރިވެވަޑައިގަންނަވާނެއެވެ. މިއީ، ސައުދީ އަރަބިއްޔާގެ މަޝްހޫރު އައްރާޖިހީ ބޭންކުގެ ދަށުން، ދީނީ އަދި ދަރުމަވެރި މަސައްކަތްތައް ހިންގާ، އެ ކުންފުނީގެ ދީނީ ގޮތްޕެކެވެ. އެ ފަރާތްތަކުން، ހައްޖު އުމްރާ ކޮންފަރެންސްގައި، އެ ބޭފުޅުންގެ ފަރާތުންވެސް ޚާއްސަ ސެޝަނެއް ނަންގަވައިދެއްވުމަށް ވަނީ ހަމަޖެހިފައެވެ. މި ބައިވެރިވުމުގެ ސަބަބުން، ދިވެހި ކުންފުނިތަކަށް ބައިނަލްއަގްވާމީ މިންގަނޑުތަކާއި، ސައުދީ އަރަބިއްޔާގެ އެންމެ ފަހުގެ ހަބަރުތައް އެނގިގެންދާނެއެވެ.
މައުރަޒާއި މައުލޫމާތު ފޯރުކޮށްދިނުން
މި ކޮންފަރެންސްގައި ބައިވެރިވާ ކުންފުނިތަކުން ދޭ ހިދުމަތްތަކުގެ މައުލޫމާތު އާއްމުންނަށް ހިއްސާކޮށް، އިސްތިހާރުކުރުމަށް ސްޓޯލްތައް ބެހެއްޓިފައި ހުންނާނެއެވެ. ހައްޖާއި އުމްރާގެ ހިދުމަތްދޭ ކުންފުނިތަކަކީ ނުހަނު މާތް އަޅުކަމަކާ ގުޅުން ހުރި ހިދުމަތަކަށްވާތީ، ރައްޔިތުންނަށް ބޭނުންވާ ސާފު މައުލޫމާތު ފޯރުކޮށްދިނުމުގެ ފުރުސަތު މި މައުރަޒުގެ ތެރެއިން ހުޅުވާލެވޭނެއެވެ. އާންމު ފަރާތްތަކަށް އެކި ކުންފުނިތަކުގެ ޕެކޭޖްތައް އަޅާކިޔާ، އެންމެ އެކަށީގެންވާ ހިދުމަތެއް ހޯދުމަށް މި މައުރަޒު އެހީތެރިވެދޭނެއެވެ.
ކޮންފަރެންސްގެ މަގްސަދުތަކާއި ސެޝަންތައް
މި ކޮންފަރެންސްގެ މައިގަނޑު މަގްސަދުތަކުގެ ތެރޭގައި ހައްޖާއި އުމްރާގެ ހިދުމަތްތަކާއި ގުޅުންހުރި އިދާރީ އިންތިޒާމްތައް ހަރުދަނާކުރުމަށް ގުޅިގެން މަސައްކަތްކުރާނެ ގޮތްތަކާމެދު މަޝްވަރާކުރުން ހިމެނެއެވެ. އަދި، އެކަމާ ގުޅުން ހުރި ދީނީ، މުހިއްމު މައުލޫމާތުތައް ހައްޖާއި އުމްރާގެ ހިދުމަތްދޭ ކުންފުނިތަކަށް މި ކޮންފަރެންސްގެ ތެރެއިން ލިބިގެންދާނެއެވެ.
މި ސެޝަންތައް ނަންގަވައިދެއްވަނީ ދީނީ އިލްމުގެ ފުންނާބު އިސް އިލްމުވެރިންނާއި، ހައްޖާއި އުމްރާގެ ހިދުމަތާއި ގުޅުން ހުރި އެކި ދާއިރާތަކުގައި މަސައްކަތްކުރައްވާ ތަޖުރިބާކާރު ބޭފުޅުންނެވެ. މިގޮތުން، ހައްޖުގެ އަޅުކަމުގެ ޝަރުޢީ ގޮތްތަކާއި، ދަތުރުފަތުރުގެ އިންތިޒާމުތައް ހަމަޖެއްސުމުގައި ސަމާލުކަން ދޭންޖެހޭ ކަންކަމާއި، ޙާޖީންނަށް ދިމާވެދާނެ ދަތިތަކަށް ހައްލު ހޯދުމާ ބެހޭ ގޮތުން ފުޅާ ދާއިރާއެއްގައި މަޢުލޫމާތު ހިއްސާކުރެވޭނެއެވެ. މިއީ ހައްޖު ކުންފުނިތަކުގެ މުވައްޒަފުންގެ ހުނަރު އިތުރުކޮށް، ހިދުމަތުގެ ފެންވަރު ރަނގަޅުކުރުމަށް ލިބޭ ރަނގަޅު ފުރުސަތެކެވެ.
