ސަރުކާރު ހިއްސާވާ ކުންފުނިތަކަށް މަޝްރޫއުތައް ހަވާލުކުރިއިރު، ބައެއް ކުންފުނިތަކުގެ، އެ މަސައްކަތެއް ކުރިއަށް ގެންދެވޭނެ ގާބިލުކަން ނެތްކަމަށް ކަނޑިތީމު ދާއިރާގެ މެމްބަރު އަމީން ފައިސަލް ވިދާޅުވެއްޖެ އެވެ.
ސަންގުޓީވީގެ ޚަބަރަށްފަހު ޕްރޮގްރާމުގައި ވާހަކަ ދައްކަވަމުން އަމީން ވިދާޅުވީ، ހުއްޓިފައިވާ މަޝްރޫއުތައް އޭގެ ދެގުނަ އަގުގައި އެސްއޯއީތަކާ ހަވާލުކުރުމަކީ އެއްވެސް ބޭނުމެއް ނެތް ކަމެއް ކަމަށެވެ.
އަމީން ވަނީ އެމްޑީޕީ ސަރުކާރު ނިމުނު އިރު، އޭނާގެ ދާއިރާގައި ހުރި ގިނަ މަޝްރޫއުތައް ނިމުމާ ގާތްވެފައި ހުރިނަމަވެސް މި ދިޔަ ދެ އަހަރުގެ ތެރޭގައި ހުރިހާ ޕްރޮޖެކްޓެއް ހުއްޓިފައިވާކަމަށް ވިދާޅުވެފަ އެވެ.
އަމީން އިތުރަށް ވިދާޅުވީ، ރައީސް މުއިއްޒު އިންތިގާލީ މަރުހަލާގައި ވެސް އަދި ކެމްޕޭންގެ ތެރޭގައި ވެސް ވިދާޅުވެފައި ވަނީ، މަޝްރޫއުތައް ނުހުއްޓާ ކުރިޔަށް ގެންދާނެކަމަށާއި، އެއްވެސް ޕްރޮޖެކްޓަކަށް ނަގާފައިވާ މުވައްޒަފަކު ވަޒީފާއިން ވަކިނުކުރާނެ ކަމަށެވެ. އަދި ނުފަށާ ހުރި މަޝްރޫއުތައް ރިވިއު ކުރާނެ ކަމަށް ވިދާޅުވެފައިވީ ނަމަވެސް، މިހާރު ހުއްޓިފައިވާ މަޝްރޫއުތައް ކުރިޔަށް ނުގެންގޮސް ދެ އަހަރުވަންދެން ހިފަހައްޓާފައިވާކަމަަށް ވިދާޅުވި އެވެ.
ފެނަކަ ދަރާފައިވާ މިންވަރާއި، ރާއްޖޭގެ ދަރަނީގެ ހާލަތު އަދި މަޝްރޫއުތަކަށް ބޭނުންވާ ފައިސާގެ މިންވަރު އެނގިވަޑައިގަންނަވާކަމަށް ވިދާޅުވެފައި ވަނިކޮށް، މަޝްރޫއުތައް ހުއްޓާލާފައި އޭގެ ބިލްތަކަށް ފައިސާ ނުދީ ދެގުނަ އަގުގައި އެސްއޯއީތަކާ ހަވާލުކުރަނީ ކޮން ސަބަބަކާއި ހުރެތޯ އަމީން ސުވާލު އުފެއްދި އެވެ.
އަމީން ވިދާޅުވީ މިހާރު އޮތް ހާލަތުގައި، ކުންފުނިތަކަށް ބޮޑު އަގުގައި މަސައްކަތްތައް ހަވާލުކޮށްގެން ވެސް ކުރިޔަށް ނުދާނެކަމަށެވެ. އަދި މަޝްރޫއުތަކަށް ބޭނުންވާ ފައިސާ ނުދެވި އޮންނަމަ މަސައްކަތަށް ބޭނުންވާ ވަސީލަތްތައް ހޯދާނެ ގޮތެއް ނެތްކަމަށް ވިދާޅުވި އެވެ.
ދެން އެހެންވީމަ އެފައިސާ ނުދެވޭއިރު އެސްއޯއީތަކަށް ފައިސާ ދީގެން ކިހިނެއްތޯ މަސައްކަތް ކުރާނީ. އެފައިސާ ނުދެވި އޮންނަމަ މިހަމަ ތަކެތި ގަނެގެންނޫންތޯ އެސްއޯއީއަކަށް ވެސްކުރެވޭނީ… ދެން ކޮބާތޯ އެ އެ ކުންފުންޏަށް ލާރިވެސް ނުދީ ބިލްތަކަށް ފައިސާ ނުދީ އެ ޓާމިނޭޓްކޮށްފަ އަނެއްކާ އޭގެ ދެގުނަ އަގުގަ އެސްއޯއީއަކަށް ދީގެން ކުރުމުގެ ބޭނުމަކީ ކޮބާތޯ… އެހެންވީމަ އެ ފައިސާ ދީފަ އެ ޕްރޮޖެކްޓް ކޮމްޕްލީޓް ކުރީއާ ރަނގަޅެއްނޫންތޯ، މާރަނގަޅެއްނޫންތޯ؟ މީ މީގަ އަޅުގަނޑުގެ ކަންބޮޑުވުމަކީ ރައީސް އިންތިގާލީ މަރުހަލާގައި ވެސް ނޫނީ ކެމްޕޭންގެ ތެރޭގައިވެސް ތިމަންމަނިކުފާނަށް އެނގެއޭ ފެނަކަ މިހާވަރު ދަރާފަ ހުރިކަން ތިމަންމަނިކުފާނަށް އެނގޭ ރާއްޖޭގެ ދަރަންޏަކީ މިހާވަރުކަން ތިމަންމަނިކުފާނަށް އެނގޭ ޕްރޮޖެކްޓްތަކަށް ބޭނުންވަނީ މިހާވަރުކަން…
އަމީން ވަނީ ހުއްޓިފައިވާ މަޝްރޫއުތަކުގެ ފައިސާ ދޫކޮށް، އެ މަޝްރޫއުތައް ކުރިޔަށް ގެންގޮސް ނިންމާލުން މާ ރަނގަޅުކަމަށް ވިދާޅުވެފައެވެ.
ސަރުކާރު ހިއްސާވާ ކުންފުނިތަކަށް މަޝްރޫއުތައް ހަވާލުކުރިއިރު، ބައެއް ކުންފުނިތަކުގެ، އެ މަސައްކަތެއް ކުރިއަށް ގެންދެވޭނެ ގާބިލުކަން ނެތް ކަމަށް ވެސް އަމީން ފައިސަލް ވިދާޅުވިއެވެ. އޭގެ އިތުރުން އެ ކުންފުނިތަކުގެ ދާއިރާގެ ބޭރުގެ މަޝްރޫއުތައް ވެސް ހަވާލުކޮށްފައިވާ ކަމަށާއި، އެ ކުންފުނިތަކަކީ ބަނގުރޫޓުވުމާ ގާތްވެފައި ހުރި ކުންފުނިތައް ކަމަށް އޭނާ ތުހުމަތުކުރެއްވިއެވެ. މިކަމުގެ ސަބަބުން ބޭރު ފައިސާއަށް ނޭދެވޭ އަސަރު ކުރާނެ ކަމަށާއި، މަސައްކަތަށް ބޭނުންވާ ސާމާނާއި ވަސީލަތް ހޯދުމަށް އިންތިހާއަށް ދަތިވެ، ޑޮލަރުގެ އަގު މިހާރު ހުރި އަދަދުން އުފުލުމުގެ ފުރުސަތު ބޮޑު ކަމަށް ވެސް އޭނާ ވިދާޅުވިއެވެ.
އަމީން ފައިސަލް އިތުރަށް ވިދާޅުވީ، ސަރުކާރުގެ ކުންފުނިތަކަށް ދިން މަޝްރޫއުތަކަކީ ޕްރައިވެޓް ކުންފުނިތަކުގެ އަތުން ބާތިލުކޮށް ނެގި މަސައްކަތްތައް ކަމަށެވެ. އަދި އޭގެ ސަބަބުން އެ ކުންފުނިތައް އިނދަޖެހިފައިވާ ކަމަށް އޭނާ ވިދާޅުވިއެވެ. ރައްޔިތުން މިކަމަށް ކަންބޮޑުވުން ފާޅުކުރުމުން، ބިޑް ކުރުމަކާ ނުލައި ބޮޑު ރަސްމިއްޔާތެއް ބާއްވައިގެން ކުންފުނިތަކަށް ޕްރޮޖެކްޓުތައް ހަވާލުކުރީ ސަރުކާރުގެ ތެރޭގައި ތިއްބެވި ބޭފުޅުންނާއި ގާތް މީހުންނަށް ކަމަށް އަމީން ވިދާޅުވިއެވެ. މިހާތަނަށް އެތަނުން އެއްވެސް ޕްރޮޖެކްޓެއްގެ މަސައްކަތް ފެށިފައި ނުވާކަމަށް ވެސް އޭނާ ފާހަގަކުރެއްވިއެވެ.
