ދިވެހިރާއްޖޭގައި ދިރިއުޅޭ ބިދޭސީންނަށް ހާއްސަކޮށްގެން އިންތިޒާމުކުރި ލަންކާ ލަޔަންސް ފުޓްސަލް ކަޕް 2025، ކާމިޔާބުކަމާއެކު ބާއްވައިފިއެވެ.
މާލޭގައި ކުރިއަށް ގެންދިޔަ މި މުބާރާތް އިންތިޒާމުކުރީ ލަންކާ ލަޔަންސް ޓީމާއި، ރާއްޖޭގައި ދިރިއުޅޭ ސްރީލަންކާގެ ކޮމިއުނިޓީ ގުޅިގެންނެވެ. މީގެ މަގުސަދަކީ ފުޓްސަލް މެދުވެރިކޮށް އެއްބައިވަންތަކަމާއި، ކުޅިވަރުގެ ރޫހާއި، ގިނަ ނަސްލުތަކުގެ މެދުގައި އޮންނަ އެކުވެރިކަން އިތުރުކުރުން ކަމަށް އެ ޓީމުން ވަނީ ބުނެފައެވެ.
މި މުބާރާތުގައި 24 ޓީމު ބައިވެރިވެފައިވާއިރު، 4 ގައުމަކުން ވަނީ ވާދަކޮށްފައެވެ. އޭގެތެރޭގައި ލަންކާ، ބަންގްލަދޭޝް، އިންޑިއާ އަދި ނޭޕާލް ހިމެނެއެވެ. މި މުބާރާތް ޝަރަފުވެރިކޮށްދެއްވީ ކުޅިވަރާއި، ހަށިހެޔޮކަމާއި ބެހޭ ވަޒީރު، އަބްދުﷲ ރާފިއުއާއި ސްރީލަންކާއިން ރާއްޖެއަށް ކަނޑައަޅުއްވާފައިވާ ސަފީރު ރިޒްވީ ހަސަންއެވެ.
މި މުބާރާތުގެ ޓައިޓްލް ސްޕޮންސަރަކީ ރެޑްލައިންސް ޝިޕިންގ އެންޑް ލޮޖިސްޓިކްސްއެވެ. މި މުބާރާތަކީ ދިވެހިރާއްޖޭގައި ދިރިއުޅޭ ބިދޭސީންގެ މެދުގައި އޮންނަ އެކުވެރިކަމާއި، ގުޅުންތަކާއި، ކޮމިއުނިޓީގެ ރޫޙު ދައްކުވައިދިން މުބާރާތެއް ކަމަށް އެޓީމުން ވަނީ ބުނެފައެވެ.
