މިދިޔަ ހަފްތާގައި ރިޕޯޓުކުރެވުނު ސްކޭމްގެ މައްސަލަތަކާ ގުޅޭގޮތުން އާންމުކުރި ތަފާސްހިސާބުތަކުން ދައްކާ ގޮތުގައި، ޖުމްލަ 45 މައްސަލައެއް ހުށަހެޅިފައިވާއިރު، ގެއްލުނު ފައިސާގެ ތެރެއިން 130،287.80 ރުފިޔާ ވަނީ ރިކަވަރ ކުރެވިފައި ކަމަށް ފުލުހުންގެ ތަފާސްހިސާބްތަކުން ދައްކައިފިއެވެ.
މި މައްސަލަތަކުގައި ޖުމްލަ 591،751.47 ރުފިޔާ ގެއްލިފައިވާ ކަމަށް ފުލުހުން ބުނެއެވެ. ގެއްލުނު ފައިސާގެ ބޮޑު އަދަދެއް ރިކަވަރ ކުރެވިފައިވުމަކީ، ސްކޭމްގެ މައްސަލަތައް އަވަހަށް ރިޕޯޓުކުރުމުގެ މުހިންމުކަން ހާމަވާ ކަމެކެވެ.
މިދިޔަ ހަފްތާގެ ތެރޭގައި ފުލުހުންނަށް ހުށަހެޅުނު 45 މައްސަލައިގެ ތެރެއިން އެންމެ ގިނައީ އީ-ކޮމާސްގެ ސްކޭމް މައްސަލަތަކެވެ. އެގޮތުން، އީ-ކޮމާސްއާ ގުޅުންހުރި 17 މައްސަލައެއް ރިޕޯޓުކޮށްފައިވެއެވެ.
މީގެ އިތުރުން، އިންޕާސަނޭޝަންގެ 7 މައްސަލައާއި، ކަރަންސީ އެކްސްޗޭންޖުގެ 5 މައްސަލަ ހުށަހެޅުނެވެ. އަދި ފިޝިން، ވިޝިން އަދި ޖޮބް ސްކޭމުތަކުގެ 4 މައްސަލައަކާއި އެހެނިހެން 12 މައްސަލަވެސް ފުލުހުންނަށް ރިޕޯޓުކޮށްފައިވެއެވެ.
ސްކޭމްގެ މައްސަލަތަކަކީ ދުވަހެއް ދުވަހަކަށް އިތުރުވެ، އާންމުވަމުންދާ މައްސަލަތަކެއް ކަމަށް ފުލުހުން ފާހަގަކުރެއެވެ. ފުލުހުން ބުނާ ގޮތުގައި، މިފަދަ މައްސަލަތައް ދިމާވުމުން ހަނުހުރުމަކީ، ސްކޭމަރުންނަށް ކާމިޔާބު ލިބި، ގެއްލުން ބޮޑުވެގެންދާނެ ކަމެކެވެ.
”ސްކޭމްތަކުގެ މައްސަލަތައް އަވަހަށް ފުލުހުންނަށް ރިޕޯޓުކުރުމަކީ ގެއްލުނު ފައިސާ އަނބުރާ ހޯދުމަށް ފަސޭހަވެގެންދާނެ ކަމެކެވެ،“ ފުލުހުންގެ ތަފާސްހިސާބުތަކުން މިކަން ސާބިތުވާ ކަމަށް އެ އިދާރާއިން ބުނެއެވެ.
މަކަރާއި ހީލަތުގެ މައްސަލައެއް ދިމާވެއްޖެނަމަ، ލަސްނުކޮށް ފުލުހުންގެ އެހީތެރިކަން ހޯދުމަށް ފުލުހުން ވަނީ އިލްތިމާސްކޮށްފައެވެ. އެގޮތުން، ނޭޝަނަލް އެމަރޖެންސީ ކޯލް ސެންޓަރު 911 ނުވަތަ 125 (އެކްސްޓެންޝަން 2020) އަށް ގުޅައިގެން ނުވަތަ reportscam@police.gov.mv އަށް އީމެއިލް ކުރުމުން ފުލުހުންގެ އެހީތެރިކަން ލިބިގެންދާނެއެވެ. މިއީ އާންމު ރައްޔިތުންގެ މާލީ ރައްކާތެރިކަން ކަށަވަރުކުރުމަށްޓަކައި ފުލުހުން ދެއްވާ މުހިންމު ޚިދުމަތެކެވެ.
