ސަލާމަތީ ޚިދުމަތްތަކުގެ ކޮމިޓީގެ (241 ކޮމިޓީ) މުގައްރިރަށްވުރެ ބޮޑަށް ވަކި ސަރުކާރު ދިފާއު ކުރެވޭނެ އެހެން ބޭފުޅެއް ނެތް ކަމަށް ރައްޔިތުންގެ މަޖިލީހުގެ ފޭދޫ ދާއިރާގެ މެމްބަރު މުހައްމަދު ނިހާދު ވިދާޅުވެއްޖެއެވެ.
ނިހާދު މިހެން ވިދާޅުވީ އެމްޑީޕީގެ ލީޑަރޝީޕް 2019ގެ އިންތިހާބުގައި އެޕާޓީގެ ނައިބް ރައީސްގެ މަޤާމަށް ވާދަކުރައްވާ ހިތަދޫ އުތުރު ދާއިރާގެ މެމްބަރު މުހައްމަދު އަސްލަމްއަށް ތާއީދު ހޯއްދެވުމުގެ ގޮތުން ރ.އަތޮޅުގެ ރަށްތަކަށް ކުރެއްވި ދަތުރުގެ ތެރެއިން ރައްޔިތުންނާއި ބައްދަލުކޮށް ވާހަކަ ދައްކަވަމުންނެވެ.
އަސްލަމްއަކީ މިވަގުތު ރައްޔިތުންގެ މަޖިލީހުގެ ސަލާމަތީ ޚިދުމަތްތަކުގެ ކޮމިޓީ (241 ކޮމިޓީ)ގެ މުޤައްރިރު އެވެ. އެހެންކަމުން ގައުމުގެ ކަންކަން ހަމަ މަގަށް އެޅުވުމުގައި 241 ކޮމިޓީން ކުރަމުންދާ މަސައްކަތަކީ ބުރަ މަސްއޫލިޔަތަކަށްވާއިރު، އަސްލަމްއަކީ މިވަގުތު ސަރުކާރު ދިފާއު ކުރުމުގައި ވަރަށް ބޮޑު ޒިންމާއެއް އަދާކުރައްވަމުން ގެންދަވާ އެއް ބޭފުޅާކަމަށް ނިހާދު ވިދާޅުވިއެވެ.
ނިހާދުގެ ވާހަކައިގައި އެމްޑީޕީއަކީ މިރާއްޖޭގައި މިވަގުތު އޮތް އެންމެ ބޮޑު ޕާޓީ ކަމަށާއި އެހެންކަމުން ސަރުކާރު ދިފާއު ކުރުމަކީ ސިޔާސީ މަޤާމުތަކުގައި ތިއްބަވާ ބޭފުޅުންގެ އިތުރަށް ޕާޓީގެ އާއްމު މެމްބަރުންގެ ވަރަށް ބޮޑު ޒިންމާއެއް ކަމަށެވެ.
އެގޮތުން ކޮމަންޑޫ ދާއިރާއަށް ނިސްބަތްވާ އެމްޑީޕީގެ ގައުމީ މަޖިލީހުގެ މެމްބަރަކަށް އިޝާރާތް ކުރައްވާ ނިހާދު ވިދާޅުވީ ކޮމަންޑޫގައި އެންމެ ހަރަކާތްތެރިކޮށް މަސައްކަތްކުރެއްވި އެއް ބޭފުޅަކީ އޭނާ ކަމަށާއި އެހެންނަމަވެސް މިއަދު ޕާޓީގެ ހަރަކާތްތަކުން އޭނާ ފެންނަން ނެތުމަކީ ހިތާމަކުރާ ކަމެއް ކަމަށެވެ.
އެކަމުން ދޭހަ ވަނީ ޕާޓީގެ ކޮންމެވެސް އެއް ގުނަވަނެއް ފެއިލްވެފައިވާތީ ކަމަށާއި މިކަންކަން ހައްލުކޮށް ޕާޓީގެ ހިންގުން އިތުރަށް ހަރުދަނާ ކުރުމަށްޓަކައި ލީޑަރޝިޕަށް އައު ބޭފުޅަކު އައްޔަން ކުރަން ޖެހޭ ކަމަށެވެ.
އަސްލަމްއަކީ 2018 ވަނަ އަހަރު ބޭއްވި ރިޔާސީ އިންތިހާބުގައި އެމްޑީޕީގެ ޖަޒީރާ ރައީސް ކެމްޕެއިންގެ މެނޭޖަރު ކަމަށާއި، ޖަޒީރާ ރާއްޖެ ކެމްޕެއިންގެ މެނޭޖަރުގެ އިތުރުން 241 ކޮމިޓީގެ މުގައްރިރަށްވާއިރު، އެމްޑީޕީގެ ލީޑަރޝިޕަށް އެންމެ ބޭނުންވެފައިވާ އެއް ބޭފުޅަކީ އަސްލަމްކަމަށް ނިހާދު ވިދާޅުވިއެވެ.
އަދި ނޮވެމްބަރ 22 ވަނަ ދުވަހަކީ އެމްޑީޕީގެ ފިކުރު އަނެއްކާވެސް އައު ހަރުފަތަކަށް ގެންދަންވީ ދުވަސް ކަމަށާއި މިއީ އެތެރޭގެ އިންތިހާބެއް ނަމަވެސް އެމްޑީޕީގެ މެމްބަރުން ވޯޓް ލާން ނިކުތުމަށް ނިހާދު ވަނީ އެދިވަޑައިގެންނެވިއެވެ.
