ދައުލަތުގެ ކުންފުނިތަކާއި ސަރުކާރު ބައިވެރިވާ ކުންފުނިތަކުގެ އިތުރުން ވިޔަފާރި އުސޫލުން ހިންގާ ސަރުކާރުގެ ތަންތަނުގެ އިންޓާނަލް އޮޑިޓް އަދި ރިސްކް މެނޭޖްމަންޓް ފަންކްޝަން ހަރުދަނާކުރުމަށް ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން އަންގައިފި އެވެ.
ޕީސީބީގެ ބައްދަލުވުމުގެ ނިންމުންތަކުގެ މައުލޫމާތު އާންމުކޮށް، އެ ބޯޑުން ބުނީ ކުންފުނިތަކުގެ ހިންގުން ހަރުދަނާކޮށް، ޒިންމާދާރުކަން އިތުރުކުރުމަށް ބޭނުންވާ ގިނަ ކަންތައްތަކެއް ހިމަނާފައިވާނެކަމަށެވެ. އެގޮތުން، ކުންފުނިތަކުގައި ރިސްކް މެނޭޖްމަންޓް ފަންކްޝަން ވަކި މިނިވަން ޑިޕާޓްމަންޓެއްގެ ގޮތުގައި ނުވަތަ އިންޓާނަލް އޮޑިޓް ޑިޕާޓްމަންޓްގެ ތެރޭގައި އެކުލަވާލެވިފައިވާކަން ކަށަވަރުކުރުމަށާއި، މިހާރު އެގޮތަށް އެކުލަވާލެވިފައި ނުވާނަމަ އެންމެ އަވަހަކަށް އެ ފަންކްޝަން އެކުލަވާލުމަށް ޕީސީބީން ވަނީ އެންގުމަށް ނިންމާފައެވެ.
މީގެ އިތުރުން، އިންޓާނަލް އޮޑިޓް އަދި ރިސްކް މެނޭޖްމަންޓް ފަންކްޝަންތަކުގެ މަސައްކަތްތައް އަދާކުރުމަށް ބޭނުންވާ މުވައްޒަފުންގެ އަދަދު ދެނެގަތުމަށް ނީޑް އެސެސްމަންޓެއް ހެދުމަށާއި، މި ފަންކްޝަންތަކަށް ބޭނުންވާ އެންމެ އެކަށޭނަ އަދަދަށް މުވައްޒަފުން ތިބިކަން ކަށަވަރުކުރުމަށް އަންގާފައި ވެއެވެ. އަދި މަސްއޫލިއްޔަތު އަދާކުރުމަށްޓަކައި މުވައްޒަފުން ހޯދަންޖެހޭ ހާލަތްތަކުގައި ވެސް މެނޭޖްމަންޓް މުވައްޒަފުންނަށް ވުރެ އަމަލީ ގޮތުން މަސައްކަތް ކުރާ ފަންނީ މުވައްޒަފުން ނެގުމަށް އިސްކަންދިނުމަށް ވެސް ވަނީ ނިންމާފަ އެވެ
ސަރުކާރު ހިއްސާވާ ކުންފުނިތަކުގެ ޕްރޮކިއުމަންޓް ގައިޑްލައިންގައި، ޕީސީބީއާ ހިއްސާކުރަންޖެހޭ ކަމަށް ބަޔާންކޮށްފައިވާ ޕްރޮކިއުމަންޓް ރިޕޯޓް، ޕީސީބީގެ އިތުރުން ކުންފުނީގެ އިންޓާނަލް އޮޑިޓަށް ވެސް ހިއްސާކުރާގޮތަށް ގައިޑްލައިން އިސްލާހުކޮށްފައި ވާތީ، މި ބަދަލާއެކު ގަވައިދުން އިންޓާނަލް އޮޑިޓަށް ރިޕޯޓް ހިއްސާކުރުމަށް ވެސް ވަނީ އަންގާފަ އެވެ. ހަމަ އެފަދައިން، ކުންފުނިތަކުން ހިއްސާ ކުރަމުންދާ ކުއާޓަލީ ފައިނޭންޝަލް ރިޕޯޓާއި އެއާ ގުޅޭ ލިޔެކިޔުންތައް ޕީސީބީއަށް ހިއްސާކުރާއިރު ކުންފުނީގެ އިންޓާނަލް އޮޑިޓަށް ވެސް ހިއްސާކުރުމަށް އަންގާފައި ވެއެވެ.
އޮޑިޓް އަދި ރިސްކް ކޮމިޓީގެ ނަން ބަދަލުކުރުމާއި ގުޅޭގޮތުން ނިންމާފައި ވަނީ، ޕީސީބީން ހިއްސާކޮށްފައިވާ ސަރުކާރު ކުންފުނިތަކުގެ ނަމޫނާ ހިންގާ ގަވައިދުގެ 11 ވަނަ މާއްދާގައިވާ ގޮތަށް ކުންފުނިތަކުގެ އޮޑިޓް ކޮމިޓީގެ ނަން ”އޮޑިޓް އަދި ރިސްކް ކޮމިޓީ“ ގެ ނަމަށް ބަދަލުކޮށްފައިވާކަން ކަށަވަރުކުރުމަށެވެ. އެގޮތަށް އަމަލުކޮށްފައިނުވާނަމަ އެންމެ އަވަހަކަށް ބަދަލުގެނައުމަށް ވެސް ވަނީ އަންގާފައެވެ.
ބޮޑެތި ކުންފުނިތަކުގެ ބޯޑުގައި ހިއްސާދާރުގެ ހުއްދައާއެކު ރިސްކާއި ގުޅޭ ވަކި ކޮމިޓީއެއް އެކުލަވާލެވިދާނެކަމަށް ވެސް ޕީސީބީން ފާހަގަކޮށްފައިވެއެވެ. އަދި، ޕީސީބީން އަންގާ އެންގުންތަކާއި އުސޫލުތަކާއި ގައިޑްލައިންތަކަށް ކުންފުނިން އަމަލުކުރާވަރު ދެނެގަނެ، މަދުވެގެން އަހަރަކު އެއް ފަހަރު ކޮމްޕަލަޔަންސް އޮޑިޓް ނުވަތަ ރިވިއުއެއް ހަދައި، ކުންފުނީގެ ބޯޑަށް ނުވަތަ ކަމާބެހޭ ބޯޑުގެ ކޮމިޓީއަށް ކުންފުނީގެ އިންޓާނަލް އޮޑިޓުން ހުށަހަޅައި، އިސްލާހު ކުރަންޖެހޭ ކަންތައްތަކާއި އިތުރަށް ހަރުދަނާކުރަންޖެހޭ ކަންތައްތައް ހިމެނޭހެން ކުންފުނީގެ ކަންކަން އިތުރަށް ރަނގަޅު ކުރެވޭނެ މެކޭނިޒަމްއެއް ކުންފުނީގެ އެތެރޭގައި ގާއިމުކުރުމަށް އަންގާފައި ވެއެވެ.
ޕީސީބީގެ އެންގުމުގައި ވަނީ އަންނަ އަހަރުގެ ޖަނަވަރީ މަހުގެ 31 ވަނަ ދުވަހުގެ ކުރިން މި ކަންކަން ފުރިހަމަ ކުރުމަށެވެ. އަދި އިންޓާނަލް އޮޑިޓް ހަރުދަނާކުރުމަށް ”ޕްރޮއެކްޓިވް“ ކޮށް ހިއްސާކުރުމަށް ބަޔާންކޮށްފައިވާ ކަންތައްތައް ކުރުމަށް ކުންފުނީގެ ކަމާގުޅޭ އެހެނިހެން ޑިޕާޓްމަންޓްތަކަށް އެންގުމަށް ވެސް ކުންފުނިތަކަށް އަންގާފައި ވެއެވެ.
ޕީސީބީން ފާހަގަކުރައްވާފައިވާ ގޮތުގައި، މި ބޯޑުގެ ގާނޫނީ ޒިންމާ އަދާކުރުމުގެ ގޮތުން، ބޯޑުން އަންގާ އެންގުންތަކަށް ކުންފުނިތަކުން އަމަލު ކުރުމަކީ، ދައުލަތުގެ ވިޔަފާރި ތަންތަން ޕްރައިވަޓައިޒްކުރުމާއި ކޯޕަރަޓައިޒްކުރުމާއި އަދި މޮނިޓަރކޮށް އިވެލުއޭޓްކުރުމުގެ ޤާނޫނުގެ ދަށުން، ސަރުކާރުގެ ކުންފުނިތަކާއި ސަރުކާރު ބައިވެރިވާ ކުންފުނިތަކާއި ވިޔަފާރި އުސޫލުން ހިންގާ ސަރުކާރުގެ ތަންތަނަށް ލާޒިމްކަމެކެވެ.
