ހުޅުމާލޭގެ ސިނާއީ ސަރަޙައްދުގައި އާއްމު ރައްޔިތުންނަށް އުނދަގޫވާގޮތަށް ޤަވައިދާ ޙިލާފަށް ޕާކުކޮށްފައިވާ އުޅަނދުތައް ނަގާ، އެ ސަރަޙައްދު ސާފުކުރުމުގެ މަސައްކަތް ހައުސިންގް ޑިވެލޮޕްމެންޓް ކޯޕެރޭޝަން (އެޗްޑީސީ) އިން ފަށައިފިއެވެ.
އުޅަނދުތައް ނެގުމަށް ދީފައިވާ މުއްދަތު
އެޗްޑީސީން ނެރުނު އިއުލާނެއްގައި ބުނެފައިވަނީ، ހުޅުމާލޭގެ ސިނާއީ ސަރަޙައްދުގައި ޕާކިންގް ޒޯނުގެ ބޭރުން ޤަވައިދާ ޙިލާފަށް ޕާކުކޮށްފައިވާ އުޅަނދުތައް 8 ޖެނުއަރީ 2026 ވާ ބުރާސްފަތިދުވަހުގެ 00:00 ގެ ކުރިން އެ ސަރަޙައްދުން ނެގުމަށް އަންގާ ކަމަށެވެ.
މި ދެވިފައިވާ މުއްދަތުގެ ތެރޭގައި އުޅަނދުތައް އެ ސަރަޙައްދުން ނުނަގާނަމަ، ކަމާ ގުޅުންހުރި އިދާރާތަކާ ގުޅިގެން އެ އުޅަނދުތައް ނެގުމުގެ މަސައްކަތް އެ ކޯޕަރޭޝަނުން ކުރާނެ ކަމަށްވެސް އެޗްޑީސީން ވަނީ ހާމަކޮށްފައެވެ. އަދި އުޅަނދުތައް ނެގުމުގެ ތެރޭގައި އުޅަނދަކަށް ނުވަތަ އުޅަނދުގެ ވެރިފަރާތަށް ދިމާވެދާނެ އެއްވެސް ގެއްލުމަކަށް އެ ކޯޕަރޭޝަނުން ޒިންމާ ނުވާނެ ކަމަށްވެސް އިއުލާނުގައި ބަޔާންކޮށްފައިވެއެވެ.
ޕާކިންގް މައްސަލައަށް ދާއިމީ ހައްލެއް
ފާހަގަކޮށްލެވޭ ގޮތުގައި، ހުޅުމާލޭގައި ދިމާވެފައިވާ ޕާކިންގް މައްސަލައަށް ހައްލެއް ހޯދުމުގެ ގޮތުން ދާދި ފަހުން އެޗްޑީސީން ވަނީ ހަތަރުފުރޮޅުލީ އުޅަނދުތަކަށް ޚާއްސަ ވަގުތީ ބިންތަކެއް ދޫކޮށްފައެވެ. އެޗްޑީސީން މީގެ ކުރިން ބުނެފައިވާ ގޮތުގައި، މި ބިންތައް ކުރިމަގުގައި ތަރައްގީކުރާނީ ޕާކިންގް ބިލްޑިންގްތަކެއްގެ ގޮތުގައެވެ.
މިފަދަ ކަންކަމުގައި އާއްމު ރައްޔިތުންގެ ފަރާތުން ލިބޭ އެއްބާރުލުމަށް އެޗްޑީސީން ވަނީ ޝުކުރު ދަންނަވާފައެވެ.
