ހައިކޯޓުގެ ފަނޑިޔާރުންގެ ތެރެއިން ޖުޑިޝަލް ސާވިސް ކޮމިޝަން (ޖޭއެސްސީ) ގެ މެމްބަރުކަމަށް ފަނޑިޔާރު ހަސަން ޝަފީއު އެ ކޯޓުން އިންތިހާބުކޮށްފި އެވެ.
ޖޭއެސްސީގައި ހައިކޯޓުގެ ފަނޑިޔާރުގެ މަގާމު ހުސްވެފައި ވަނީ، ކުރިން ހައިކޯޓުގެ ފަރާތުން ކޮމިޝަނުގައި ހުންނެވި ފަނޑިޔާރު މުހައްމަދު ނިޔާޒް ހިދުމަތުން ރިޓަޔަރ ކުރެއްވުމުންނެވެ.
ހައިކޯޓުން ”އެކްސް“ ގައި ކުރި ޕޯސްޓެއްގައި ބުނީ ޖޭއެސްސީއަށް ހައިކޯޓުން ފަނޑިޔާރު ހަސަން ޝަފީއު އިންތިހާބުކޮށްފައިވާކަމަށެވެ.
ޖޭއެސްސީގެ ކޮމްޕޮޒިޝަން އެކުލެވިގެންވާ ގޮތުން، ކޮމިޝަނުގައި ހިމެނިވަޑައިގަންނަވަނީ ރައްޔިތުންގެ މަޖިލީހުގެ ރައީސާއި، ސުޕްރީމް ކޯޓުގެ ފަނޑިޔާރަކާއި، ހައިކޯޓުގެ ފަނޑިޔާރަކާއި، ދަށު ކޯޓުތަކުގެ ފަނޑިޔާރެއްގެ އިތުރުން ރައްޔިތުންގެ މަޖިލީހުގެ މެމްބަރަކާއި، ސިވިލް ސާވިސް ކޮމިޝަނުގެ ރައީސް އަދި ރައީސުލްޖުމްހޫރިއްޔާ ކޮމިޝަނަށް އައްޔަނު ކުރާ މެމްބަރަކާއި ބަންޑާރަ ނައިބެވެ. އަދި ގާނޫނީ ވަކީލުންގެ ތެރެއިން މެމްބަރަކާއި، އާންމުންގެ ތެރެއިން މަޖިލީހުން ކަނޑައަޅާ މެމްބަރެއް ޖޭއެސްސީގައި ހުންނަވާނެ އެވެ.
ޖޭއެސްސީގައި ތިއްބަވަނީ ޖުމްލަ 10 މެމްބަރުންނެވެ.
