މި އިސްލާހުތަކުގެ ތެރެއިން، 18 އަހަރުން ދަށުގެ ކުދިން ތިބި އާއިލާތަކަށް މީގެކުރިން ކުރިމަތިވި ގޮންޖެހުންތަކަށް ހައްލެއް ލިބިފައިވާކަން މެންބަރު ފާހަގަކުރެއްވިއެވެ. އެގޮތުން، ދެ ކޮޓަރީގެ ފްލެޓް ލިބިފައިވާ ފަރާތްތަކަށް، 18 އަހަރު ނުވާ ދެ ޖިންސުގެ ކުދިން ތިބި އަދަދަށް ބަލައި، އެ ފްލެޓް ދޫކޮށްލުމަށްފަހު ތިން ކޮޓަރީގެ ފްލެޓަށް ކުރިމަތިލެވޭނެ މަގު އައު އުސޫލުގެ ދަށުން ފަހިވެފައިވާކަމަށް ހުސެއިން ޝަރީފް ވިދާޅުވިއެވެ.
މިއީ ބޯހިޔާވެހިކަން އިންސާފުވެރިކަމާއެކު ފޯރުކޮށްދިނުމަށް އެޅުނު މުހިންމު ފިޔަވަޅެއްގެ ގޮތުގައި ހުސެއިން ޝަރީފް ފާހަގަކުރެއްވި އެވެ.
އިދިކޮޅު އެމްޑީޕީ އަށް ފާޑުވިދާޅުވަމުން ޝަރީފް ވިދާޅުވީ، އެ ޕާޓީގެ ވެރިކަމުގައި ކޮރަޕްޝަނާއި ނަހަމަ ގޮތުގައި ދައުލަތުގެ މުދާ ބޭނުންކުރުން އިންތިހާއަށް އޮތް ކަމަށެވެ. އަދި ގައުމުގެ އިގްތިސާދު ނާޒުކު ފައްތަރަކަށް ވައްޓާލުމަށްފަހު، މިއަދު އެމްޑީޕީން ސަރުކާރަށް ފާޑުކިޔުމުގެ ދީނީ އަދި އަޚްލާގީ ހައްގެއް ނެތްކަމަށް އޭނާ ވިދާޅުވިއެވެ.
ހުސެއިން ޝަރީފް ވިދާޅުވީ އިގްތިސާދީ ގޮންޖެހުންތަކާއެކުވެސް، މިހާރުގެ ސަރުކާރުން ކަންކަން ތަރުތީބުކޮށް، ރައްޔިތުންނަށް ފައިދާހުރި މަސައްކަތްތަކެއް ކުރަމުންދާކަން ރައްޔިތުން ބަލައިގަންނަ ކަމަށެވެ.
ސަރުކާރުގެ ”ބޯހިޔާވެހިކަން އެންމެންނަށް“ ސިޔާސަތުގެ ދަށުން، ގޯއްޗާއި ފްލެޓަށް އެދި ހުށަހެޅުމުގެ ފުރުސަތު އަންނަ އާދީއްތަ ދުވަހު ހުޅުވާލުމަށް ވަނީ ހަމަޖެހިފަ އެވެ. އެކަން ފާހަގަކޮށް ޝަރީފް ވިދާޅުވީ ޕޮއިންޓް ދިނުމުގެ އުސޫލަށް ގެނެވުނު ބަދަލުތަކަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު މާލޭ އަވަށްތަކުގެ ރައްޔިތުންނާ ބޭއްވި ބައްދަލުވުންތަކުގައި ފާހަގަކުރި ކަންބޮޑުވުންތަކަށް ބިނާކޮށް ގެނެވުނު ބަދަލުތަކެއް ކަމަށެވެ.\
މި މަޝްރޫއުގެ ދަށުން މާލެ ސަރަހައްދާއި ރަސްމާލެ ހިމެނޭހެން 15,000 ގޯއްޗާއި، 7,900 ފްލެޓް ދޫކުރުމަށް ވަނީ ނިންމާފައެވެ.
