އަދާލަތު ޕާޓީގެ ރައީސަކު ހޮވުމަށް ބާއްވާ އިންތިހާބުގެ ކަންކަން ކުރިޔަށް ގެންދަނީ، ގަވައިދާއި އެއްގޮތްވާ ގޮތުގެ މަތީންކަމަށް އެ ޕާޓީގެ އިންތިހާބާއި ބެހޭ ކޮމިޓީން ބުނެފި އެވެ،
ޕާޓީން މިކަން ހާމަކޮށްފައި ވަނީ، އިންތިހާބުގައި ވޯޓުފޮށި ބެހެއްޓުމަށް އެދި ޕާޓީގެ ރައީސްކަމަށް ވާދަކުރާ ކެނޑިޑޭޓް އިކްރާމް ޢަބްދުއްސައްތާރު ފޮނުވާފައިވާ ސިޓީއަކަށް ދިން ޖަވާބުގައެވެ.
އިންތިޚާބީ ކޮމިޓީގެ މުގައްރިރު ޢަލީ ރަޝީދު ސޮއި ކުރައްވައި ފޮނުވާފައިވާ ސިޓީގައި ވަނީ އިންތިހާބުގެ ހުރިހާ ކަމެއްވެސް ކުރިއަށްދަނީ ޢަދާލަތު ޕާޓީގެ ދުސްތޫރާއި، އެތެރޭގެ އިންތިހާބުތަކާ ބެހޭ ގަވާއިދުތަކާ އެއްގޮތްވާ ގޮތުގެ މަތިންނެވެ. އަދި މިހާރު އަމަލު ކުރަމުންދާ ގަވާއިދުތަކުގެ ދަށުން، އިންތިހާބުގައި ވޯޓުފޮށި ބެހެއްޓުމަށް ޖާގަ ނުދޭކަމަށްވެސް އެ ޕާޓީން ވަނީ ހާމަކޮށްފައެވެ.
މީގެއިތުރުން، ހަތަރުވަނަ ދައުރަށް މީހުން އިންތިހާބު ކުރުމުގެ ހުރިހާ މަސައްކަތެއް ކުރިއަށް ދަނީ އިންތިހާބީ ކޮމިޓީގެ ސީދާ ބެލުމުގެ ދަށުންކަން ޕާޓީން ވަނީ ފާހަގަކޮށްފަ އެވެ. އަދި އިންތިހާބުގެ މިނިވަންކަމާއި ދެފުއްފެންނަ ކަން ކަށަވަރުކުރުމަށްޓަކައި އަޅަންޖެހޭ ފިޔަވަޅުތައް އަޅަމުންދާކަމަށް ވަނީ ބުނެފައެވެ.
އެހެންކަމުން، ޕާޓީގެ މެންބަރުންގެ މެދުގައި އިންތިހާބާއި މެދު ޝައްކު އުފެދޭ ފަދަ ވާހަކަތައް ނުދެއްކުމަށް، އިކްރާމަށް ފޮނުވި ސިޓީގައި ކޮމިޓީން ވަނީ އިލްތިމާސްކޮށްފައެވެ.
