އައްޑޫސިޓީ ހިތަދޫގައި ”ސްކޫޕު“ ގެ ނަމުގައި ހަރަކާތްތެރިވާ ގްރޫޕަކީ ގޭންގުތަކުން ހިންގާ ކުށްތަކާއި އެނޫންވެސް ނުރައްކާތެރި ކުށްތައް ހުއްޓުވުމުގެ ޤާނޫނުގެ ދަށުން އިންތިޒާމުވެފައިވާ ކުށްކުރާ ގްރޫޕެއްކަމަށް ކަނޑައަޅުއްވައިދެއްވުމަށް ކޯޓަށް ހުށަހެޅުމަށް އެދި ދިވެހި ފުލުހުންގެ ޚިދުމަތުން ޕްރޮސިކިއުޓަރ ޖެނެރަލްގެ އޮފީހަށް ހުށަހަޅާފައިއެވެ.
ޕީޖީ އޮފީހުން ހިއްސާކުރި މައުލޫމާތުގައި ވަނީ ފުލުހުން ހުށަހެޅި ހުށަހެޅުމާއި، ހެކިތައް އެ އޮފީހުން ދިރާސާކޮށް ބެލިއިރު ”ސްކޫޕު“ ގްރޫޕަކީ ގޭންގުތަކުން ހިންގާ ކުށްތަކާއި އެނޫންވެސް ނުރައްކާތެރި ކުށްތައް ހުއްޓުވުމުގެ ޤާނޫނުގެ ދަށުން ”އިންތިޒާމުވެފައިވާ ކުށްކުރާ ގްރޫޕް“ އެއްގައި ހުންނަންޖެހޭ ޝަރުތުތައް ފުރިހަމަވާ، އަދި މިހާރުވެސް ކުށްކުރުމުގައި ހަރަކާތްތެރިވާ ގްރޫޕެއްކަމަށެވެ.
އެހެންކަމުން، ”ސްކޫޕު“، ”ސްކޫޕު ކަންމަތި“ ނުވަތަ ”SKP” ގުރޫޕަކީ ގޭންގުތަކާއި ބެހޭ ޤާނޫނުގެ 63 ވަނަ މާއްދާގައި ބަޔާންކޮށްފައިވާ ޝަރުޠު ފުރިހަމަވާ، އިންތިޒާމުވެފައިވާ ކުށްކުރާ ގްރޫޕެއް (ގޭންގެއް) ކަމަށް ކަނޑައަޅައިދީ އެ ގްރޫޕަށް ނިސްބަތްވާ މީހުންކަމަށް ފާހަގަވެފައިވާ 9 މީހަކު އެ ގްރޫޕްގެ މެންބަރުންކަމަށް ކަނޑައަޅައިދިނުމަށް އެދި ހައިކޯޓަށް ހުށަހަޅާފައި ކަމަށް ޕީޖީން ވަނީ ބުނެފައެވެ.
ޕީޖީން ވަނީ އެގްރޫޕަށް ނިސްބަތްވާކަމަށް ބެލެވޭ ”އެސް ކޭ ޕީ ސްޕޯޓްސް ކްލަބް“ އުވާލުމަށް ކޮމިޝަނަރ އޮފް ސްޕޯޓްސްގެ މައްޗަށް އަމުރުކޮށްދެއްވުމަށް ވެސް އެދިފައެވެ. އަދި ”ސްކޫޕު“، ”ސްކޫޕު ކަންމަތި“ އަދި ”SKP“ ލިޔެފައިވާ ފާރުތަކާއި، އެންމެހައި ތަންތަނުން އެނަންތައް ފޮހެލުމަށް އައްޑޫ ސިޓީ ކައުންސިލްގެ މައްޗަށް އަމުރުކޮށްދެއްވުމަށް ކޯޓުގައި ވަނީ އެދިފައެވެ.
ގޭންގުތަކާއި ބެހޭ ގާނޫނަށް އަމަލުކުރަން ފެށިފަހުން ޕީޖީއަށް ފުލުހުން ހުށައެޅި ދެވަނަ މައްސަލަކަމަށް އެ އެފީހުން ވަނީ ބުނެފައެވެ. ކުރިން ހުށައެޅި މައްސަލައިގައި އެއީ ގޭންގެއްކަމަށް ކަނޑައެޅޭ މިންވަރަށް ތަހުގީގު ފުރިހަމަ ނުވާތީ އަލުން އެ މައްސަލަ ފުލުހުންނަށް ފޮނުވާފައިވާ ކަމަށެވެ.
އެހެންކަމުން ގޭންގުތަކާއި ބޭހޭ ޤާނޫނުގެ ދަށުން ”އިންތިޒާމުވެފައިވާ ކުށްކުރާ ގްރޫޕް (ގޭންގް)“ އެއްކަމަށް ކަނޑައަޅައިދިނުމަށް ކޯޓަށް ހުށަހެޅި ފުރަތަމަ ހުށަހެޅުން ކަމަށް ވަނީ ބުނެފައެވެ. ކޯޓުން އެއީ ގޭންގެއް ކަމަށް ކަނޑައެޅުމުން އަޅަންޖެހޭ ފިޔަވަޅުތައް ފުލުހުން އަޅާނެ ކަމަށް ޕީޖީން ވަނީ ބުނެފައެވެ.
ޤާނޫނުގައި ”އިންތިޒާމުވެފައިވާ ކުށްކުރާ ގްރޫޕް“ މާނަކޮށްދީފައިވަނީ ޖިނާއީ ބޮޑު ކުށެއް ނުވަތަ އެފަދަ އެއް ކުށަށްވުރެ ގިނަ ކުށް ކުރުމަށް، ނުވަތަ އެނޫންވެސް ޖިނާއީ ކުށް ކޮށްގެން ސީދާ ގޮތެއްގައިވިޔަސް ނުވަތަ ނުސީދާ ގޮތެއްގައިވިޔަސް މާލީ ނުވަތަ އެނޫންވެސް މާއްދީ މަންފާއެއް ހޯދުމަށް، ގުޅިގެން މަސައްކަތްކުރާ، ތިން މީހުން ނުވަތަ އެއަށްވުރެ ގިނަ މީހުންގެ މައްޗަށް އެކުލެވޭ އިންތިޒާމުވެފައިވާ ގްރޫޕަކަށެވެ.
މި ޤާނޫނުގެ ދަށުން ފިޔަވަޅު އެޅެނީ ޤާނޫނަށް ޢަމަލުކުރަން ފެށުމަށްފަހު ”އެކްޓިވް“ ގްރޫޕްތަކާ މެދުގައެވެ.
ދިވެހިރާއްޖޭގައި އިންތިޒާމުވެގެން ކުށްކުރާ ގްރޫޕްތައް ހުއްޓުވައި ފިޔަވަޅު އެޅުމަށް ދިވެހި ފުލުހުންގެ ޚިދުމަތާއި ދައުލަތުގެ ކަމާބެހޭ އިދާރާތަކާ ގުޅިގެން މަސައްކަތްކުރަމުން ދާނެ ކަމަށް ޕީޖީން ވަނީ ބުނެފައެވެ.
އެގޮތުން ކުރިއަށް އޮތް ތަނުގައިވެސް ޤާނޫނުގައި ބަޔާންކުރާ ޝަރުތުތައް ފުރިހަމަވާ ކުށްކުރާ ގްރޫޕްތަކާމެދު ޤާނޫނުގައި ބަޔާންކޮށްފައިވާ އިޖުރާއަތްތައް ފުރިހަމަކުރުމަށްފަހު ފިޔަވަޅު އަޅަމުން ގެންދާނެ ކަމަށް ޕީޖީން ވަނީ ބުނެފައެވެ.
