މާލޭ ހިޔާ 1 ގެ ފަސްވަނަ ފަންގިފިލާއިން ދޮށީ އުމުރުގެ ދިވެހި ފިރިހެނަކު ވެއްޓި، ސީރިއަސް އަނިޔާތަކެއް ވެގެން ފަރުވާދޭން ފަށައިފިއެވެ.
ފުލުހުން މީޑިއާތަކަށް ފޮނުވި މެސެޖެއްގައި ބުނެފައިވަނީ، މާލެ ހިޔާ އެކަކުން މީހަކު ވެއްޓިފައިވާ ކަމުގެ މައުލޫމާތު ފުލުހުންނަށް ލިބިފައިވަނީ މިއަދު ހެނދުނު 6:50 ހާއިރު ކަމަށެވެ. މި ހާދިސާގައި ވެއްޓިފައިވަނީ އުމުރުން 60 އަހަރުގެ ދިވެހި ފިރިހެނެއް ކަމަށްވެސް ފުލުހުން ކަށަވަރުކޮށްދީފައިވެއެވެ.
ހާދިސާ ހިނގި ސަރަހައްދުން އެ މީހާ ނަގައިގެން ވަނީ ވަގުތުން އައިޖީއެމްއެޗް ހޮސްޕިޓަލަށް ގެންގޮސްފައެވެ. ފުލުހުން ބުނި ގޮތުގައި އެ މީހާއަށް މިހާރު ދަނީ އެ ހޮސްޕިޓަލުގައި ފަރުވާ ދެމުންނެވެ. ނަމަވެސް އޭނާގެ ހާލަތާ ގުޅޭ އިތުރު ތަފްސީލެއް އަދި ހާމަކޮށްފައެއް ނުވެއެވެ.
މި ހާދިސާ ހިނގަން މެދުވެރިވި ސަބަބު ދެނެގަތުމަށްޓަކައި ފުލުހުން ދަނީ މި މައްސަލަ އިތުރަށް ތަޙުޤީޤު ކުރަމުންނެވެ. މާލޭ ހިޔާ ފަދަ އުސް އިމާރާތްތަކުން މީހުން ވެއްޓުމުގެ ހާދިސާތައް މީގެ ކުރިންވެސް ހިނގާފައިވާކަން ފާހަގަކުރެވެއެވެ.
